Cinshi Cingamwafwa Ukumfwikisha Ifyaba mu Baibolo?

“MWALIFISHILISHA ifi fintu ku ba mano na bacenjela, no kufisokolwela ku tunya.” (Luka 10:21) Aya mashiwi Yesu alandile kuli Wishi wa ku muulu yalangilila ukuti, pa kuti tumfwikishe ifyebo fya mu Baibolo, kano twaba no mutima usuma. Yehova alisokolola amano yakwe pa kupeela abantu icitabo ico abaiceefya fye beka e bengasambililamo no kumfwikisha.

Fwe bengi cilatwansha ukuba abaiceefya. Bonse tufyalwa na ka musango ka kufwaya ukuba ne cilumba. Na kabili, tuleikala mu “nshiku sha kulekelesha,” umwaba abantu “abaitemwa, . . . bamunshebwa, abatuumikwa ku cilumba.” (2 Timote 3:1-4) Iyi misango, e ilenga ukuti tulefilwa ukumfwikisha Icebo ca kwa Lesa. Ku ca bulanda, ificita abantu ba cilumba abo twaikala na bo muli cino calo, limo limo filakuma ifwe bonse. Nomba, cinshi mwingacita pa kuti mube no mutima usuma uukabilwa pa kumfwikisha ifyaba mu Baibolo?

Ukuteyanya Umutima na Matontonkanyo

Esra, uwali intungulushi ya kale iya bantu ba kwa Lesa “ateyenye umutima wakwe ku kwetetula amalango ya kwa Yehova.” (Esra 7:10) Bushe kwaliba fimo ifyo na ifwe twingacita pa kuti tuteyanye umutima wesu? Ee. Ica ntanshi, tatufwile ukutwishika Amalembo. Umutumwa Paulo alembeele Abena Kristu banankwe ukuti: “Ilyo mwapokelele icebo ca kwa Lesa, ico mwaumfwile kuli ifwe, tamwacipokelele nge cebo ca bantu, lelo, ifyo caba icine cine, icebo ca kwa Lesa.” (1 Abena Tesalonika 2:13) Nangu ca kuti Lesa abomfeshe abantu ukulemba Amalembo, ifyo balelemba fyalefuma kuli Yehova. Kanshi, ukwishiba ukuti amashiwi yaba muli Baibolo yafuma kuli Lesa, kukalenga twasumina ifyo tubelenga.—2 Timote 3:16.

Ipepo na lyo kuti lyatwafwa ukuteyanya umutima wesu. Apo Baibolo yalipuutwamo no mupashi wa mushilo, umupashi wa mushilo wine, e wingatwafwa no kumfwikisha ubukombe bwabamo. Tufwile ukupepa ukuti Lesa atwafwe ukubomfya umupashi wakwe. Kemba wa malumbo na o e fyo aleumfwa ilyo alembele ukuti: “Nengeni ukwiluka, no kuleka ndesunga amalango yenu, awe ndeyabaka umutima wandi onse.” (Amalumbo 119:34) Tulingile ukupepa kuli Lesa pa kuti atwafwe ukumfwikisha ifyalembwa, kabili tufwile no kupepa ukuti atupeele umutima usuma uwingalenga twasumina ifyo Baibolo ilanda. Pa kuti tumfwikishe ifya mu Baibolo, tulingile no kusumina ukuti ifyalembwamo fya cine.

Ilyo mule-etetula pa fyo mwingaba no mutima usuma uwa kumfwikisha, tontonkanyeni na pa fyo ukusambilila Baibolo kwingamwafwa. Kwaba ifintu ifisuma ifingi ifilenga ukuti tulebelenga Baibolo, lelo icacindamisha pali fyonse ca kuti ukubelenga Baibolo kulatwafwa ukupalama kuli Lesa. (Yakobo 4:8) Nga tulebelenga pa nshila shalekanalekana isho Yehova acitilamo ifintu, na fintu asunga bwino bwino abamutemwa, e lyo ne fyo acita ku bantu abamupondokela, tuleshiba ifyo aba. Umulandu uukalamba uwa kubelengela  Baibolo lyonse ufwile ukuba wa kufwaya ukwishiba Lesa bwino bwino kabili nga twacite co ninshi bucibusa bwesu na wene bukakosa.

Ifingatucilikila Ukuba no Mutima Usuma

Finshi fingalenga ukuti tufilwe ukumfwikisha Icebo ca kwa Lesa? Ubwafya bumo bwaba bwa kukonkelesha bambi mu fyo basuminamo no kufwaya ukuba aba cishinka sana kuli bena. Ku ca kumwenako, limbi kuti mwasumina mu fintu ifyo abantu bamo basuminamo nelyo ifyo batontonkanya. Nomba, ni shani nga ca kuti abo bantu tabaishiba bwino bwino icine caba mu Cebo ca kwa Lesa nelyo tabacindika sana icine ca mu Baibolo? Nga mulebakonkelesha, kuti mwafilwa ukumfwikisha ifyo Baibolo isambilisha. E mulandu wine Baibolo itukoselesesha ukuti tufwile ukutontonkanyapo bwino sana pa fyo bambi batusambilisha.—1 Abena Tesalonika 5:21.

Na Maria, nyina kwa Yesu na o aliko mu bwafya bwa musango yu. Ilyo alekula bamusambilishe ukucindika sana intambi sha baYuda. Alekonka bwino bwino Amafunde ya kwa Mose kabili ukwabula no kutwishika aleya na ku masunagoge. Mu kupita kwa nshita aishileishiba ukuti Lesa alileka ukupokelela ukupepa uko abafyashi bakwe bamusambilishe. E ico, Maria aishilecetekela amasambilisho ya kwa Yesu kabili aali pa basambi ba kubalilapo abapangile icilonganino ca Bena Kristu. (Imilimo 1:13, 14) Te kutila ico Maria acitile calangile ukuti takwete mucinshi ku bafyashi bakwe na ku ntambi shabo, lelo calangile fye ukuti alitemwa Lesa. Ukupala Maria, na ifwe bene nga tulefwaya ukunonkelamo mu fyalembwa mu Baibolo, tulingile ukuba aba cishinka kuli Lesa ukucila ukukonkelela ifyo abantunse balanda.

Ku ca bulanda, abantu abengi tabapoosako amano ku cine ca mu Baibolo. Bambi bakonkelela fye intambi sha bufi isha mapepo kabili tabafwaya no kwishiba ifintu fimbi. E lyo bambi na bo mu milandile yabo ne mikalile yabo balanga fye ukuti tabacindika icine ca mu Baibolo. Kanshi, pa kuti musumine icine ca mu Baibolo, kano mwaipeelesha pantu, ukusambilila Baibolo kuti kwalenga abanenu, abena mupalamano, abo mubomba na bo, e lyo na balupwa lwenu ukumupata. (Yohane 17:14) Nangu cibe fyo, umwaume wa mano Solomone alembele ati: “Nonke cine no kucipoosa iyo.” (Amapinda 23:23) Nga mwacindamika sana icine, Yehova akamwafwa ukuti mumfwikishe ifyaba mu Baibolo.

Na cimbi icilenga bamo ukufilwa ukumfwikisha ubukombe bwa mu Baibolo ca kuti tabafwaya ukucita ifyo ilanda. Yesu aebele abasambi bakwe ukuti: “Imwe mwalipeelwa ukumfwikisha ifya nkaama yashila ifya bufumu bwa mu muulu, lelo balya bantu tabapeelwa. Pantu imitima ya aba bantu yalikunkuma, na matwi yabo yalomfwa no kwankula iyo.” (Mateo 13:11, 15) Abengi abo Yesu aleshimikila tabapooseleko amano, e lyo tabalefwaya ukwaluka. Tabaali ngo muntu wa makwebo ulya Yesu alandilepo mu cilangililo cakwe! Atile ashisanga margariti umo uwaumo mutengo, ulya muntu bwangu bwangu aileshitisha fyonse ifyo akwete no kushita margariti. Na ifwe bene tulingile ukwishiba ukuti ukumfwikisha icine ca mu Baibolo kwalicindama sana kuli ifwe.—Mateo 13:45, 46.

Ubwafya bwa Kukanafwaya Ukusambilishiwa

Ubwafya bukalamba ubulenga bamo ukufilwa ukumfwikisha ifyaba muli Baibolo bwa kuti tabafwaya ukusambilishiwa. Bamo balafilwa ukusumina amasambililo yapya pantu umuntu uulebeba limbi kuti amoneka kwati tasambilila. Na batumwa ba kwa Yesu Kristu bali “abashasambilila kabili abantu yaweyawe.” (Imilimo 4:13) Pa kulondolola umulandu abatumwa ba kwa Yesu babelele abashasambilila kabili abantu yaweyawe, Paulo atile: “Moneni ukwitwa kwenu, mwe bamunyinane, ukuti abengi abaitilwe tabaali aba mano ku buntunse, te bengi aba maka, te bengi bashimucindikwa; lelo Lesa asalile ifya buwelewele fya pano calo, ku kulenga bekatwe nsoni aba mano.” (1 Abena Korinti 1:26, 27) Nga mwasanga ukuti cilemukosela ukusambilishiwa ku muntu uushasambilila, mufwile ukwibukisha ukuti uyo muntu alebomfiwa fye kuli Lesa ukuti alemusambilisha. Ala mwandini twalishuka pantu uutusambilisha ni Yehova Kasambilisha Mukalamba!—Esaya 30:20; 54:13.

Naamani uwali umukalamba wa bashilika bonse aba ku Suria, na o calimukosele ukumfwila ifyalelanda umuntu yaweyawe. Apo alefwaya ukupola ku bulwele bwakwe ubwa fibashi, Naamani aile mu kumona Elisha kasesema wa kwa Yehova. Lelo Lesa aebele umubomfi wakwe ukuti ebe Naamani  ifyo afwile ukucita pa kuti apole. Ubukombe bamwebele e lyo ne nshila bamwebelemo fyalengele Naamani afilwe ukuiceefya kabili akeene ukumfwila ifyo bamwebele ica kuti pa kubala alikeene ukumfwila icebo ca kwa Lesa ico alandiile muli kasesema wakwe. Lelo tapakokwele, Naamani alyalwile ukutontonkanya kwakwe kabili ifibashi fyakwe fyalipolele. (2 Ishamfumu 5:9-14) Na ifwe bene tulakwatako ubwafya bwa musango yu ilyo tulesambilila Baibolo. Kuti twasanga ukuti pa kuti tupole lwa ku mupashi no kuba ne mibele isuma, tulingile ukutendeka ukukonka imikalile ipya. Bushe tukaba abaiceefya no kusumina ukuti umuntu umbi atusambilishe ifyo tulekabila ukucita? Bantu bakwata umutima uusuma fye beka kabili abafwaya ukusambilila e bengatemwa sana ukumfwikisha ifyaba muli Baibolo.

Umuntu umo uwali ne cifulo cikalamba mu buteko bwa kwa namfumu Kandake uwa bena Etiopia, alangile ukuti ali no mutima uusuma uwa kufwaya ukusambilila. Ali mwi celeta lyakwe ninshi alebwela kuno Afrika, e lyo umusambi Filipi abutukiile kuli wena. Filipi aipwishe ulya mwaume nga ca kuti aleumfwa umwalolele ifyo alebelenga. Ulya muntu aliiceefeshe no kwasuka ati: “Bushe kuti naishiba shani, kano umo antungulula?” Ilyo fye aumfwikishe Icebo ca kwa Lesa ico alebelenga, ulya mwaume alibatishiwe. Lyena, “aile pa lwendo lwakwe alesekelela.”—Imilimo 8:27-39.

Inte sha kwa Yehova na bo bantu yaweyawe fye. Cila mulungu balalanshanya ifyebo fya mu Baibolo na bantu ukucila pali 6 milioni pa mayanda yabo. Apo Baibolo eisambilisha imikalile iyacilapo ukuwama mu bumi, kabili ilalondolola isubilo lya cine ilya bantunse, no kulenga twaishiba Lesa bwino bwino, abantu abengi sana balisanga ukuti mu kusambilila Baibolo no kumfwikisha ifyo ilanda mwaba ubusuma ubwingi nga nshi. Ala na imwe bene kuti mwaishiba bwino bwino ifyaba muli Baibolo.

[Icikope pe bula 7]

Naamani calimukoseele ukumfwila umuntu yaweyawe uwalemweba ifya kucita

[Icikope pe bula 7]

Ukumfwikisha ifyaba muli Baibolo kulatusansamusha