Na Imwe Kuti Mwaumfwikisha Ifyaba mu Baibolo

MULI Baibolo mwaba icine icaumo umutengo ukufuma kuli Lesa. Ilatweba ico ubumi bwabelako, icalenga ukuti abantunse balecula, ne fyo bakekala ku ntanshi. Baibolo ilatusambilisha ifyo twingacita pa kuba ne nsansa, ifyo twingapanga ifibusa, no kwishiba ifya kucita ilyo twaba na mafya. Ne cacilapo ukucindama ca kuti ilatusambilisha pali Kabumba wesu kabili Shifwe wa ku muulu, Yehova. Ukwishiba fyonse ifi kulalenga twaba ne nsansa kabili kulalenga no kuti twishibe umulandu ubumi bwabelako.

Baibolo ilanda ukuti ukunonka amano ya kwa Lesa kwaba kwati kulya ica kulya. Yesu atile: “Te ku cilyo ceka, umuntu engabela umumi, lelo ku cebo conse icifuma mu kanwa ka kwa Yehova.” (Mateo 4:4; AbaHebere 5:12-14) Pa kuti ubumi bwesu butwalilile, tukabila ukulya ifya kulya fisuma cila bushiku. Mu nshila imo ine, ukubelenga Icebo ca kwa Lesa lyonse kwalicindama kuli ifwe pa kuti tukakwate ubumi bwa muyayaya ubo Lesa aatulaya.

Tulomfwa bwino ukulya ifya kulya pantu e fyo Yehova atupanga, kabili ukulya kulapwisha insala. Nomba kwaliba icintu na cimbi icacindama ico tufwile ukubikako amano nga ca kuti tulefwaya ukuba ne nsansa. Yesu atile: “Ba nsansa abaibukila ukuti balakabila ifya ku mupashi.” (Mateo 5:3) Nga twaumfwikisha ifyaba mu Cebo ca kwa Lesa, insala ya ku mupashi kuti yapwa, kabili kuti twaba ne nsansa.

Kwena ca cine ukuti bamo balafilwa ukumfwikisha ifyaba mu Baibolo. Ku ca kumwenako, limbi kuti mwakabila ubwafwilisho pa kuti mumfwikishe amalembo ayalanda pa ntambi shimo isho mushaishiba na lintu mwasanga amashiwi ayo mushingeshiba umo baloseshe. E lyo kwaba no kusesema ukwalembwa fye mu mampalanya. Nomba pa kumfwikisha ifyo uko kusesema  kupilibula, kano mwabelenga na malembo yambi aya mu Baibolo ayalelanda pali ilyo line lyashi. (Daniele 7:1-7; Ukusokolola 13:1, 2) Ifyalembwa muli Baibolo nangu fingamoneka ukwafya shani, ukumfwa kwena kuti mwafyumfwa. Nomba kuti mwashininkisha shani ukutila kuti mwaumfwikisha ifyaba mu Baibolo?

Na Imwe Kuti Mwaumfwikisha Ifyaba mu Baibolo

Baibolo Cebo ca kwa Lesa. Muli Baibolo, e mo Lesa alondolola ifyo afwaya kuli ifwe. Nomba bushe Lesa e wingalemba icitabo ica kuti twafilwa no kumfwa ifyabamo nelyo icitabo ca kuti abasambilila beka fye e bengabelenga no kumfwa ifilimo? Awe iyo, Yehova wa cikuuku, te kuti acite ica musango yo. Kristu Yesu atile: “Ni wishi nshi pali imwe, uo umwana wakwe nga alomba isabi, engamupeele nsoka ukucila isabi? Nelyo nga alomba ilini, nani engamupeela kaling’ongo? E ico, nga imwe nangu muli babifi, mwaishiba ukupeela abana benu ifya bupe ifisuma, kanshi Shinwe wa mu muulu wena akacishamo ukupeela umupashi wa mushilo ku balemulomba!” (Luka 11:11-13) Kanshi na imwe kuti mwaumfwikisha ifyaba mu Baibolo, kabili nga mwalomba Lesa no mutima wenu onse, akamwafwa ukumfwikisha Icebo cakwe. Na kuba, nangu fye bana abanono kuti baumfwikisha ifyebo fyacindama ifya mu Baibolo!—2 Timote 3:15.

Kwena tulakabila ukubombesha pa kuti tumfwikishe ifyaba mu Baibolo, lelo nga twaumfwikisha tukakoseleshiwa icine cine. Ilyo abushiwe, Yesu amonekeele ku basambi bakwe babili kabili abebele ifyebo fimo ifya kusesema kwa mu Baibolo. Ilyashi lya kwa Luka litila: “Kabili ukutendeka pali Mose na Bakasesema bonse, alabelwila ifyamulembelwe mu Malembo yonse.” Cinshi caishilecitika? Bulya bwine bushiku mu nshita ya cungulo ilyo baletontonkanya pa fyo abasambilishe, abasambi batendeke ukusoshanya abati: “Bushe imitima yesu tayacilabilima ilyo acilalanda na ifwe mu nshila, ilyo acilatukupukwila Amalembo?” (Luka 24:13-32) Abasambi balitemenwe ilyo baumfwikishe Icebo ca kwa Lesa pantu calikoseshe ukutetekela kwabo mu malayo ya kwa Lesa kabili cabalengele ukushininkisha ukuti ku ntanshi ifintu fikawama.

Ukubelenga no kumfwikisha Icebo ca kwa Lesa takwaba cisendo iyo, lelo kulomfwika bwino kabili kuti mwanonkelamo, nga filya fine munonkelamo nga mulelya ifyakulya fisuma. Nomba, cinshi mwingacita pa kuti muleumfwikisha ifyaba mu Baibolo? Icipande cikonkelepo cilelondolola ifyo mwingaipakisha “ukwishiba Lesa.”—Amapinda 2:1-5.

[Icikope pe bula 4]

Ukupala wishi uwakwata ukutemwa, Yehova alatupeela umupashi wa mushilo uwa kutwafwa ukumfwikisha ifyaba mu Baibolo