Amepusho Ukufuma ku Babelenga

Nga ca kuti umuntu balamucusha ku fibanda, finshi engacita pa kuti fifume?

Icebo ca kwa Lesa cisambilisha ukuti abantu abo batitikisha ku fibanda kuti balubuka. Ipepo lilafwa sana ku kulubuka kukutitikisha kwa fibanda. (Marko 9:25-29) Lelo umuntu uo ifibanda ficusha alakabila ukubombesha pa kuficimfya. Icacitikile Abena Kristu ba mu mwanda wa myaka uwa kubalilapo calangilila icintu na cimbi icikabilwa pa kucimfya ifibanda.

Abantu bamo abaleikala mu musumba wa kale uwa Efese balepupe mipashi ilyo tabalaba abakonshi ba kwa Kristu. Nangu cibe fyo, ilyo batendeke ukubombela Lesa, “abalecita amalele balonganike amabuuku yabo no kuyoca pa menso ya bonse.” (Imilimo 19:19) Pa konaula amabuuku balebomfya pa kubuka, balya Bena Kristu bapya abali mu Efese baba ica kumwenako kuli bonse abalefwaya ukulubuka ukufuma ku kusansa kwa fibanda. Bakabila ukupoosa fyonse ifyo babomfya pa kupupe mipashi. Ici cisanshamo ukuleka ukubelenga amabuuku, bamagazini, na malyashi ya pa intaneti, ukutamba amafilimu, no kuleka ukumfwa ku nyimbo shilanda pa kupupe mipashi. Kabili balingile fye no kupoosa impimpi nelyo ifintu fimbi ifyo bafwala pa kuti “baicingilile.”—Amalango 7:25, 26; 1 Abena Korinti 10:21.

Lintu papitile imyaka inono ukutula apo balya Bena Kristu ba mu Efese baocelele amabuuku ya malele, umutumwa Paulo alembele ukuti: ‘Tuleshomboka, . . . ne fimipashi fya bubifi.’ (Abena Efese 6:12) Paulo acincishe Abena Kristu ukuti: “Fwaleni ifya bulwi fyakumanina ifya kwa Lesa ukuti mube na maka ya kwiminina ndi ku kulwisha imicenjelo ya kwa Kaseebanya.” (Abena Efese 6:11) Na lelo line kulya kucincisha kulabomba. Abena Kristu balingile ukukosha bumupashi bwabo pa kuti baicingilile ku fimipashi fibifi. Umutumwa Paulo akomailepo ukutila: “Pali fyonse, buuleni inkwela iikalamba iya citetekelo, e mo muli no kushimisha imifwi yonse iya mulilo iya mubifi.” (Abena Efese 6:16) Umuntu alakosha icitetekelo cakwe ukupitila mu kusambilila Baibolo. (Abena Roma 10:17; Abena Kolose 2:6, 7) Kanshi, ukubelenga Baibolo lyonse kulatwafwa ukukwata icitetekelo icitucingilila ku fimipashi fya bubifi. —Amalumbo 91:4; 1 Yohane 5:5.

Balya Bena Kristu bali mu Efese balekabila ukucita na cimbi icacililepo ukucindama. Paulo abebele ukuti: “Mu mipepele yonse ne mipaapaatile muletwalilila ukupepa inshita shonse mu mupashi.” (Abena Efese 6:18) Ca cine, na muno nshiku, ukulapepa lyonse ukuti Yehova atucingilile, kwalicindama nga nshi pa kuti tucingililwe ukufuma ku kusansa kwa fibanda. (Amapinda 18:10; Mateo 6:13; 1 Yohane 5:18, 19) Baibolo mu kulungatika itila: “Nakileni Lesa; lelo kaaneni Kaseebanya, na o akamufulumuka.”—Yakobo 4:7.

Ilyo uwaba ne fibanda alepepa ukuti fingamuleka, Abena Kristu bambi nabo kuti balepepelako uyu muntu uulefwaisha ukubombela Yehova kabili uule-esha na maka ukukaana ifimipashi fya bubifi. Kuti baipusha Lesa ukuti u o ifibanda filecusha engakosa lwa ku mupashi no kuficimfya. Apo Icebo ca kwa Lesa citila “ukupaapaata kwa mulungami, ilyo kulebomba kulaba na maka ayengi,” kanshi amapepo ya babomfi ba kwa Lesa kuti yayafwa umuntu u o ifibanda filecusha uule-esha na maka “ukukaana Kaseebanya.”—Yakobo 5:16.

[Icikope pe bula 31]

Abasumina ba mu Efese baonawile amabuuku balebomfya mu kupupe mipashi