Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Nga e fyo cali, moneni nga kuti mwayasuka amepusho yakonkapo:

• Cinshi ububifi bufulile fi?

Umulandu umo wa kuti umuntu alemenena ku kucita ububi. (Ukutendeka 8:21) Umulandu umbi wa kuti abantu abengi tabaishiba bwino ifyo Lesa afwaya. Mu kulundapo, Satana, intulo ya bubifi, alitwalilila ukufulunganya imikalile ya bantunse.—1/1, amabula 4-6.

• Fisuma nshi fingafuma mu kulanda icebo icisuma pa nshita iyalinga? (Amapinda 12:25)

Kuti calenga abo tulelandako ukuicetekela, ukukoseleshiwa, no kulabomba bwino, kabili kuti bamona ukuti twalibatemwa. Na kabili, ilyo tulefwaya ukutasha bambi, tulamona ubusuma muli bena.—1/1, amabula 16-17.

• Finshi fyali mu cipao ca cipingo?

Mwali ifipapatu fibili ifya mabwe apalembelwe Amafunde kabili mwali na mana. Pa numa Kora apondweke, inkonto ya kwa Aarone baibikile mu Cipao pa kuti ibe icishibilo ku nkulo iyaliko pali ilya nshita. (AbaHebere 9:4) Inkonto na mana bafwile balififumishe mu Cipao ilyo inshita ya kupeela itempele lya kwa Solomone tailafika.—1/15, ibula 31.

• Mulandu nshi abaYuda ba mu nshiku sha kwa Nehemia baleletela inkuni kwi tempele?

Ifunde lya kwa Mose talyalekabila abantu ukupeela ilambo lya fimuti. Lelo mu nshita ya kwa Nehemia inkuni shalekabilwa lyonse mukocelako amalambo ya pa ciipailo.—2/1, ibula 11.

• Muratorian Fragment e Cinshi?

Yaba lubali lwa manyuskripti ya ciLatini. Mu kubalilapo ici calembwa calembelwe mu ciGriki mu kupwa kwa mwanda wa myaka uwalenga ibili C.E. E calembwa cakokwesha umwaba ifyo amabuuku ya Malembo ya ciGriki aya Bwina Kristu yatantikwe, kabili cilalanda na pa mabuuku e lyo na pa bayalembele.—2/15, amabula 13-14.

• Mulandu nshi Namfumu Bashti akaanine ukuya ku mfumu ilyo yamwitile? (Estere 1:10-12)

Baibolo tayalanda icalengele ukuti Namfumu akaane ukuya. Abasambilila bamo batila ico akaanine pantu talefwaya ukuseebana pa ntanshi ya bashimucindikwa abakolelwe abo imfumu yaitile. Napamo uyu namfumu uwali fye uwayembe cata, talenakila imfumu, kanshi ali ca kumwenako icabipa kuli banamayo abena Persia ica kukananakila abalume babo.—3/1, Ibula 9.

• Bushe icilubula citulubula shani?

Ilambo lya kwa Yesu kuti lyatulubula ukufuma ku lubembu twapyana kabili kuti lyatulubula ku macushi yaletwako no lubembu. (Abena Roma 6:23) Ili ilambo lilalubula Abena Kristu ba cine pa kubapeela kampingu uwasanguluka. Nga twaba ne citetekelo muli ici cilubula, tatwakabe no mwenso ilyo tulebombela Lesa. (1 Yohane 2:1)—3/15, Ibula 8.

• Cinshi twingasambilila ku cibindo cali mwi Funde ica kukanaipika akana ka mbushi mu mukaka wa kwa nyina? (Ukufuma 23:19, NW)

Ukwipika akana ka mbushi mu mukaka wa kwa nyina napamo kwali lutambi ulo abena fyalo balecita pa kuti imfula iloke bwino. (Ukufuma 20:23) Lesa apekenye ukuti umukaka wa kwa nyina ulekosha umubili wa mwana no ku-ulenga ukukula bwino. Ukwipika akana ka mbushi mu mukaka wa kwa nyina takulanga mucinshi ku bubumbo bwa kwa Lesa ubwacindama ubulenga ukuti pabe ukumfwana pali nyina no mwana. Ifunde pa kulesha ici lilatulanga ukuti Yehova wa cikuuku.—4/1, Ibula 31.