Ukufika Umwana pa Mutima

BUSHE mwalitala amumfwapo ububi ilyo mwamona umwana umunono aleangala ubwangalo bwa nkondo ukubomfya akafuti ka kupanga? Amangalo ya musango yo yaliseeka nga nshi na ku bana abanono sana pa mulandu wa kuti mu mangalo ya pa mavidio e lyo na mu mafilimu mwaliba sana ulukaakala. Nomba, bushe kuti mwaafwa shani umwana umunono ukuleka ukwangala amangalo ya lukaakala, no kutendeka ukwangala amangalo ayasuma? Ba Waltraud, Inte ya kwa Yehova kabili bamishonari ababomba mu Afrika pa myaka iingi, balisangile inshila isuma iya kwafwilamo umwaice umo ukuleka ukwangala ifyangalo fya lukaakala.

Pa mulandu wa nkondo yali mu calo cabo, ba Waltraud balifulumwike no kuya ku calo cimbi mu Afrika. Kulya batendeke ukusambilisha namayo umo ifya mu Baibolo kabili uyu namayo ali no mwana wa myaka isano. Lyonse nga batandalila ulya namayo, balesanga umwana wakwe aleangasha akafuti ka pulastiki, kabili aka kene kafuti, e ko akwete fye aka kwangasha. Kwena, ba Waltraud tabatalile abamumonapo aletonta akafuti kakwe pa ncende imo kwati alefwaya ukupika, lelo ilingi line atemenwe ukwisula no kwisala akafuti kakwe filya bacita pa kubikamo impolopolo.

Ba Waltraud baebele ulya kalume ati: “Werner, Bushe walishiba ico naishila mu kwikala muno calo cenu? Inkondo e yalenga. Nabutwike mu calo cesu pantu kwali abantu bamo aba lukaakala abalepika abantu ku mfuti, kabili imfuti bakwete shalemoneka fye kwati ni yo ine na iwe ukweteko. Bushe uletontonkanya ukuti ukupika abantu muli uyo musango cisuma?”

Bulanda bulanda, Werner ayaswike ati: “Awe tacawama.”

Ba Waltraud batile, “Ee, ca cine tacawama.” Lyena bamwipwishe ati: “Bushe walishiba umulandu njishila mu kumutandalila na banoko cila mulungu? Ni pa mulandu wa kuti Inte sha kwa Yehova balafwaya ukwafwilisha abantu bambi ukuba no mutende na Lesa, e lyo na ku bena mupalamano babo.” Ba Waltraud balombele banyina kwa Werner ukuti bapoke kalya kafuti aleangasha kabili balisumine. Ba Waltraud baebele ulya mwaice ukuti: “Nga wampeela akafuti kobe, nkayakapoosa kabili nkakushitila motoka iimoneka kwati cimbayambaya iyakwata na mawilo yane.”

Awe e fyo Werner abapeele kalya kafuti. Ilyo papitile imilungu ine, aishilemona fye bamuletela ica kwangasha icipya. Bamupeele motoka iya mapulanga iyalemoneka kwati cimbayambaya kabili alitemenwe sana ilyo bamupeele.

Bushe na imwe mulalanshanya na bana benu ukwesha ukubafika pa mitima ica kuti bapoosa ne fya kwangasha ifyapala ifyanso fya nkondo? Nga mulecite fyo, ninshi mukabasambilisha isambilisho lisuma ilikabafwa pa myaka iingi mu bumi bwabo bonse.