Mulandu Nshi Lesa Apangile Calo?

MULANDU nshi mumfwila bwino ukutandala ku ncende ukwaba amaluba ayasuma kabili ayanunkila bwino? Ninshi mutemenwa nga mwamona bemba umukalamba nelyo impili ishitali ishayemba? Mulandu nshi mumfwila bwino ukukutika ku nyimbo shisuma isha fyuni? Kabili mulandu nshi tumfwila bwino ukutamba icipooma nelyo umumana uwapabuka?

Icasuko cimo fye. Ni co Lesa atupangile ukulaikala mu Paradaise. E mo abafyashi besu aba kubalilapo Adamu na Efa babalile ukwikala. Yehova Kabumba wabo abapangile ukwikala mu Paradaise, e mulandu wine na ifwe tufwaila ukwikala mu Paradaise. Yehova alishibe ukuti fwe bantunse kuti twatemwa ukwikala muli Paradaise, pantu atubumbile ukuti tuleipakisha ukwikala muli uyo mushi wayemba.

Mulandu nshi Yehova apangile icalo? ‘Abumbile calo ukwikalwamo’ na bantunse. (Esaya 45:18) “Uwapangile isonde” abikile Adamu na Efa muli paradaise wayemba, e kuti ibala lya Edeni. (Yeremia 10:12; Ukutendeka 2:7-9, 15, 21, 22) Bafwile balitemenwe sana ukumona imimana, amaluba, ne fimuti ifyalimo! Balemona uko ifyuni filepupuka mu lwelele, inama ishalekanalekana shileendauka mwi bala, kabili takwali nangu imo iyalesansa abantu. Isabi ne fibumbwa fimbi ifya mu menshi fyaleendauka mu menshi ayalengama. Icacililepo ubusuma ca kuti Adamu ali pamo na Efa. Bali no kufyala abana kabili ulu lupwa lwa nsansa ulwaleya lulekulilako lwali no kukusha Paradaise.

Nangu ca kuti isonde talyaba paradaise, lyaba kwati ni ng’anda umwikala ulupwa ulwa nsansa. Isonde ilyo Lesa atupeela lyalikwata fyonse ifyo tukabila, ulubuuto, ukukaba, amenshi, ne fya kulya. Ifyo tumfwa bwino ukumona ulubuuto no kumfwa icikabilila ififuma ku kasuba, pamo no lubuuto ulufuma ku mweshi nga wabalika ubushiku! (Ukutendeka 1:14-18) Mwi sonde mwaliba ifintu pamo nga amalasha na mafuta ifyo twingabomfya ilyo tulefwaya umulilo. Pa mulandu wa kushinguluka kwa menshi ayaba mu mimana, muli  babemba, na muli fibemba, tulakwata amenshi pano isonde. Kabili isonde lyalifimbwa bwino ne cani icalelema.

Nga filya fine ifya kulya fingasungwa mu ng’anda, isonde nalyo lyalikwata ifya kulya ifingi nga nshi. Apo Yehova ‘alitupeela inshita sha kutwala ifisabo, ukwisushamo imitima yesu ne ca kulya no kusangalala,’ tulakwata ifilyo ne fisabo ifingi nga nshi. (Imilimo 14:16, 17) Apantu isonde lisuma ukwikalamo na pali lelo, bushe cikaba shani ilyo “Lesa wa nsansa” Yehova akalenga isonde ukuba paradaise?—1 Timote 1:11.