Nomba Line Lesa ali no Kulenga Icalo Ukuba nga Fintu Afwaile pa Kubala

LINTU Adamu na Efa bali mu Paradaise, Lesa abapeele ili ifunde lya kuti: “Fyaleni, fuleni, kumaneni pe sonde no kulimapo; kabili mube na bukateka pe sabi lya muli bemba, na ku fyuni fya mu lwelele, na pa fya mweo fyonse ifikulika pe sonde.”—Ukutendeka 1:28, NW.

Ukulima isonde, takwalepilibula ukulima fye incende inono no kulaisakamana. Adamu na Efa na bana babo bali no kulaya balekusha ili bala ukufikila isonde lyonse lyaba Paradaise. Lelo, Adamu na Efa balibafumishe mwi bala lya Edeni pantu balibembwike. (Ukutendeka 3:23, 24) Nomba ici tacapilibwile ukuti isonde lyonse talyakabale alilimwa.

Apo Lesa akapaala abantu bacumfwila, kanshi bakalima isonde lyonse. Lintu Lesa apaalile abena Israele ba ku kale, amabala yabo yalefumya ifya kulya ifingi ne fisabo ifisuma sana. E fyo cikaba na lintu isonde lyonse likasanguka paradaise. Ifyo e fyo Icebo ca kwa Lesa icapuutwamo calaya, ukuti “icalo cikafumyo bulimi bwa ciko atupaala Lesa, Lesa wesu.” (Amalumbo 67:6) Impanga iyakwata ifyani ifiteku ne mpili, ifimuti, amaluba, imimana, na fibemba  fikasekelela. (Amalumbo 96:11-13; 98:7-9) Mwi sonde mukaba ifimenwa, ifyuni ifyabalabata, inama ishisuma, na bantu aba mitima isuma.

Isonde Lipya Likabako Nomba Line!

Nomba line fye isonde lipya ilyo Yehova Lesa alaya lili no kubako. Umutumwa Petro alembele ukuti: “Kuli imyulu ipya ne sonde lipya ifyo tulelolela umwabela ubulayo bwakwe, na muli fyene e mukekala ubulungami.” (2 Petro 3:13) Bamo pa numa ya kubelenga aya mashiwi ya kwa Petro, kuti batila awe lino isonde talyakabe paradaise. Nalimo kuti batontonkanya ukutila imyulu ne sonde ifyabapo bakafifumyapo no kupyanikapo fimbi ifipya. Bushe e fyo cikaba?

Bushe “imyulu ipya” cinshi? Te myulu iyo Lesa abumbile. (Amalumbo 19:1, 2) Petro alelanda pa “myulu” iya mampalanya, alelosha kuli bakateka ba buntunse abasansabala ukucila abatekwa babo. (2 Petro 3:10-12) Iyi “myulu” yalifilwa ukuteka bwino abantunse, e cikalenga ukuti ikonaulwe. (Yeremia 10:23; Daniele 2:44) “Imyulu ipya” iikapyana amabufumu ya bantunse, Bufumu bwa kwa Lesa. Yesu Kristu akaba Imfumu, pamo na bakateka banankwe ba144,000 ababuushiwa no kuya ku muulu.—Abena Roma 8:16, 17; Ukusokolola 5:9, 10; 14:1, 3.

“Isonde ilipya” ilyo Petro alelandapo te calo cimbi icipya iyo. Yehova apangile isonde ilyalinga fye abantu ukwikalamo ku ciyayaya. (Amalumbo 104:5) Inshita shimo Baibolo ibomfya ishiwi “isonde” ukulosha ku bantu. (Ukutendeka 11:1) Isonde ilikonaulwa nomba line, bantu ababipa ababa muli cino calo. E fyo cali na lintu kwali Ilyeshi mu nshiku sha kwa Noa, icalo, e kuti abantu abashipepa, calyonawilwe. (2 Petro 3:5-7) Nomba ninshi “isonde lipya” cinshi? Bekashi bapya, e kutila bakapepa ba cine aba kwa Lesa, “abatambalale mitima.” (Amalumbo 125:4; 1 Yohane 2:17) Amafunde yonse aye “sonde lipya” yakafuma ku “myulu ipya.” Abaume aba citetekelo pe sonde bakashininkisha ukuti aya mafunde yakonkwa.

Ifintu Ifipya Kabili Ifisuma!

Ukwabula no kutwishika Yehova alitupeele umushi uusuma ilyo abumbile isonde ukuti abantunse baleikalamo. Lintu Lesa abumbile isonde atile “naciwamisha.” (Ukutendeka 1:31) Satana Kaseebanya alengele Adamu na Efa ukupondokela Lesa. (Ukutendeka 3:1-5; Ukusokolola 12:9) Nangu cibe ifyo, nomba line fye Lesa akalenga abalungama ukuba no “bumi ubwine bwine,” icilepilibula “ubumi bwa muyayaya” mu bwikashi ubusuma nga nshi mu Paradaise. (1 Timote 6:12, 19) Lekeni nomba tulande pa mapaalo yamo yamo ayo abantunse bakaipakisha pali ilya nshita.

Ilyo Kristu akalateka pa Myaka Ikana limo, Satana takakwate amaka pa bantunse kabili takalete amacushi pali bena. Umutumwa Yohane alembele ukuti: “Namwene malaika aleika mu muulu ali no lufungulo lwa ku muyenge no munyololo ukalamba mu minwe yakwe. Kabili aikete icing’wena, icisoka ca pa kutendeka, e Kaseebanya kabili Satana, no kucikaka imyaka ikana limo (1,000). Kabili acipoosele mu muyenge no kwisalapo no kukakatikapo pa muulu wa ciko, ukuti ciilufya kabili inko mpaka imyaka ikana limo (1,000) ikapwe.” (Ukusokolola 20:1-3; 12:12) Abantunse tabakalubulwe fye ku kusonga kwa kwa Satana ilyo akaba mu cilindi ca ku mbo, lelo  bakaipakisha amapaalo na yambi ayengi ilyo Ubufumu bwa kwa Lesa bukalateka.

Ububifi, ulukaakala, ne nkondo tafyakabeko. Baibolo yalaya ukuti: “Pashala panono, e lyo umubifi takabepo; awe ukalolekesha apo ali, no kusanga tabapo: lelo abalanda bakapyaninine calo, no kuilemeno bwingi bwa mutende, abalungama bakapyaninine calo, no kwikalamo inshiku pe.” (Amalumbo 37:10, 11, 29) Yehova Lesa ‘akaputulo bulwi ukufika ku mpela ya calo.’ (Amalumbo 46:9) Kukaba umutende no mutelelwe. Ala kwena ubu bulayo ubusuma nga nshi!

Kukaba ifya kulya ifisuma ifingi nga nshi. Kemba wa malumbo aimbile ukuti: “Mube ukupaka kwa ngano mu calo, na pa muulu wa mpili fifukile.” (Amalumbo 72:16) Iyo nshita takwakabe uukalacululuka ku nsala.

Takwakabe uukalalwala. Ca cine “umwikashi wa mu calo takasose, ati, Nindwala.” (Esaya 33:24; 35:5, 6) Ilyo Yesu Kristu ali pe sonde, aliposeshe abalwala ifibashi, abalemana, na bapofula. (Mateo 9:35; Marko 1:40-42; Yohane 5:5-9) Taleni tontonkanyeni ifyo Yesu akacita mu calo cipya. Ala cikawama ukumona abapofula, bankomamatwi, abalemana, na bacibulu bapola!

Ilyo abantu bacumfwila bakalaya balepwililika, ificusha abakalamba fikapwa. Takwakabe ukubomfya amakalashi, inkonto, ifya kuseemenako, incinga sha kwendelapo abalemana, ifipatala ne miti. Awe mwandi ifintu fikaluka ilyo tukabwelela ku bulumendo na kabili! (Yobo 33:25) Lyonse tukalabuuka ukwabula ifya kukalipa, kabili tukalaba na maka aya kubomba imilimo ikalatuletela insansa.

Ukubuuka kwa batemwikwa besu na bantu bambi kukatuletela insansa sana. (Yohane 5:28, 29; Imilimo 24:15) Ifyo cikawama ukusengela Abele, Noa, Abrahamu, Sara, Yobo, Mose, Ruti, Davidi, Eliya, Estere, na bambi! Abantu abengi bakabuuka kabili abengi pali aba tabatalile abeshiba Yehova. Lelo, bakabasengela ku bantu abakaitemenwa ukubasambilisha pali Lesa, ifyo afwaya, e lyo na pali Yesu Kristu. Ilyo abakabuushiwa bakeshiba Kabumba wabo, ukwishiba Yehova kukafimba isonde lyonse.

Icacilapo ubusuma ca kuti tukalapepa Lesa wa cine eka fye ku ciyayaya. Tukaba ne shuko lya ‘kubombela Lesa mu nsansa,’ kabili tukabombela pamo mu kukuula amayanda ayasuma, ukulima umushili ukufikila tukalime isonde lyonse. (Amalumbo 100:1-3; Esaya 65:21-24) Ala cikawama ukwikala ku ciyayaya muli paradaise wayemba, uwafunda, umukaba umutende! Uyu paradaise akaleta umucinshi kwi shina lya kwa Yehova ilya mushilo.—Amalumbo 145:21; Yohane 17:3.

Ubwesho bwa Kulekelesha

Ilyo Yesu akalateka pa Myaka Ikana Limo, akabomfya ilambo lyakwe ukulubula abantunse bonse abacumfwila. Mu kupita kwa nshita ulubembu lonse lukafumapo kabili abantunse bakaba abapwililika. (1 Yohane 2:2; Ukusokolola 21:1-4) Ilyo ulubembu twapyana kuli Adamu lukafumishiwapo, abantu abapwililika bakalakonka ifipimo fya kwa Lesa fyonse. Kanshi ilyo abantu bakapwililika ‘bakaba aba mweo’ icine cine. (Ukusokolola 20:5) Ilyo ifi fikacitika, abantu abapwililika pamo  pene na Paradaise bakaleta ululumbi kuli Yehova!

Inshita fye inono pa numa ya kuteka kwa kwa Kristu ukwa myaka ikana limo, Satana ne fibanda fyakwe, nelyo bamalaika babipa, bakakakulwa ukufuma mu cilindi ca ku mbo umo bapooselwe pa myaka 1000. (Ukusokolola 20:1-3) Bakabasuminisha ukwesha ukufumya abantu kuli Lesa umuku wa kulekeleshako. Nangu cingatila bamo bakapondoka, te bonse bakafuma kuli Lesa. Lyena Yehova akonaula Satana ne fibanda fyakwe pamo na bakatemwa ukupondoka. Apa pene e pakapwila ububifi. Ababifi bonse bakonaulwa, tabakatale abamoneka na kabili. Lelo abalungama bena bakekalilila umuyayaya.—Ukusokolola 20:7-10.

Bushe Mukabako?

Abatemwa Yehova e bakaba aba nsansa ku ciyayaya. Ukwikala umuyayaya mu Paradaise takwakabe ukwa kutendusha. Na kuba, ubumi bukalawaminako fye, pantu abantu lyonse bakalasambilila ifipya pali Yehova. (Abena Roma 11:33) Lyonse fye kukalaba ifipya ifya kusambilila, kabili mukakwata inshita iikalamba iya kusambililamo ifintu. Mulandu nshi? Pantu tamwakekale fye imyaka 70 nelyo 80, lelo mukekala umuyayaya.—Amalumbo 22:26; 90:10; Lukala Milandu 3:11.

Nga mwalitemwa Lesa, mukalaba aba nsansa ukucita ifyo afwaya. Umutumwa Yohane alembele ukuti: “Uku e kutemwa Lesa, ukuti tubake amafunde yakwe; kabili amafunde yakwe tayaba cisendo.” (1 Yohane 5:3) E ico kanshi mwileka icili conse cimucilikile ukutemuna Yehova Lesa pa kucita icalungama. Lyonse muletontonkanya pe subilo lisuma ilyaba mu Cebo ca kwa Lesa Baibolo. Twalilileni ukucita ifyo Yehova afwaya, kabili te kwesha ukuleka ukucita ukufwaya kwakwe. Nga mwacite fyo mukabako ilyo Lesa akalenga icalo ukuba nga fintu afwaile pa kubala, ilyo isonde lyonse likaba paradaise ku ciyayaya.

[Icikope pe bula 4]

Ilyo Lesa apaalile abena Israele amabala yabo yalefumya ifya kulya ifingi

[Icikope pe bula 7]

Mapaalo nshi mufwaya ukwisaipakisha mu Paradaise?