“Ubulwi bwa kwa Yehova”
“Tufwile Ukunakila Lesa nga Kateeka Ukucila Ukunakila Abantu”
“Ubulwi bwa kwa Yehova”
ABAPELISHITI na bena Israele baima ukuti balwe, bakumanina pa mupokapoka. Abena Israele beminine uku lubali e lyo abaPelishiti nabo beminine kulya lubali. Pa nshiku 40 abena Israele bali no mwenso nga nshi, kabili Galyati umushilika wa baPelishiti uwakwatisha amaka akonkenyepo fye ukubasaalula.—1 Samwele 17:1-4, 16.
Ilyo Galyati alepumya abena Israele alebilikisha ati: ‘Saleni umuntu, no kuleka atentemukile kuli ine. Nga ali na maka ya kung’ansha, no kunjipaya, e lyo tuleba ababomfi benu; lelo nga ine ndemwansha, no kumwipaya, e lyo muleba ababomfi besu, muletubombela. . . . Ine ndeseebanye milalo ya kwa Israele ubwa lelo! Mpeeleni umuntu, muleke tulwe nankwe!’—1 Samwele 17:8-10.
Kale, calisekele abashilika babili abakwatishe amaka mu milalo iyalelwishanya ukwimininako imilalo yabo. Aba bashilika balekumana no kulwa ulubuli. Umulalo uwa mushilika uwacimfya umunankwe, ninshi e wacimfya. Lelo uyu mushilika uulepumya abena Israele taali nga bashilika bambi, ali ipaka umukali kabili uwa kutiinya. Galyati ali-iletelele pantu alepumya umulalo wa bantu ba kwa Yehova.
Ubulwi bwa baPelishiti na bena Israele tabuli bulwi ubwa bantunse fye, bulwi pa kati ka kwa Yehova ne milungu ya baPelishiti. Mu nshita ya kuti Shauli Imfumu ya bena Israele ashipe no kutungulula umulalo wakwe ku kulwisha abalwani ba kwa Lesa, ali no mwenso icine cine.—1 Samwele 17:11.
Umulumendo Acetekela Yehova
Ilyo iyi milalo iletiinana, umulumendo uwasubilwe ukuba imfumu mu Israele atandalila bamunyina abali abashilika mu mulalo wa kwa Shauli. Ishina lyakwe ni Davidi. Ilyo fye Davidi aumfwa ifyebo Galyati alelanda aipusha ukuti: ‘Nani umuPelishiti uyo uushasembululwa, apo aleseebanya imilalo ya kwa Lesa wa mweo?’ (1 Samwele 17:26) Davidi alemona ukuti Galyati aleimininako abaPelishiti ne milungu yabo. Davidi akalipa afwaya ukwimininako Lesa na bena Israele pa kulwisha ili paka. Lelo Imfumu Shauli yatila kuli wena: “Te kuti uye ku muPelishiti uyu ku kulwa nankwe; pantu uli mwaice.”—1 Samwele 17:33.
Ifyo Shauli aletontonkanya na fipusana ne fyo Davidi alemona ifintu. Shauli alemona fye Davidi nga kacema umwaice uulefwaya ukulwa ne paka. Lelo, Davidi alemona Galyati ngo muntu fye uulelwisha Shikulu Mulopwe Yehova. Davidi nakosa pantu acetekele ukuti Lesa te kuti aleke ishina Lyakwe na bantu Bakwe ukusaalulwa ku balwani bakwe ukwabula ukubakanda. Ilyo Galyati aleitakisha ukukwata amaka, Davidi wena acetekele muli Yehova, alishibe ukuti Lesa akamwafwa.
“Ine Naisa Kuli iwe mwi Shina lya kwa Yehova”
Davidi nashininkisha ukuti Lesa alemwafwa. Aibukisha uko Lesa amwafwile ukupususha impaanga shakwe kuli bere ne nkalamo. Uyu kacema wacaice nacetekela ukuti na uno muku Yehova ali no kumwafwa ukulwisha ili paka lya kutiinya. (1 Samwele 17:34-37) Pa kuya ku kulwa na Galyati Davidi asendele fye icisukushilo na mabwe yatelela yasano.
Umulumendo Davidi asalapo ukulwisha uyu mulwani, icintu icalemoneka icishingacitwa, lelo ashintilile pa maka ya kwa Yehova. Mu kushipa Davidi aeba umuPelishiti ukuti: “Waisa kuli ine no lupanga ne fumo na kafumo; lelo ine naisa kuli iwe mwi shina lya kwa Yehova wa milalo, Lesa wa milalo ya kwa Israele, uo waseebanya. Ubwa lelo Yehova alekupeela mu minwe yandi; na bonse aba mu calo baleishibo kuti mwaba Lesa muli Israele, no lukuta ulu lonse luleishibo kuti te ku lupanga kabili te kwi fumo Yehova atuulila; pantu ubulwi bwa kwa Yehova.”—1 Samwele 17:45-47.
Bushe ubulwi bwali shani? Baibolo itila: “Davidi anashishe umuPelishiti ku cisukushilo na ku libwe, aumo muPelishiti no kumwipaya; lelo ulupanga tamwali mu minwe ya kwa Davidi.” (1 Samwele 17:50) Takwete ulupanga, lelo Yehova Lesa alimwafwile. *
Ifyo Davidi atetekele Yehova ukuti ali no kumwafwa muli bulya bulwi fyalicitike. Ukwabula no kutwishika ilyo kwaba ukusalapo nampo nga kutiina abantu no kucetekela ukuti Yehova aletwafwa: “Tufwile ukunakila Lesa nga kateeka ukucila ukunakila abantu.” (Imilimo 5:29) Na kabili, nga twaishiba ifyo Yehova Lesa amona amafya, nangu yakule shani kuti twashipikisha.
[Amafutunoti]
^ para. 13 Moneni Kalenda wa Nte sha kwa Yehova uwa mu 2006 pa myeshi ya May na June.
[Akabokoshi ne Cikope pe bula 9]
BUSHE GALYATI AKULILE SHANI?
Ilyashi lyaba pali 1 Samwele 17:4-7 litweba ukuti Galyati alepele ukucila pali bamita batatu. Ica kucinga umubili ica mukuba ico Galyati alefwala e cilangisha ukuti ali ipaka kabili uwa maka. Cafinine bakilogramu 57. Umusako we fumo wali ngo mulando, kabili icilimi ce fumo cafinine bakilogramu 7. Cilemoneka kwati ifyanso fya kwa Galyati fyalifinine sana ukucila na fintu Davidi afinine.