“Umusumba Waibela uwa mu Galili”

AMAKILOMITA fye 6.5 lwa ku masamba ya Nasarete, itauni uko Yesu akuliile, kwali umusumba uushalandwapo mu Malandwe. Lelo, kalemba wa lyashi lya kale umuYuda, uwaishibikwa sana uwaliko mu mwanda wa mwaka uwa kubalilapo, Flavius Josephus, alumbenye uyu musumba ati “musumba waibela uwa mu Galili.” Uyu musumba wali ni Sepphoris. Finshi twaishiba pali uyu musumba?

Pa numa ya mfwa ya kwa Herode Mukalamba, napamo mu 1 B.C.E., abekashi ba mu Sepphoris bapondokele ubuteko bwa Roma, ne cafuminemo ca kuti umusumba wabo walyonawilwe. Antipa umwana wa kwa Herode atendeke ukuteka Galili na Perea kabili asalile palya pene apali Sepphoris waonawilwe ukuti e po alakuulila umusumba ukalamba uupya. Umusumba walikuulilwe cipya cipya ukukonka imikuulile ya baGriki na bena Roma, lelo abafulile muli uyu musumba bali baYuda. Profesa Richard A. Batey, ena atile, muli uyu musumba e mwaleikala “intungulushi sha buteko isha ku Galili na Perea,” mpaka fye lintu Antipa akuulile umusumba wa Tiberi muli ba 21 C.E. kabili waishileba e musumba ukalamba uwapyene pali Sepphoris. Iyi yali e nshita Yesu aleikala lwa mupepi no yu musumba.

Profesa James Strange, uwashulile fimo mu Sepphoris, asumino kuti uyu musumba walikwete uko balesungila ifyalembwa fya kale, ifyuma, ifyanso, amabanki, ifikuulwa e lyo na fimbi, pamo na bamaliketi uko baleshitishisha ifipe fya mabumba, amakalashi, ifyela, ifibeekobeeko, ne fya kulya fya misango misango. Kwali abalepikula na baleshitisha ifya kufwala, na matuuka umo baleshitisha amabasiketi, ifipe fya mu ng’anda ifyo balepanga, amafuta aya cena cisuma ne fya kushitisha ifyalekanalekana. Catunganishiwa ukuti abantu baleikala muli uyu musumba pali ilya nshita bali napamo 8,000 ukufika kuli 12,000.

Bushe Yesu alitalile ayapo kuli uyu musumba ukwalecitika sana amakwebo, uko umuntu engenda fye iawala limo ukufuma ku Nasarete? Amalandwe tayalandapo. Lelo, icitabo ca The Anchor Bible Dictionary citila, “inshila imo iyalungatika iya mu Galili ukufuma ku Nasarete ukuya ku Kana yapitile mu Sepphoris.” (Yohane 2:1; 4:46) Nga muli mu mupokapoka umwali umushi wa Nasarete, ulupili lwa Sepphoris lumoneka ulwasansuka ukufika kuli bamita 120. Bamo batila ilyo Yesu alandile icilangililo ca kuti “umusumba te kuti ufisame nga wabela pa muulu wa lupili,” afwile alelanda pali ulu lwine lupili.—Mateo 5:14.

Ilyo Yerusalemu aonawilwe mu 70 C.E., Sepphoris waishileba umusumba ukalamba uwa baYuda ba mu Galili kabili pa numa e mwaishilebela icilye ca Sanhedrini, icilye cikalamba ica baYuda. Pa nshita imo, cali e cifulo cikalamba ica baYuda ica masambililo ya ku sukulu.

[Mapu ne Cikope pe bula 32]

(Nga mulefwaya ukumona mapu ne cikope, moneni muli magazini)

Bemba wa Galili

GALILI

Kana

Tiberi

SEPPHORIS

Nasarete

PEREA

[Abatusuminishe Ukubomfya Icikope pe bula 32]

Ifipe fye bumba: Abashulile ni ba Wohl Archaeological Museum, Herodian Quarter, Jewish Quarter. Abene ni ba Company for the Reconstruction of the Jewish Quarter in the Old City of Jerusalem, Ltd