Amepusho Ukufuma ku Babelenga

Cinshi Yesu apilibwile ilyo aebele Nikodemo ukuti: “Takwaba umuntu uwanina ku muulu, kano uwaikile ukufuma ku muulu, Umwana wa muntu”?–Yohane 3:13.

Ilyo Yesu alelanda aya mashiwi ninshi acili pe sonde, kabili ninshi talati anine, nelyo ukubwelelamo ku muulu. Nangu cibe fyo, ifyo twaishiba pali Yesu ne co alandile aya mashiwi kuti fyalenga twaishiba ico apilibwile.

Yesu ‘aikile ukufuma ku muulu’ ni mu kutila intanshi ali mu mekalo ya mupashi pamo na Wishi, lelo pa nshita yalinga, ubumi bwa Mwana babukushishe mwi fumo lya kwa Maria, icalengele ukuti Yesu afyalwe ngo muntu. (Luka 1:30-35; Abena Galatia 4:4; AbaHebere 2:9, 14, 17) Pa numa ya mfwa yakwe, Yesu alibuukile nge cibumbwa ca mupashi kabili abwelele ku kwikala na Yehova na kabili. E mulandu wine, ilyo tabalamwipaya, Yesu apepele ukuti: “Tata, ncindamikeni pamo na imwe ku bukata ubo nakwete lintu nali pamo na imwe ilyo pano calo pashilabako.”—Yohane 17:5; Abena Roma 6:4, 9; AbaHebere 9:24; 1 Petro 3:18.

Ilyo Yesu alandile na Nikodemo, umu Farise kabili kafundisha mu Israele, ali talabwelelamo ku muulu. Kabili, takwali umuntu nangu umo uwafwile no kuya ku muulu ku bwikalo bwa fibumbwa fya mupashi. Yesu umwine alandile ukuti Yohane Kabatisha ali kasesema uwaibelele uwa kwa Lesa, lelo “uwacepesha mu bufumu bwa mu muulu mukalamba pali wene.” (Mateo 11:11) Kabili umutumwa Petro alondwelele ukuti nangu fye ni Mfumu ya cishinka Davidi alifwile, kabili ali fye mu nshiishi; Davidi taninine ukuya ku muulu. (Imilimo 2:29, 34) Pali icalengele ukuti Davidi, Yohane Kabatisha, na baume bambi aba citetekelo abafwile kale ilyo Yesu talaisa no kufwa, beya ku muulu. Pantu bonse bafwile lintu Yesu talaisula inshila nelyo ishuko ku bantu ilya kuya ku muulu nga bafwa. Umutumwa Paulo alembele pali Yesu, ukuti e solwesolwe ‘uwaiswilile . . . inshila ipya kabili iya bumi” mu muulu.—AbaHebere 6:19, 20; 9:24; 10:19, 20.

Apo Yesu ali talafwa no kubuuka, cinshi apilibwile ilyo asosele kuli Nikodemo ukuti: “Takwaba umuntu uwanina ku muulu, kano uwaikile ukufuma ku muulu, Umwana wa muntu”? (Yohane 3:13) Bebeteni ifyebo fyaba muli ico cipandwa, nelyo ifyo Yesu alandile ilyo alelanshanya na Nikodemo.

Ilyo ilya ntungulushi ya baYuda yaile kuli Yesu mu mfifi, Yesu atile kuli yena: “Ndekwebe cine cine, nati, Umuntu nga tafyelwe libili, te kuti amone ubufumu bwa kwa Lesa.” (Yohane 3:3) E lyo Nikodemo aipwishe ukuti, ‘Kuti nacita shani fyo? Bushe umuntu kuti afyalwa shani libili?’ Nikodemo afililwe ukwiluka ukusambilisha kwa kwa Lesa pa fyo umo engaba mu Bufumu bwa kwa Lesa. Nga kanshi ali no kusambilila shani pa kuti omfwe? Te muntunse fye uwali no kumusambilisha pa kuti omfwe; takwali umuntu nangu umo uwalingile ukumusambilisha pantu tapali umuntu uwabalile ayako ku muulu pa kuti engalondolola ifyo umo engaba mu Bufumu. Kano fye Yesu epela. Ena kuti asambilisha Nikodemo na bambi pantu afumine ku muulu kabili alishibe sana ukusambilisha abantu pa Bufumu bwa ku muulu.

Kanshi ilipusho pali ili lyashi lyatusambilisha ukumona ifyo cacindamina ukulasambilila Icebo ca kwa Lesa. Te kuti cibe bwino ukutendeka ukutwishika ifyebo ifyo twafilwa ukumfwikisha ilyo twabelenga pantu fye fyaumfwika ifyakosa. Ifyo Baibolo yalanda mwi lembo limo kuti fyaumfwika nga mwabelenga amalembo yambi kabili kuti mwamona no kuti na fipalana. Na kabili, nga twaishiba ifilelandwapo, e kutila ifyo cali ilyo balelemba nelyo ico ilyashi lilelandapo, kuti twaishiba no kumfwikisha ifyo fyebo.