Bushe Mulafisha Umwana Wenu Kuli TV?

LIMO limo, ukulafisha umwana ku kutamba TV kuti kwamonwa nge nshila iisuma iya kuleseshamo abana benu ilyo mulebomba imilimo. Bushe ukucita ifyo kuti kwalenga abana benu ukukula shani?

Inyunshipepala ya The New York Times yatila: “Nangu fye bana abanono ifyo baletamba pa TV kuti fyabakuma.” Mu kufwailisha kwaliko nomba line, abana abanono abali no mwaka umo balibalangishe amafilimu ayepi umo umwanakashi aleangasha ifilubi mu nshila shalekanalekana. Inyunshipepala yatila: “Lintu umwanakashi atiinine icilubi aleangasha, abana tabalefwaya ukutamba kabili balemoneka abafulwa, tabatemenwe, bali no mwenso kabili bambi balililile. Lilya umwanakashi aleangashe cilubi uku ninshi aleseka no kuseka, abana nabo balefwaisha ukwangala ne cilubi.”

Kanshi ifyo abana abanono batamba pa TV filabakuma. Nomba bushe kuti fyabakuma shani nga batwalilila ukulafitamba? Dokota Naoki Kataoka, profesa waishibisha ifya kundapa amalwele ya baice pa Kawasaki Medical College mu Kurashiki ku Japan, alimona abana abengi abakutumana sana kabili bamoneka abafulwa. Icalenga ukuti balemoneka ifyo ni co balitemwishishe ukutamba TV nelyo amavidio. Umwana uwa myaka ibili talelanda na bantu kabili alefilwa fye no kulanda ifyebo ifingi. Ilyo ali no mwaka umo aletamba amavidio ukutendeka ulucelo ukufika icungulo. Ilyo banyina bamuleseshe ukulatamba amavidio no kutendeka ukulayangala nankwe nge fyo dokota abebele, e lintu fye umwana atendeke ukulaishibilako amashiwi yambi. Calicindama abafyashi ukulayangala na bana babo.

Yehova Lesa Katendeka wa lupwa, alitusambilisha ifyo ukwangala kusuma kwacindamina. Ku kale aebele abantu bakwe ukuti: “Kabili mulefundisha abana benu [icebo ca kwa Lesa] no mukoosha, mulefisosa na pa kwikala mu mayanda yenu na pa kwenda mu nshila, kabili pa kulaala na pa kubuuka.” (Amalango 6:7) Ala TV te kuti isambilishe abana, bafyashi fye e bengabasambilisha ukupitila mu kulanda nabo nangu ukubabikila ica kumwenako, pa kuti ‘babe umo bafwile ukubela.’—Amapinda 22:6.