Isambililo pa Cilumba no Kuicefya

ICACITIKILE Imfumu Davidi cilanga ukuti ukuicefya kwine kwine kwalipusana ne cilumba cabipa. Ici cacitike pa numa lintu Davidi acimfishe umusumba wa Yerusalemu, kabili aupangile umusumba ukalamba. Davidi alemona Yehova nge Mfumu ya cine cine iya Israele, ici calengele ukutila alete Icipao icaleimininako ukubapo kwa kwa Lesa mu musumba. Ukuleta Icipao mu musumba kwalicindeme nga nshi kuli Davidi ica kuti ilyo alekonka bashimapepo abasendele Icipao, alangishe kuli bonse ukuti ali uwa nsansa nga nshi. Abaleikala mu Yerusalemu balimwene uko imfumu yabo ‘yaletolauka’ no ‘kucinda . . . na maka ya iko yonse.’—1 Imilandu 15:15, 16, 29; 2 Samwele 6:11-16.

Lelo, Mikali umukashi wa kwa Davidi taisanshishemo muli uku kusefya ukwaweme cibi, alelengela fye pa windo. Mu nshita ya kuti atemwe pa fyo Davidi alelumbanya Yehova, ‘alimusuulile mu mutima wakwe.’ (2 Samwele 6:16) Mulandu nshi Mikali asuulile Davidi? Ni co ayumfwile ukutila ali uwacindama sana pantu ali umwana wa kwa Shauli, imfumu ya kubalilapo iya mu Israele, e lyo na kabili ali umukashi wa mfumu ya bubili iya mu Israele. Nalimo ayumfwile ukuti umulume wakwe uwali mfumu talekabila ukuicefya sana, ukuicita kwati bantu yaweyawe fye. Kabili amwene ukuti imfumu tayalekabila ukusefya pamo na bantu yaweyawe mu nshila iyalengele ukuti imoneke iyasuulwa. Icilumba cakwe camonekele mu fyo apooseshe Davidi lintu abwelele ku ng’anda. Misuula misuula atile: “Ifyo yaicindamika lelo imfumu ya kwa Israele ilyo yacilafuula lelo ku menso ya babomfi ba iko abanakashi, ifyo umo uwa mu bawelewele aifuula umubili onse!”—2 Samwele 6:20, NW.

Cinshi Davidi acitile ilyo bamwebawile fyo? Davidi alikalipile Mikali, amwebele ukuti Yehova alikeene wishi Shauli no kutemwa wena. Davidi alandile no kuti: “Nkailenga ukusuulwa ukucila na pano, kabili nalailenga uwa fye mu menso yandi; kabili na kuli bacishiko abo ulumbwile, nalaicindamikila mu menso yabo.”—2 Samwele 6:21, 22, NW.

Ca cine, Davidi alipampamine pa kulabombela Yehova mu kuicefya. Ukuicefya kwa kwa Davidi kulenga twaumfwikisha umulandu Yehova aleitila Davidi ukuti “umuntu uwapokelelwa no mutima wandi.” (Imilimo 13:22, NW; 1 Samwele 13:14) Na kuba Davidi alepashanya Yehova Lesa, uwaba ica kumwenako cisuma nga nshi mu kuicefya. Amashiwi Davidi abomfeshe ilyo alandile kuli Mikali aya kuti “nkailenga ukusuulwa” yafuma kwi ishiwi lya ciHebere ilibomfiwa na ku kulondolola ifyo Lesa amona abantu. Nangu cingatila Yehova e wapulishamo mu kubumbwa konse, Amalumbo 113:6, 7 [NW] yamulondolola ukuti “alaicefya [ukuibwesha pa nshi ukulingana no muntu yaweyawe nelyo ukuicefya pa kubomba na bantuuntu fye] pa kulolesha pa myulu na pe sonde, ku kwimya umulanda mu lukungu; asumbulo mubusu ukufuma pa cishala.”

Apo Yehova aliicefya, e umulandu wine kanshi apatila “amenso ayaisansabika” aya bantu bacilumba. (Amapinda 6:16, 17) Pa mulandu wa kuba uwa cilumba no kukanacindika uo Lesa asalile ukuba imfumu, Mikali balimutanine ishuko lya kufyalila Davidi umwana. Afwile ukwabula ukufyalapo umwana. Ili lisambililo ilyacindama nga nshi kuli ifwe! Bonse abalefwaya ukuti Lesa alebapaala bafwile ukukonka aya mashiwi ayatila: “Ikakeni ubupete mu misana ku kupyungilana, pantu Lesa acincintila aba matutumuko, lelo apeela icikuuku ca bupe fye ku baiceefya.”—1 Petro 5:5.