Ukwabula no Kutwishika, Kuti Mwaba ne Nsansa

LIMO limo cilafya ukusanga insansa sha cine cine ishibelelela. No mulandu cafisha wa kuti ilyo abengi bafwaya insansa tabaya uko bengashisanga. Nani wingabalanga uko bengasanga insansa?

Baibolo, e ingatulanga uko twingasanga insansa sha cine cine ishibelelela. Natulande pe buuku fye limo ilya mu Baibolo, ne li libuuku lya Amalumbo. Mu Amalumbo mwaba inyimbo 150 isha mushilo isha kulumbanya Yehova Lesa. Imfumu Davidi iya mu Israele wa ku kale e yaimbile mupepi na hafu wa ishi nyimbo. Lelo, icacila pa kwishiba uwaimbile ishi nyimbo, kwishiba ukuti Cibusa musuma uwa bantunse Yehova e wapuutilemo umupashi wakwe ukuti ili buuku lilembwe. Ukwabula no kutwishika kanshi kuti twatila mu Baibolo e mwaba ubutungulushi bwa kwa Yehova ubusuma, kabili ilatweba uko twingasanga insansa.

Abalembele Amalumbo balishininwe ukuti umuntu kuti akwata fye nsansa nga aba cibusa wa cine cine uwa kwa Lesa. Kemba wa malumbo alembele ukuti: “Alishuko muntu uuli na katiina kuli Yehova.” (Amalumbo 112:1) Bucibusa na bantunse banensu, ukukwata icuma, no kusambilila sana te kuti filete nsansa tukwata nga twaba pa “bantu abo Yehova e Lesa wabo.” (Amalumbo 144:15) Ne cilanga ukuti ici twalandapo ca cine, fya kumwenako fya babomfi ba kwa Lesa abengi aba muno nshiku.

BaSusanne abali ne myaka ukucila pali 40, baliba ne nsansa. * Batile: “Pali lelo abantu abengi balingila mu tubungwe tumo ku kufwaya ukucita ifyo bafwaisha ukuti ficitwe. Lelo nangu cibe fyo, te bonse abo baba nabo mu tubungwe ababa fibusa fyabo. Abantu ba kwa Yehova bena balipusanako. Ukutemwa Yehova kulatulenga ukuti tutemwane. Nga tuli pa  bantu ba kwa Lesa, tulangukililwa, te mulandu na kuntu twingaba. Uku kwikatana kulalenga ukuti tube ne nsansa icine cine. Bantu ba kwa Yehova e pela e bengasosa ukuti baliba ifibusa na bantu abapiina, abacuma, aba nkulilo shapusanapusana, e lyo na bantu abafuma mu fyalo fyalekanalekana. Ndesosa ukufuma pa ya mutima wandi ukutila, ukuba pa bantu ba kwa Yehova kulaleta insansa.”

BaMaree abafyalilwe mu Scotland, nabo baishilesanga ukuti ukuba cibusa musuma uwa kwa Yehova kulafwaikwa sana pa kuti umo abe ne nsansa. Bashimika abati: “Ilyo nshilasambilila icine icaba mu Baibolo, nalitemenwe sana ukutamba amafilimu ayatiinya. Ubushiku nshalelala ukufikila naikata umusalaba pantu naletontonkanya ukuti umusalaba kuti watamfya ifibanda ifyaleba mu mafilimu ayengi ayo naletamba. Ilyo nasambilile cine, no kuleka ukutamba amafilimu ya musango yo, bucibusa bwandi na Yehova bwalengele ukuti ndesendama bwino ukwabula ukumfwa umwenso, kabili naliba uwa nsansa ukuti ndebombela Lesa uwakwatisha maka ukucila pa fibanda.”

Ukucetekela Yehova Kuti Kwamulenga Ukuba ne Nsansa

Tatufwile ukutwishika amaka na mano yapulishamo aya kwa Kabumba. Davidi alicetekele Yehova sana, kabili alishibe ukuti ali no kumucingilila, e ico alembele ukuti: “Alishuko muntu uwacita Yehova ukube ca kutetekelako cakwe.”—Amalumbo 40:4.

BaMaria batile: “Ifyo napitamo mu Spain no kuli konse kumbi, filanga ukuti nga twacita ifintu ukulingana ne fyo Yehova afwaya, nangu cingatila tuleyumfwa ukutila tufwile ukucite fyo fintu mu nshila imbi, nga twakonka inshila yakwe, lyonse mulafuma ifisuma. Ici cilalenga twaba ne nsansa pantu lyonse inshila ya kwa Yehova e yawamisha.”

BaAndrea ni baeluda mu cilonganino ica Nte sha kwa Yehova. Balibomba mu fyalo ifingi mu Bulaya, kabili ukulingana ne fyo bapitamo, balishiba ukuti tufwile ukucetekela Yehova. Basosa ukuti: “Umukalamba wandi u o tatupepa nankwe, alinkoseleshe sana ilyo twali abaice ukucita kosi mu ncito iipela amalipilo ayengi. Tatemenwe ilyo natendeke umulimo wa kulashimikila inshita iikalamba, no kukanafwaya ukubomba incito iya malipilo ya pa muulu. Ilyo momba uyu mulimo wa kushimikila, nshatalabulisha ifyo nkabila, kabili naliipakisha amapaalo ayo abengi bafwaisha ukuipakisha.”

Mu 1993, baFelix balibetile ku kuyaafwa mu bukuule bwa kulundako amaofesi ya Nte sha kwa Yehova mu Selters mu Germany. Ilyo mulimo wapwile, balibetile ukulabombela palya pene pa maofesi ya Nte sha kwa Yehova. Bushe  bacitile shani? Batila: “Nangu ca kuti nalisumine naletwishika. Lelo nomba naliba pano imyaka mupepi ne 10, kabili nalishinkisha ukuti Yehova alyaswike amapepo yandi, kabili alishiba ifingangwamina. Ukucetekela Yehova mupwilapo, no kumusuminisha ukulantungulula, kwalilenga ukuti Yehova alenanga ico alefwaya ukuti ncite.”

BaSusanne, abo tulumbwile kale, balefwaya ukuba ba painiya, umulimo wa kulashimikila fye imbila nsuma, lelo ukusanga incito ya kuti balebombako fye amaawala ayanono kwalyafishe. Pa numa yakulolela umwaka umo ukwabula incito, tabatwishike ukuti Yehova ali no kubafwa. Bashimike ukuti: “Nalitumine formu ya kwipushishapo bupainiya, kabili nalisungile ne ndalama sha kubomfya pa mweshi uuntuntulu. Uyu mweshi waliweme icine cine. Umulimo wa kushimikila walindetele insansa sana, lelo konse uko banjitile ku fya ncito tafyaendele bwino. Nangu cibe ifyo nga fintu Yehova alaile, alingafwile. Pa bushiku bwa kulekeleshako mu mweshi, nalisangile incito. Nomba nalilwike ukuti cine cine mfwile ukucetekela Yehova. Ifi fintu napitilemo ilyo natendeke fye ukulashimikila inshita iikalamba, fyalinenga ukuba ne nsansa.”

Ukumfwila Ifyo Lesa Atufunda na ko Kulaleta Insansa

Imfumu Davidi yalicitile ifilubo ifyabipisha. Limo limo yalekabila ukuifunda. Bushe na ifwe tulomfwila ukufunda no kusambilisha nga fintu Davidi ali?

BaAida abekala ku France inshita imo bailwike ukuti nabacita icilubo icikalamba sana. Bashimika ukuti: “Ico nalefwaya sana kuba cibusa wa kwa Yehova na kabili, e cintu naletontonkanyapo fye lyonse.” Baile kuli baeluda ba mu cilonganino ukuti babafwe. Apo nababomba imyaka 14 mu mulimo wa nshita yonse, batila: “Cilandetela insansa ukwishiba ukuti Yehova alinjelela pa fyo nacitile.”

Ukupokelela ukufunda ukufuma mu cebo ca kwa Lesa kuti kwatulenga ukukanacita icilubo. BaJudith balondolola ukuti: “Ilyo nali ne myaka 20, nalitemenwe sana umwaume twalebomba nankwe, ali umwina Germany, alyeseshe sana na maka ukunsekesha mu fyo alencitila. Abantu balimucindike, alebomba incito ya pa muulu, kabili alikwete no mukashi. Naishileiluka ukuti mfwile ukusalapo pa kumfwila amafunde ya kwa Yehova nelyo ukukanaumfwila amafunde Yakwe. Naebeleko abafyashi bandi. Pa kunjibukisha ifyo Yehova afwaya ukuti ncite, batata tabapitile mu mbali. Banjebele mu kulungatika ifyo nalekabila ukucita. Nangu cali fyo nalefwaya umwa kulesesha pa kuti cimoneka kwati ndepula mu fipope fya kwa Lesa. Pa nshita iitali bamayo lyonse icungulo balelanda na ine pa fyo amafunde ya kwa Lesa yacindama na pa fyo yabakilila ubumi. Ndatasha ukuti mukupelako nalipingwilepo ukukonka amafunde ya kwa Yehova. Ukusalapulwa no kufundwa na Yehova kwalindetela insansa ishine shine, kwalinenga ukubomba imyaka iingi mu mulimo wa nshita yonse kabili kwalinenga ukusanga umulume umusuma, Umwina Kristu uwantemwa kabili uwatemwa Yehova no mutima wakwe onse.”

Ca cine, ifya kumwenako fya musango yo filanga ifyo amashiwi Davidi alandile yaba aya cine kabili ayacindama, ayatila: “Iye, kushuka kwa muntu uo bwalekelelwo bupulumushi bwakwe, uo lwafimbwapo ulubembu lwakwe! Iye, kushuka kwa muntu uo Yehova tamulingila mampuulu.”—Amalumbo 32:1, 2.

Ukwafwa Bambi Kulaleta Insansa

Davidi alembele ukuti: “Alipaalwa onse uwafwilisha umupiina.” Kabili atwalilile ukusosa ukuti: “Mu bushiku bwa bubi Yehova akamupususha. Yehova akamulinda no kumupususha. Akebwa ukuti alipaalwa.” (Amalumbo 41:1, 2 NW) Ifyo Davidi aafwile Mefiboshete uwalemana, umwana wa kwa cibusa wakwe uwatemwikwa Yonatani, fyaba ca kumwenako cisuma pa fyo twingafwa abalanda.—2 Samwele 9:1-13.

BaMarlies ababomba umulimo wa bumishonari pa myaka 47, balashimikila abantu ababutuka ukufuma mu fyalo ifyabamo amasanso mu Afrika, mu Asia, na mu Bulaya. Bashimika abati: “Aba bantu balikwata amafya ayalekanalekana, bamona kwati tababapokelela bwino, kabili bayumfwa  no kuti balabacishanya. Ukwafwa abantu ba musango yo kulaleta insansa.”

BaMarina abali ne myaka ukucila pali 40, balembele ukuti: “Ukuba umushimbe, kwalinenga ukwishiba ifyo cumfwika ilyo bambi bakwafwa. Ne ci calinenga ukulakoselesha bambi pali foni nelyo ukubalembela amakalata. Abengi balatasha pa fyo mbacitila. Ukwafwa bambi kulanenga ukuba ne insansa.”

BaDimitar abali ne myaka ukucila pali 20, batile: “Bamayo bankushishe fye beka. Ilyo nali umwaice, nali uwa nsansa ukukwata kangalila we Sambililo lya Citabo uwalensenda cila mulungu ukulansambilisha ifya kushimikila. Na ino nshita ndatasha sana pa mute akwete. Nalishiba ukuti tacayangwike ukuncincisha ukubomba umulimo.” Pa kulanga ukutasha pa fyo babafwile, ino nshita baDimitar balafwa bambi. Batila: “Ndeesha ukubombako no mwaice nangu umukalamba mu mulimo wa kushimikila umuku umo cila mweshi.”

Ibuuku lya Amalumbo lilanda pa fintu fimbi ifilenga umo ukuba uwa nsansa. Cimo icacindama kushintilila pali Yehova ukucila pa maka yesu. Baibolo itila: “Balishuka abantu abo ubukose bwabo buli muli [Yehova].”—Amalumbo 84:5.

BaCorinna balatushimikila ifyo ico cipilibula. Baselele ku calo ukwalefwaikwa sana aba kushimikila. Bashimika abati: “Nali no kusambilila ululimi ulupya, intambi ishipya, no ukulatontonkanya nga bantu bakulya kwine. Naleyumfwa fye kwati katwishi uko nali. Naleumfwa umwenso nga ukushimikila mu cifulo iceni. Naipwishe Yehova ukunjafwa, cali ni ku bukose bwakwe e ko nakwanishe ukushimikila akasuba konse mu cifulo iceni. Mu kupita kwa nshita, ukushimikila kwali ukwayanguka. Natendeke ukusambilisha abantu abengi Baibolo, kabili ncili ndeipakisha ukubomba umulimo wa kushimikila. Nasambilile ukuti mu bukose bwa kwa Yehova kuti twacimfya ifintu ifyo tulemona kwati te kuti tuficimfye.”

Ca cine, ifintu pamo ngo kuba cibusa wa kwa Lesa na bantu bakwe, ukucetekela muli Yehova umupwilapo, ukupokelela ukufunda, no kwafwa bambi kuti fyalenga umo ukuba ne nsansa. Ukulaenda mu nshila sha kwa Yehova no kulaumfwila amafunde yakwe, kuti kwalenga twapokelela amapaalo ukufuma kuli Lesa kabili kuti twaba ne nsansa.—Amalumbo 89:15; 106:3; 112:1; 128:1, 2.

[Futunoti]

[Icikope pe bula 12]

BaMaria

[Icikope pe bula 13]

BaMaree

[Icikope pe bula 13]

BaSusanne na baAndreas

[Icikope pe bula 15]

BaCorinna

[Icikope pe bula 15]

BaDimitar