Bafyalilwe mu Luko Lwasalwa na Lesa

“Yehova Lesa wenu amusala ku kuba abantu bakwe abaibela.”—AMALANGO 7:6.

1, 2. Ni finshi ifya lulumbi ifyo Yehova acitiile abantu bakwe, kabili cinshi cacitike ilyo tapalakokola ukufuma apo abena Israele bafumiine mu Egupti?

MU 1513 B.C.E., Yehova apangene na bantu bakwe abena Israele icipangano caibela. E mwaka Yehova aseebenye ubuteko bwakwatishe amaka mu calo conse no kufumya abena Israele mu busha. Ilyo acitile fyo, aishileba Umulubushi wabo, na bo baishileba abantu bakwe. Ilyo talafumya abena Israele mu busha, Lesa aebele Mose ati: “Ukatile ku bana ba kwa Israele, Nine Yehova, nkamufumya mu kutwikwe fisendo fya bena Egupti, nkamupokolola na mu busha bwabo, no kumulubula ku kuboko kwatambikwa kabili ku fya bupingushi fikalamba; kabili nkamubuula ku kuba abantu bandi, no kuba Lesa wenu.”—Ukufuma 6:6, 7; 15:1-7, 11.

² Ilyo tapalakokola ukufuma apo bafumine mu Egupti, abena Israele bapangene icipangano na Lesa wabo Yehova. Ukufuma palya pene, Lesa nomba alikwete uluko lwa bantu bakwe pano calo, alilekele ukumfwana no muntu umo fye atemwa ulupwa lumo nelyo umukowa, nge fyo cali kale. (Ukufuma 19:5, 6; 24:7) Abapeele amafunde ya kulakonka mu mikalile yabo, ne cacindeme sana ca kuti, abapeele amafunde ya kukonka pa kumupepa. Mose abebele ukuti: “Luko nshi lukalamba ululi no mulungu mupepi no ko luli, ifyo Yehova Lesa wesu aba ilyo lyonse tulila kuli wene? Kabili luko nshi lukalamba ululi ne fipope ne fya bupingushi ifyalungama nga amalango aya yonse, ayo ndebika ku cinso cenu lelo?”—Amalango 4:7, 8.

Bafyalilwe mu Luko lwa Nte sha kwa Lesa

3, 4. Mulandu nshi uwacindama uo Yehova asalile abena Israele ukuba uluko lwakwe?

³ Ilyo papitile imyake ingi, ukupitila muli kasesema wakwe Esaya, Yehova acinkwileko abena Israele umulandu wacindama uwalengele ukuti abasale ukuba uluko lwakwe. Esaya atile: “E fyo asosa Yehova, Kalenga obe, we Yakobo, Kabumba obe, we Israele: Witiina, pantu nakulubula, nakwita mwi shina lyobe, uli wandi. Pantu ine Yehova, ndi Lesa obe, ne Wa mushilo wa kwa Israele ndi Mupusushi obe; . . . leta abana bandi abaume ukutulo kutali, na bana bandi abanakashi ukutula ku mpela sha pano isonde, onse uwainikwe shina lyandi, uo nalengeele ubukata bwandi, uo nabumbile, cene, nalimucitile. Imwe muli nte shandi, cisemo ca kwa Yehova, kabili muli babomfi bandi abo nasala, . . . abantu abo naibumbiile ku kuleka balondolole ukuntasha.”—Esaya 43:1, 3, 6, 7, 10, 21.

⁴ Apo baleitilwa kwi shina lya kwa Yehova, abena Israele bali no kuba Inte shakwe, aba kulondolwela abantu ba mu fyalo fimbi ukuti Yehova e walinga ukuteka abantu bonse. Bali no kuba bantu ‘abalengeelwe ubukata bwa kwa Yehova.’ Bali no ‘kulondolola ubukata bwa kwa  Yehova,’ e kuti ukushimikila abantu ifintu fya lulumbi ifyo abacitiile pa kubalubula kabili ukucite fyo kwali no kuleta ubukata kuli Yehova uwa mushilo. Kanshi abena Israele bali no kuba Inte sha kwa Yehova.

5. Cinshi twingalandilo kuti abena Israele bali luko lwaipeela kuli Lesa?

⁵ Muli ba 1000 B.C.E., Imfumu Solomone yalandile fimo ifilanga ukuti Yehova alisalile abena Israele ukuba uluko lwaibela. Solomone mwi pepo lyakwe kuli Yehova, atile: “Pantu imwe mwalibapaatwile ku kuba kuli imwe icikwatwa, ukubafumya mu bantu na bantu bonse aba pano isonde.” (1 Ishamfumu 8:53) Umwina Israele umo umo na o wine aali muntu waibela uwa kwa Yehova. Pa kutendeka fye, Mose aebele abena Israele ukuti: “Muli bana baume ba kwa Yehova Lesa wenu: . . . pantu muli bantu ba mushilo kuli Yehova Lesa wenu.” (Amalango 14:1, 2) Kanshi, abana ba bena Israele tabaali na kuipeela kuli Yehova. Bafyalilwe mu luko lwa bantu baipeela kale kuli Lesa. (Amalumbo 79:13; 95:7) Abana bonse abalefyalwa balebapeela amafunde ya kwa Yehova kabili wali mulimo wabo ukuyakonka pantu balipangene kale na Yehova ukuti bakalakonka amafunde yakwe.—Amalango 11:18, 19.

Balikwete Insambu ya Kusala

6. Cinshi umwina Israele onse aali no kusala umwine?

⁶ Nangu ca kutila abena Israele bafyalilwe mu luko lwaipeela, umuntu onse aali no kuipingwila umwine nga alefwaya ukubombela Lesa nelyo iyo. Ilyo bashilaingila mu Calo ca Bulayo, Mose abebele ati: “Nalenga umuulu ne calo ukube nte pali imwe lelo, ukuti nimbika ku cinso cenu umweo ne mfwa, ipaalo ne citiipu: e ico saleni umweo, ku kuleka mube no mweo, imwe no bufyashi bwenu, ku kutemwa Yehova Lesa wenu, ku kuumfwa kwi shiwi lyakwe, no kulambatila kuli wene; pantu e mweo wenu kabili e kutantalila kwa nshiku shenu, ku kuleka mwikale mu mpanga iyo Yehova alapile kuli bashinwe, kuli Abrahamu, kuli Isaki, na kuli Yakobo, ukubapeela.” (Amalango 30:19, 20) E ico kanshi, umwina Israele onse fye alikwete insambu ya kusala ukutemwa Yehova, ukuumfwa kwi shiwi lyakwe, no kulambatila kuli ena. Apo abena Israele balikwete insambu sha kusala, ifyali no kufuma mu kusala kwabo fyali no kuwamina umuntu nelyo ukumubipila ukulingana ne fyo umwine asalile ukucita.—Amalango 30:16-18.

7. Finshi fyacitike mu Israele ilyo aba mu nkulo ya kwa Yoshua bonse bafwile?

⁷ Ifyalecitika mu nshiku sha Bapingushi mu Israele filalenga twamona bwino sana ukuti abasalile ukuba aba cishinka calibawamine, nomba abasalile ukucita ifyabipa bena tacabawamine iyo. Ilyo inshiku sha Bapingushi tashilaisa, abena Israele balepashanya ica kumwenako cisuma ica kwa Yoshua kabili balipaalilwe. “Abantu babombeele Yehova inshiku shonse sha kwa Yoshua kabili inshiku shonse sha bakalamba abashele pa numa ya mfwa ya kwa Yoshua, abamwene umulimo onse uukalamba wa kwa Yehova uo acitile kuli Israele.” Na lyo line, ilyo Yoshua afwile, “kwaimine inkulo imbi iyakonkelepo iishaishibe Yehova, nangu mulimo wine uo acitile kuli Israele. Kabili abana ba kwa Israele bacitile icabipa mu menso ya kwa Yehova.” (Abapingushi 2:7, 10, 11) Abantu ba mu nkulo ipya abashali abakalamba sana bafwile balisuulile icipangano Lesa apangene na bena Israele ukuti bali bantu baipeela kuli wena, bafwile balilabile no kutila kale Yehova Lesa wabo alibacitiile ifintu fya lulumbi.—Amalumbo 78:3-7, 10, 11.

Ukulakonka Ifyo Balaile Ukuti Bakalacita

8, 9. (a) Finshi Yehova aebele abena Israele ukulacita ifyali no kulanga ukuti bali-ipeela kuli ena? (b) Bushe abalepeela ubupe bwa kuitemenwa kuli Lesa balemwenamo shani?

⁸ Yehova alyebele uluko lwa bantu bakwe ukulacita fimo ifyali no kulanga ukuti bali-ipeela kuli ena. Cimo ico acitile, abikileko Amafunde ayalandile ukuti bafwile ukulatuula amalambo ne fya bupe, fimo alibebele icipimo no musango wa fyo umuntu onse alingile ukupeela, e lyo fimbi abebele ukuti umuntu  umwine kuti aitemenwa ukupeela umo akwatile. (AbaHebere 8:3) Pa fya bupe fya musango yo pali amalambo ayo baleocela pa ciipailo, kwali no kutuula ubuunga na malambo ya mutende ayali ya kuitemenwa fye. Ifi fya bupe fyonse balepeela kuli Yehova pa kuti alebapaala e lyo na pa kumutootela.—Ubwina Lebi 7:11-13.

⁹ Amalambo ya musango yo aya kuitemenwa yalesekesha Yehova. Baibolo ilanda pa malambo ya nama ne fya buunga ifyo baleocela pa ciipailo ukuti yali aya “mununko wa kutontolola kuli Yehova.” (Ubwina Lebi 1:9; 2:2) Pa kupeela ilambo lya fya mutende, umulopa wa nama na mafuta ya iko fyalepeelwa kuli Yehova, e lyo bashimapepo pamo no ulepeela balelya imipusa imo iya iyo nama. Kanshi caleba kwati baleliila pamo na Yehova, kabili ico cali cilangililo ca kuti umwina Israele uulepeela ilambo ni cibusa wa kwa Yehova. Amafunde yatile: “Kabili nga mwaipaile lambo lya fya mutende kuli Yehova, mukaliipaye ukuti mukapokelelwe.” (Ubwina Lebi 19:5) Ca cine ukutila abena Israele bonse balefyalilwa mu luko lwaipeela kale kuli Yehova, lelo abalepeela ubupe bwa kuitemenwa ubwa kulanga ukuti bali-ipeela, e ‘balepokelelwa’ kuli Lesa kabili alebapaala.—Malaki 3:10.

10. Bushe Yehova alangile shani ukuti tatemenwe amalambo ya bena Israele mu nshiku sha kwa Esaya na Malaki?

¹⁰ Nomba, ilingi line uluko lwaipeela ulwa bena Israele talwaleba na cishinka kuli Yehova. Ukupitila muli kasesema wakwe Esaya, Yehova aebele abena Israele ukuti: “Tauleta kuli ine isha mu mukuni, ifya kuninika fyobe, nangu kuncindikila ku malambo yobe. Nshakulengele ukumombela ku ca buunga.” (Esaya 43:23) Na kabili, amalambo ya kupatikishiwa yena tayacindeme kuli Yehova. Cimo ico twingeshibilako, ilyo papitile imyaka nakalimo 300 ukufuma mu nshiku sha kwa Esaya, e kutila mu nshiku sha kwa kasesema Malaki, abena Israele balepeela amalambo ya nama ishalemana. E co Malaki abebele ukuti: “Nshibekelwa muli imwe, e fyo Yehova wa milalo asosa, ne ca bupe ca mu minwe yenu nshapokelele; . . . Mulete mpofu ne isunkuta ne yalwala; e sho mulete ca bupe. Bushe ine mpokelele ico mu minwe yenu? e fyo Yehova asosa.”—Malaki 1:10, 13; Amose 5:22.

 Lesa Akaana Uluko Ulwaipeele Kuli Ena

11. Lishuko nshi Lesa apeele abena Israele?

¹¹ Pa kutendeka fye ilyo abena Israele baishileba uluko lwaipeela kuli Yehova, abalaile ukuti: “Ukuumfwa nga mwakulaumfwe shiwi lyandi, no kubake cipope candi, ninshi mwakulaba kuli ine icikwatwa icaibela mu bantu na bantu bonse (pantu icalo conse candi): na imwe mwakulaba kuli ine ubufumu bwa bashimapepo kabili uluko lwa mushilo.” (Ukufuma 19:5, 6) Mesia uo babalaile aali no kwisa mu Israele kabili e bo aali no kubalilapo ukwita ukuti bakabe mu Bufumu bwa kwa Lesa. (Ukutendeka 22:17, 18; 49:10; 2 Samwele 7:12, 16; Luka 1:31-33; Abena Roma 9:4, 5) Lelo abena Israele abengi tabakonkele ifyo bapangene na Lesa ilyo baipeele kuli ena. (Mateo 22:14) Balikeene Mesia, na pa kulekelesha balimwipeye.—Imilimo 7:51-53.

12. Mashiwi nshi Yesu alandile ayalanga ukuti Yehova alikeene abena Israele abali uluko lwakwe ulwaipeela?

¹² Ilyo kwashele inshiku shinono isha kuti Yesu alafwa, aebele bashimapepo abaYuda ukuti: “Bushe tamwabelenga mu Malembo ukuti, ‘Ilibwe ilyo bakakuula bakeene lyaisaba ilibwe lya pa cifutu. Ni kuli Yehova e kwafuma ici, kabili ca kusungusha mu menso yesu’? E mulandu wine ndemwebela nati, Ubufumu bwa kwa Lesa bukapokwa kuli imwe no kupeelwa ku luko ulutwale fisabo fya buko.” (Mateo 21:42, 43) Pa kubebela mu mano ukuti Yehova alibakeene nangu ca kuti bali e luko lwaipeela kuli ena, Yesu atile: “We Yerusalemu, we Yerusalemu, we wipaya bakasesema no kupoola amabwe abatumwa kuli iwe,—ifyo imiku iingi nafwaile ukulonganika abana bobe, filya nankoko afukatila utwana twakwe mu mapindo yakwe! Lelo imwe tamwalefwaya. Moneni! Ing’anda yenu yashilwa imwe icipompa.”—Mateo 23:37, 38.

Uluko Lupya Ulwaipeela

13. Cinshi Yehova aseseme mu nshiku sha kwa Yeremia?

¹³ Mu nshiku sha kwa kasesema Yeremia, Yehova asobele ukuti icintu icipya cali no kucitikila abantu bakwe. Baibolo itila: “Moneni, inshiku shileisa, cisemo ca kwa Yehova, ilyo nkapinge cipingo cipya ku ba ng’anda ya kwa Israele: icishaba nge cipingo ico napingile kuli bashibo, mu bushiku nabekete mu minwe, ku kubafumya mu calo ca Egupti; pa kuti bene bafulungenye icipingo candi, na ine nalengelwe ubunani kuli bene, cisemo ca kwa Yehova. Awe, ici e cipingo ico nkapinga ku ba ng’anda ya kwa Israele pa numa ya nshiku isho, cisemo ca kwa Yehova; nkabika amalango yandi mu nda shabo, na mu mitima yabo e mo nkayalemba; kabili nkaba Lesa wabo, na bo bakaba abantu bandi.”—Yeremia 31:31-33.

14. Ni lilali uluko lupya ulwaipeela kuli Yehova lwafyelwe, kabili cinshi cacitike icalengele icipingo cipya ukutampa ukubomba? Ni bani bali ulo lwine luko ulupya?

¹⁴ Mu 33 C.E., icali no kulenga icipingo cipya ukutampa ukubomba calicitike ilyo Yesu afwile kabili ilyo papitile inshiku shimo aile ku muulu no kutwala kuli Wishi umutengo wa mulopa wakwe uwasuumine. (Luka 22:20; AbaHebere 9:15, 24-26) Nomba, ilyo abatumwa balongene pa Pentekoste mu 33 C.E. no kupokelela umupashi wa mushilo, uluko lupya lwalifyelwe, ulwaleitwa ati “Israele wa kwa Lesa.” Lilya line e lyo ne cipingo cipya catendeke ukubomba. (Abena Galatia 6:16; Abena Roma 2:28, 29; 9:6; 11:25, 26) Ilyo alelembela Abena Kristu basubwa no mupashi, umutumwa Petro atile: “Muli ‘mushobo uwasalwa, bushimapepo bwa cifumu, uluko lwa  mushilo, abantu abali cikwatwa caibela, ukuti mubilishe konse konse ukupuulama’ kwa wamwitile ukuti mufume mu mfifi mwingile mu lubuuto lwakwe ulwapesha amano. Pantu kale tamwali bantu, lelo nomba muli bantu ba kwa Lesa.” (1 Petro 2:9, 10) Icipangano caibela ico Yehova apangene no luko lwa bena Israele calipwile. Mu 33 C.E., Yehova afumishe amapaalo yakwe pa bena Israele ba cifyalilwa no kutendeka ukupaala abena Israele basubwa no mupashi wa mushilo, icilonganino ca Bena Kristu, abali ‘uluko lwaletwala ifisabo’ fya Bufumu ubo Mesia akateka.—Mateo 21:43.

Ukuipeela kwa Muntu Umwine

15. Bushe pa Pentekoste mu 33 C.E., Petro acincishe abaumfwile ilyashi lyakwe ukubatishiwa ulubatisho lwa musango nshi?

¹⁵ Ukufuma pa Pentekoste mu 33 C.E., ukuya ku ntanshi, umuntu umwine, abe muYuda nangu mwina Fyalo, aali no kuipeela umwine kuli Lesa no kubatishiwa “mwi shina lya kwa Tata ne lya Mwana ne lya mupashi wa mushilo.” * (Mateo 28:19) Pa Pentekoste mu 33 C.E., umutumwa Petro aebele abaYuda abali ne mitima isuma, pamo na bambi abalekonka imipepele ya baYuda ukuti: “Lapileni, lekeni umo na umo abatishiwe mwi shina lya kwa Yesu Kristu pa kuti mulekelelwe imembu shenu, e lyo mwalapokelela ica bupe ca mupashi wa mushilo.” (Imilimo 2:38) AbaYuda ba musango yo pamo na bambi abalekonka imipepele ya baYuda ilyo babatishiwe balangile ukuti nabaipeela kuli Yehova no kuti nabapokelela Yesu kabili muli wena e mo Yehova aali no kubabelela uluse pa membu shabo. Bali no kusumina ukuti Yesu e Shimapepo Mukalamba uo Yehova asala kabili e Ntungulushi yabo, e Mutwe wa cilonganino ca Bena Kristu.—Abena Kolose 1:13, 14, 18.

16. Mu nshiku sha kwa Paulo, bushe abaYuda ba mitima isuma pamo na bena Fyalo, baishileba shani mu luko lupya ulwa bena Israele basubwa no mupashi?

¹⁶ Ilyo papitile imyake ingi, umutumwa Paulo atile: “Ku bali mu Damaseke na ku bali mu Yerusalemu, na monse mu calo ca Yudea, na ku bena fyalo nabatwalile ubukombe ukuti balingile ukulapila no kwalukila kuli Lesa pa kucita imilimo iyawamina ukulapila.” (Imilimo 26:20) Pa numa ya kulondolwela bwino abantu, e kutila abaYuda na bena Fyalo, ukuti Yesu ali e Kristu nelyo Mesia, Paulo ayafwile balya bantu ukuipeela kuli Lesa no kubatishiwa. (Imilimo 16:14, 15, 31-33; 17:3, 4; 18:8) Apo bali-ipeele kuli Lesa, balya basambi bapya baishileba muli Israele wa basubwa no mupashi wa kwa Lesa.

17. Cinshi cili no kucitika nomba line ku baba muli Israele wa basubwa no mupashi wa kwa Lesa, kabili mulimo nshi umbi uulebombeka muno nshiku?

¹⁷ Inshita naipalama nomba iya kukakatikwa kwa kulekelesha ukwa bena Israele basubwa no mupashi abashala pano calo. Ilyo kukapwa, “bamalaika bane (4)” abaikata imyela ya bonaushi bwa “bucushi bukalamba” bakabeba ukulekako ku myela ine. Lelo pali ino nshita, umulimo wa kulonganya aba mwi “bumba likalamba,” abakekala umuyayaya pa calo, wena uletwalilila ukubombeka sana. Aba abetwa “impaanga shimbi” balaitemenwa ukutetekela mu “mulopa wa Mwana wa mpaanga” kabili balabatishiwa ukulanga ukuti nabaipeela kuli Yehova. (Ukusokolola 7:1-4, 9-15; 22:17; Yohane 10:16; Mateo 28:19, 20) Pali aba bene, paliba na bana abafyalilwa mu mayanda ya bakapepa. Nga uli mwana uwafyalilwa mu ng’anda ya bakapepa, ninshi walatemwa sana ukubelenga icipande cikonkelepo.

[Futunoti]

Ukupitulukamo

• Mulandu nshi abana ba bena Israele bashaleipeelela abene kuli Yehova?

• Bushe abena Israele bali no kulanga shani ukuti balecita ifyo balaile ilyo baipeele kuli Lesa?

• Mulandu nshi Yehova akaanine abena Israele abali uluko lwakwe ulwaipeela, kabili apyanikepo shani uluko lumbi?

• Ukufuma pa Pentekoste mu 33 C.E. no kuya ku ntanshi, finshi abaYuda na bena Fyalo balingile ukucita pa kuba mu luko lwa bena Israele basubwa no mupashi?

[Amepusho]

[Icikope pe bula 21]

Abana ba bena Israele

balefyalilwa mu luko lwasalwa na Lesa

[Icikope pe bula 23]

Umwina Israele onse aali no kuipeela umwine ukubombela Lesa

[Icikope pe bula 23]

Ukupeela ifya bupe na malambo ya kuitemenwa kwali no kulenga abena Israele ukulanga ukuti balitemwa Yehova

[Icikope pe bula 25]

Ukufuma pa Pentekoste mu 33 C.E., abakonshi ba kwa Kristu bali no kuipeela abene kuli Lesa no kubatishiwa pa kulanga ukuti bali-ipeela