“Icacitike Ilyo Napwile Isukulu Caliweme Nga Nshi”

K AFUNDISHA wa ku sekondari ku Spain alembele ukuti: “Muli iyi myaka ukucila 100 iyapita, Inte sha kwa Yehova balilanga ukuti balikatana sana kabili ba cishinka, ne cacindama sana, balikwata icitetekelo cakosa.” Cinshi calengele ukuti ulya kafundisha, uutila takwaba Lesa, ukulanda aya mashiwi?

Ifyo cali ni fi, Noemí umwana we sukulu uwa ku sekondari kabili Inte ya kwa Yehova, babebele ukuti pa mashindano bakalemba pa kupwisha isukulu, pakaba no kulemba ilyashi limo ilya kuti bakafundisha bakaconge. Noemí alembele ilyashi pa fyo Inte sha kwa Yehova babacushishe ku buteko bwa baNazi ku Germany.

Cinshi calengele ukuti Noemí alembe pa Nte sha kwa Yehova? Umwine atila: “Nalishibe ukuti bakafundisha bakabelengamo mu lyashi lyandi pa kuconga, kanshi namwene ukuti ili line e shuko lyamoneka ilya kubashimikilako ifyaba mu Baibolo. Ndatontonkanyapo sana pa fyo Inte sha kwa Yehova bashipikishe mu buteko bwa baNazi ku Germany. Nalishibe ukuti na bambi kuti batemwa ukumfwako ili ilyashi.”

Abengi balitemenwe sana ilyashi lya kwa Noemí, bambi bantu abo no mwine ashaishibe ukutila bakalitemwa. Pa October 5, 2002, bapeele Noemí icilambu pa lyashi alembele. Bulya bushiku, e lyo kwali ukupeela abana be sukulu ba mu Spain ifilambu. Balepeela ifilambu abalembele amalyashi ayasuma pali sayansi na pa fyakuma imikalile ya bantu ne lyashi lya kale. Abapeela abana be sukulu ifilambu ni bashimucindikwa abasambilila sana 20 aba ku mauniversiti ya lulumbi aya mu Spain mwine.

Abapeele Noemí icilambu cakwe ni bacilolo wa buteko aba mu cipani ca masambililo ku Spain ba Pilar del Castillo. Noemí ashukile aka kashita ukupeelako balya bacilolo wa buteko video atila Jehovah’s Witnesses Stand Firm Against Nazi Assault (Ifyo Inte sha kwa Yehova Bashipikishe Ilyo Balebacusha mu Buteko bwa baNazi). Awe bacilolo na bo balitemenwe kabili balipokele no bupe ubo babapeele.

Kumfwa ku tauni lya Manresa ukwikala Noemí, ipepala lye lyashi lyalandile pa lyashi lisuma ilyo Noemí alembele kabili balilembeleko na fimo fimo ifyali mu lyashi lya kwa Noemí. Bakafundisha mukalamba aba pa sukulu apo Noemí alesambilila na bo balipokeleko ilyashi lyakwe no kulibika pa fyali no kulandwapo pa bushiku bwa kusefya kwa pa sukulu ukwacitike ilyo imyaka 75 yakumene ukutula apo baiswilile ili sukulu.

Noemí atile: “Ala mwe bantu icacitike ilyo napwile isukulu caliweme nga nshi. Nalyumfwile bwino sana ilyo nabelengele amashiwi yalembele bakafundisha wandi ba Jorge Tomás Calot, abatile:

“‘Ine naishiba ukutila takwaba Lesa, nomba ninshininkisha ukuti kwaliba Uwapulamo uulenga abamupepa ‘ukutemwa nga nshi abantu banabo.”’”