Icalengele Ukuti Ntendeke Ukupepa Kuli Lesa na Kabili

UMWAUME umo alembele ati, “Nalefwaisha ukwebako ulupwa lwandi pa bakashana babili abo Lesa antumiine.” Aba bakashana babili ni Nte sha kwa Yehova. Lintu abakashana batandalile uyu mwaume, papitile fye imilungu iinono ukutula apo umukashi wakwe uwa myaka 45 afwilile. Ico cintu calimuponeshe pa musao. Abana bakwe abakalamba balemusansamusha, lelo baleikalila ukutali sana. Takwali ifibusa nelyo abena mupalamano abaleisa mu kumutandalila.

Ulya mwaume aebele abakashana ilyo bamutandalile ukuti: “Pali nomba nshipepa kuli Lesa pantu ng’umfwa kwati nalitaluka sana kuli wena.” Lelo balya bakashana balimukoseleshe no kumusansamusha, kabili bamupeele na ka trakiti akalanda pa cebo ca kwa Lesa, akatila, Lisubilo Nshi ilya Batemwikwa Besu Abafwa? Ulya mwaume abelengele ka trakiti ubushiku bonse kabili kalimusansamwishe.

Tapakokwele sana, aba bakashana Inte sha kwa Yehova balibweleleko na kabili pantu balimwene ifyo ulya mwaume abipiilwe lintu bamutandalile umuku wafumineko. E ico balefwaya ukwishiba ifyo aleumfwa. Ulya mwaume alembele ukuti, “Nalipapile sana, ukusanga ukuti abakashana babili abo nshaishibe na kwishiba balinsakamene kabili balipooseleko sana amano ku kufwaya ukwishiba ifyo naleumfwa.” Icebo ca kwa Lesa icaba mu Baibolo ico balanshenye nankwe calimukoseleshe nga nshi. Balya bakashana balaile ukuti bakabwela na kabili. Ulya mwaume alitemenwe icine cine ica kuti alembele na mashiwi tulandilepo pa kubala muli kalata wakwe uo atumine ku Ng’anda ya Bufumu iya Nte sha kwa Yehova iyabela ku ncende ekalila.

Ilyo ashilakuukila ku ncende yabela mupepi no kwikalila umwana wakwe, uyu mwaume alisangilweko na ku kulongana kwa Nte sha kwa Yehova kabili balimwitile ukwisaliila pamo ica kulya no lupwa lwa mukashana umo pali balya babili abamutandalile. Alembele ukutila: “Kwena ndekuukila ku ncende imbi, lelo nshakalabe balya bakashana babili, e lyo na bo mupepa nabo, kabili lyonse nakulamupepelako. Ala mwandini, pali nomba ndapepa sana kuli Lesa. Balya bantu e balengele sana sana ukuti ntendeke ukupepa kuli Lesa na kabili, e ico nkalabatasha fye cila bushiku.”