Icitetekelo Cakwe Cilakoselesha na Bambi

SILVIA afyelwe mu December 1992, kabili ilyo afyelwe alemoneka fye ukuti akaba mukashana umutuntulu sana. Nomba ilyo aali ne myaka ibili, bamusangile no bulwele bushipola ubulenga umuntu ukukwata ubwafya pa kupeema na pa kusungulula ifya kulya mu nda. Pa kuti abeko bwino, cila bushiku Silvia alanwa utubulungwa 36 utwa muti, alikwata na kabotolo ka muti wa kumwafwilisha ukupeema kabili alaya na ku ba kumucinako umubili. Apo bapwapwa bakwe tababomba bwino, alikwata ibotolo lya mwela wa oxygen uwa kumwafwako ukupeema kabili konse uko aya afwile ukusenda ili ibotolo lya mwela ninshi nakulikako ne ntambo sha kubomfya pa kupeema.

Nomba banyina kwa Silvia, ba Teresa batile: “Ala kuti mwapapa ifyo uyu mwana ashipikisha mu kulwala kwakwe. Icitetekelo cakwe calikosa sana, pantu alishiba ifyo Baibolo yalanda. Icitetekelo cakwe muli Lesa cilamwafwa ukushipikisha. Talabako ku fyo Yehova alaya ukuti icalo cipya cikesa, kabili abalwele bonse bakapola.” (Ukusokolola 21:4) Ilyo aba pa ng’anda batendeka ukumoneka aba bulanda, Silvia alabasansamusha pantu ena amoneka uwa cimwemwe kabili uwakosa. Eba abafyashi bakwe na ndume yakwe ukuti: “Ala mu calo cipya tatwakebukishe no kuti twalecula nge fi.”

Ilingi line, Silvia alashimikilako na bantu imbila nsuma yaba mu Cebo ca kwa Lesa, kabili abantu alanda na bo balamona ukuti mukashana wa nsansa kabili uwasekelela. Abo alongana na bo mu cilonganino ca ku Canary Islands na bo balatasha ilyo bomfwa alelandapo pa kulongana kabili balatemwa ukumona alecite fyo. Na kabili, lyonse ukulongana nga kwapwa, Silvia tafwaya ukuya bwangu, alashala aleshimike lyashi na ba bwananyina Abena Kristu. Bonse mu cilonganino balimutemwa pantu alitemwa abantu kabili wa nsansa.

Bawishi kwa Silvia, ba Antonio batile: “Kuli uyu mwana, twalisambililako cimo icacindama. Nangu tube na mafya, ubumi bwena ca bupe ukufuma kuli Lesa. Tufwile ukulatasha Lesa pa fyo atupeela ubumi.” Nga filya fine caba kuli Silvia, e fyo caba na kuli bonse ababombela Lesa, abanono na bakalamba, balafwaisha ukuti inshita ikafike ilyo “umwikashi wa mu calo takasose, ati, Nindwala.”—Esaya 33:24.

[Icikope pe bula 31]

Silvia alebelengela umuntu Baibolo ilyo banyina basendele ibotolo lyakwe ilya mwela wa oxygen