Bushe Ubufumu bwa kwa Lesa Cinshi?

ICACITIKILE umutundu wa muntu mu kubangilila fye calibipile! Malaika apondokele Kabumba wakwe. Uyu cipondoka abeleleke umwanakashi wa kubalilapo, Efa, ukulya ku cimuti cabindilwe. Ulya malaika atile: “Ukufwa tamwakafwe; pantu Lesa aliishibo kuti mu bushiku mukalyako, e mukashibulwa amenso yenu, kabili mukaba nge milungu, abaishibo busuma no bubi.” (Ukutendeka 2:16, 17; 3:1-5) Malaika wapondweke aishileba “Kaseebanya kabili Satana.”—Ukusokolola 12:9.

Bushe Efa alyumfwilile Satana? Baibolo itila: “Umwanakashi, pa kumona uyo muti ukuti uusuma ku kulya kabili wawama ku kumona, kabili muti wa kutemwikwa ku kulengo kushilimuka, abuulako ifisabo fya uko, alalya; kabili apako na ku mulume wakwe, na o alya.” (Ukutendeka 3:6) Kanshi abantu ba kubalilapo babili, Adamu na Efa, bailundile kuli Satana cipondoka. Ne cafuminemo ca kuti balipanishe ishuko lya kwikala mu Paradaise pamo pene na bana bali no kufyala. Abana abali no kufyalwa abapwililika kabili abali no kuba ne subilo lya kwikala ku ciyayaya baishilepyana ulubembu ne mfwa.—Abena Roma 5:12.

Pali ifi ifyacitike, bushe Yehova Lesa, Kateka Wapulamo mu bubumbo bonse, acitilepo shani? Ateyenye inshila ya kupwishishamo ulubembu. (Abena Roma 5:8) Na kabili Yehova Lesa alibikako ubuteko ubukapwisha ukucula konse. Ubu buteko bwitwa ukuti “ubufumu bwa kwa Lesa.” (Luka 21:31) Apo bwaba ubwa cibili ku kuteka kwa kwa Lesa ukwa mu calo conse, ubu Ubufumu bwalikwata umulimo bukabomba.

Mulimo nshi Ubufumu bwa kwa Lesa bukabomba? Bushe ubu Bufumu bwaba shani, kabili bwapusana shani ku mabufumu ya bantunse? Ni lilali Ubufumu bwali no kutendeka ukuteka? Aya mepusho yalayasukwa mu cipande cikonkelepo.