“Lelo Nashininkisha Ukuti Lesa Eko Aba”

BA ALEXANDRA abena Ukraine abekala mu musumba wa Prague, mu Czech Republic balefuma ku ncito baleya ku ng’anda. Lintu bali pa citesheni ca basi bamwene icikwama pa nshi icapala ica kubikamo Baibolo, abapita nshila balepantamo fye. Ilyo batolele no kumona ifyali mu kati balipapile sana ukusanga ukuti mwali indalama. Mwali icipo ca ndalama isha ku Czech Republic ama 5,000 yeka yeka fye. Takwali nangu umo lwa mupepi uwalemoneka ukufwaya ico cikwama. Apo baAlexandra tabali ba ku Czech Republic, calibafishe ukusanga indalama sha kubomfya pa ng’anda. Nomba cinshi bali no kucita?

Ilyo baAlexandra babwelele ku ng’anda, balangishe cikwama ku mwana wabo Victoria. Baiswile icikwama ukumona nga muli ishina na keyala ka mwine, nomba tamwali nakalya. Lelo, mwali akapepala apalembelwe amanambala. Ku lubali lumo ulwe pepala balembelepo akaunti namba, ku lubali lumbi kwali amanambala ayengi, mwali na kapepala apalembelwe ifyo umo engenda ukuya kwi banki limo ifi mu musumba wa Prague mwine, kabili mwali na kapepala kambi apalembelwe icipendo ca ndalama. Shonse pamo shali 330,000.00 koruny e kutila K28,800,000.00. Isho shine e ndalama shali mu cikwama.

Ukubomfya amanambala yali pa kapepala ayalemoneka kwati manambala ya foni baAlexandra balyeseshe ukutuma ku banki, lelo foni tayafikile. Ici calengele ukuti bena no mwana wabo baye ku banki no kuyalondolola icacitike. Baipwishe umwine wa akaunti namba iyali mu cikwama. Lelo, aba ku banki tabakwete fyebo pali iyo akaunti namba. Ubushiku ubwakonkelepo, baAlexandra baile kwi banki ne nambala imbi iyali mu cikwama. Aba ku banki baishilesanga ukuti ca cine balikwete umwanakashi uwalebika indalama mwi banki lyabo uwalebomfya iyo akaunti namba. BaAlexandra na Victoria balilandile no yo mwanakashi kabili alisumine ukuti ca cine alilufishe indalama. Nomba ilyo bakumene, ulya mwanakashi alibatashishe sana kabili abepwishe ukuti, “Finshi mulefwaya mulipile pa kumbwesesha ishi ndalama?”

Victoria ayaswike ati: “Tapali nangu cimo. Nga twalefwaya indalama nga tatushibweseshe.” Mu ciCzech ca kuwayawaya alondolwele ukuti: “Twalamubwesesha ishi ndalama pantu tuli Nte sha kwa Yehova. Apo twalisambilila Baibolo kampingu wesu te kuti atusuminishe ukubula ifintu ifishili fyesu.” (AbaHebere 13:18) Ulya mwanakashi alitemenwe cibi kabili atile, “Lelo nashininkisha ukuti Lesa eko aba.”