“Tufwile Ukunakila Lesa Nga Kateka Ukucila Ukunakila Abantu”

‘Lesa Wesu ali na Maka ya Kutupokolola’

ICIMPASHANYA icikalamba ica golde calimikwe mu nika ya Dura, mupepi no musumba wa Babiloni. Bali no kutendeka ukupepa ici cimpashanya pa kusefya kukalamba ukwasangilwe na bashimucindikwa abo bale-enekela ukukontamina ku cimpashanya ilyo balishishe ice yande. Imfumu Nebukadnesari iya mu Babiloni yashikile ifunde lya kuti uuli onse uushali no kupepa icimpashanya ali no kupooswa mwi lungu lya mulilo ilyakabisha. Takwali nangu umo uwali no kupula muli ili funde.

Abaletamba balipapile ukumona uko bakapepa ba cine batatu abaletiina Yehova, e kuti Shadraki, Meshaki, na Abednego, bakeene ukukontamina ku cimpashanya. Icalengele bakaane ukukontaminako ni co balishibe ukuti ukucita ifyo kupula mwi funde lyaleti balingile ukupepa Yehova Lesa eka. (Amalango 5:8-10) Ilyo babepwishe ico bali no kupingulapo ukucita, ukwabula umwenso baebele Nebukadnesari ukutila: “Nga cabe fi, Lesa uo tupepa ali na maka ya kututuula mwi lungu lya mulilo uulebilima, kabili mu kuboko kwenu, mwe mfumu, kuti atutuula. Lelo nga tacite ifi, cibe icaishibwa kuli imwe, mwe mfumu, ku milungu yenu ifwe tatwapepeko, na ku cimpashanya ca golde ico mwaimike tatwatooteko iyo.”—Daniele 3:17, 18.

Ilyo abaHebere batatu babapoosele mwi lungu lya mulilo, ni ku cipesha mano e ko bapusukile. Lesa alitumine malaika wakwe ukuyacingilila ababomfi bakwe aba busumino abasalilepo ukufwa ukucila ukubembukila Yehova. * Ifyo bapingwilepo ukucita fyalipalana ne fyo abatumwa ba kwa Yesu Kristu bacitile imyaka ukucila pali 600 pa numa, ilyo balandile ku cilye cikalamba ica baYuda ukuti: “Tufwile ukunakila Lesa nga kateeka ukucila ukunakila abantu.”—Imilimo 5:29.

Amasambililo Yacindama Ayo Twasambililako

Shadraki, Meshaki, na Abednego bali ne citetekelo, icumfwila, na bucishinka ifyo tulingile ukupashanya. AbaHebere batatu balitetekele sana Yehova ica kuti bakampingu babo abasambilishiwe amafunde ya kwa Lesa tababasuminishe ukuibimba mu kupepa kwa bufi ukuli konse nelyo ukuipeelesha mu kupupa uluko. Pali lelo Abena Kristu ba cine na bo batetekela fye muli Lesa wa cine. Batungululwa na kampingu uwasambilishiwa na Baibolo kabili balakaana ukupepa konse ukwa bufi nelyo ukusefya ukushumfwana na mafunde ya kwa Lesa ne fipope.

AbaHebere batatu aba busumino batetekele muli Yehova kabili tabalekele icifulo cacindama nelyo ilumbo ifyo ubuteko bwa mu Babiloni bwabapeele ukubalenga ukuleka ukunakila Lesa. Balya balumendo basalilepo ukucula no kufwa ukucila ukonaula bucibusa bwabo na Lesa. Ukupala Mose uwaliko ninshi tabalafyalwa, ‘batwalilile ukushangila nga bamwene Uushimoneka.’ (AbaHebere 11:27) Nangu ca kuti Yehova ali no kubapokolola kumfwa nelyo iyo, abaHebere batatu batwalilile aba cishinka  kuli ena ukucila ukufwaya ukupususha imyeo yabo. Ilyo umutumwa Paulo alelanda pa ca kumwenako cabo, alumbwile abantu bacitetekelo “abacimfishe amaka ya mulilo.” (AbaHebere 11:34) Ababomfi ba kwa Yehova baleesha ukulangisha icitetekelo cimo cine no kunakila ilyo baleeshiwa pali ino nshita.

Cimbi ico twasambililako ku ca kumwenako ca kwa Shadraki, Meshaki, na Abednego, ca kuti Lesa alalambula aba cishinka kuli ena. Kemba wa amalumbo aimbile ukuti: “Yehova . . . takashe aba cishinka bakwe.” (Amalumbo 37:28) Pali lelo, te kuti twenekele Yehova ukutupokolola mu cipesha mano, nga filya acitile ku baHebere batatu. Nangu cibe fyo, kuti twacetekela ukuti te mulandu ne fyo twingeshiwa, Shifwe wa mu muulu akatwafwa. Lesa kuti afumyapo ubwafya, kuti atukosha ukuti tushipikishe, nelyo kuti aisatubuusha nga ca kuti twafwa aba cishinka kuli ena. (Amalumbo 37:10, 11, 29; Yohane 5:28, 29) Lyonse ilyo bucishinka bwesu bwaeshiwa, icitetekelo, icumfwila, ne cishinka filacimfya kabili tusalapo ukunakila Lesa ukucila abantu.

[Futunoti]

[Akabokoshi ne Cikope pe bula 9]

BUSHE MWALISHIBE?

• AbaHebere batatu bali ne myaka mupepi na 30 ilyo bucishinka bwabo bwaeshiwe.

• Ilungu balilikafishe sana.—Daniele 3:19.