Amepusho Ukufuma ku Babelenga

Twaishiba shani ukuti amano ayalondololwa pa Amapinda 8:22-31 yalanda pali Yesu Kristu ilyo ashilaba umuntunse?

Ubulondoloshi bwapuutwamo ubwaba mwi buuku lya Amapinda ubulondolola amano butila: “Yehova alimumbile nine wa ntanshi wa kulenga kwakwe, nine wa kubalilapo wa milimo yakwe ya ku kale; . . . ilyo impili shali tashilaikata, pa ntanshi ya tupili nalifyelwe, . . . Ilyo apampamike imyulu, ine e ko nali, . . . e po nali mupepi na kuli wene, umwana wa kulelwa, nali ica kupekelwa cakwe ubushiku no bushiku, uwaleangala ku cinso cakwe mu nshita shonse, . . . no kupekelwa abana ba bantu.”

Ili lembo talilelanda pa mano ya kwa Lesa nelyo amano aya yene fye. Mulandu nshi? Pantu amano yalondololwa pano ‘yalibumbilwe,’ ukuba icibumbwa ca ntanshi ica kulenga kwa kwa Yehova. Yehova Lesa eko aba ukufuma fye umuyayaya kabili lyonse wa mano. (Amalumbo 90:1, 2) Amano yakwe tayakwete ntendekelo; kabili tayabumbilwe. ‘Tayafyelwe.’ Na kabili, aya mano yalondololwa ukuti yalalanda no kubomba, ukulanga fye ukuti muntu.—Amapinda 8:1.

Ibuuku lya Amapinda litila, kale sana, amano yali mupepi na Yehova, Kabumba, yali ni “cibinda wa mulimo” (NW). Ukwabula no kutwishika, aya mano yalosha kuli Yesu. Kale sana ilyo ashilaisa pe sonde, Yesu alibombele sana na Yehova ica kuti Baibolo itila: “E watangilile fyonse fimbi kabili muli wene e mo fyonse fimbi fyalengelwe ukubako.”—Abena Kolose 1:17; Ukusokolola 3:14.

Kanshi nacilinga ukulondolola Umwana wa kwa Lesa ukuti mano, pantu e wasokolwele ukufwaya kwa kwa Yehova ne fipope fyakwe. Ilyo ashilaba umuntunse, Yesu ali Cebo ca kwa Lesa, nelyo uwa Kulandilamo wa kwa Lesa. (Yohane 1:1) Bamulondolola ukuti “maka ya kwa Lesa kabili mano ya kwa Lesa.” (1 Abena Korinti 1:24, 30) Ala mwandini Umwana wa kwa Lesa balimulondolola bwino sana, uo ukutemwa abana ba bantu kwalengele ukuti abafwile ku kubalubula!—Yohane 3:16.

[Icikope pe bula 31]

“Ilyo impili shali tashilaikata . . . nalifyelwe”