Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Nga e fyo cali, moneni nga kuti mwayasuka amepusho yakonkapo:

• Ukulingana no kusesema kwaba pa Amalumbo 72:12, bushe Yesu ‘akapokolola shani ababusu’?

Ilyo Yesu akalateka, mu calo mukaba umulinganya kabili takwakabe ubufumfuntungu. Icilenga ubupiina ilingi line ni nkondo, nomba Kristu akaleta umutende wine wine. Alalangulukila abantu kabili akalenga ukuti bakekatane, kabili akashininkisha ukuti abantu bonse nabakwata ifya kulya ifyakumanina. (Amalumbo 72:4-16)—5/1, ibula 7.

• Bushe fwe Bena Kristu kuti twalanga shani ukutila tulalanda “ukwabula umwenso”? (1 Timote 3:13; Filemone 8; AbaHebere 4:16)

Tulanga ukuti tulalanda ukwabulo mwenso lintu tushimikila kuli bambi mu kushipa, nga tulesambilisha bwino no kufunda bambi ukwabula ukushingashinga, na lintu tupepa kuli Yehova, ukumweba fyonse ifili mu mutima, pantu twalicetekela ukuti alomfwa no kwasuka amapepo.—5/15, amabula 14-16.

• Mulandu nshi mu Mafunde ya kwa Mose balandiile ukuti ukufumya amenshi ya bwaume, ukuba ku mpepo, no kufyala abana fyalelenga umuntu “ukukowela”?

Ifunde lyatile ukufumya amenshi ya bwaume, ukuba ku mpepo, no kufyala abana kukowela lyalelenga abena Israele ukufyalana sana, ukutekanya, ukulama insuna ya kukumana kwabo ukwa mu cupo, kabili lyalelenga baleibukisha ukuti umulopa wa mushilo no kuti balefwaikwa ukupeela amalambo no kufuta pa imembu.—6/1, ibula 31.

• Nga ca kuti umuntu alefwaya ukuba ne nsansa, mulandu cingawamina ukuti alebelenga ibuuku lya Amalumbo?

Abalembele Amalumbo balishibe ukuti ukukwata bucibusa busuma na Lesa, e kwingalenga umuntu ukuba ne nsansa. (Amalumbo 112:1) Bakomailepo ukuti bucibusa na bantunse banensu, ukukwata icuma, no kusambilila sana te kuti filete nsansa tukwata nga twaba pa “bantu abo Yehova e Lesa wabo.” (Amalumbo 144:15)—6/15, ibula 12.

• Ni bucibusa nshi ubwaibela ubo abena Israele ba ku kale bakwete na Yehova?

Mu 1513 B.C.E., Yehova acitile icipangano na bena Israele. (Ukufuma 19:5, 6; 24:7) Ukutula lilya, umwina Israele onse nga afyalwa, alefyalilwa mu luko ulwaipeela kuli Yehova. Lelo, umuntu umo umo ali no kusalapo nga aali no kulabombela Yehova nelyo iyo.—7/1, amabula 21-2.

• Mulandu nshi tulingile ukulacitila ifintu fyonse “ukwabula ukwing’winta”? (Abena Filipi 2:14)

Amalyashi ya mu Baibolo ayengi yalanga ukuti ukung’winta kwaliletelele abantu ba kwa Lesa. Kanshi tulingile ukutontonkanya sana pa fibi ifingafumamo pali lelo. Apo fwe bantunse tatwapwililika, twalikwata umutima wa kuilishanya, e co tulingile ukuibaka no kutaluka ku kuilishanya.—7/15, amabula 16-17.

• Twaishiba shani ukuti amano ayalondololwa pa Amapinda 8:22-31 tayalosha ku mano aya yene fye?

Yalya mano ‘baliyabumbile,’ nelyo baliyapangile, nga ya ntanshi mu kulenga kwa kwa Yehova. Lesa e ko aba ukutula fye na kale kabili alikwata na mano; amano yakwe tayabumbilwe. Amano yalondololwa pa Amapinda 8:22-31 yaishileba mupepi na ena ngo “mwana uwa kulelwa,” icilolele mu kuti yali muntu uwakwata umubili wa mupashi uwaishileba Yesu kabili uwabombele pamo na Yehova mu kupanga ifintu fimbi. (Abena Kolose 1:17; Ukusokolola 3:14)—8/1, ibula 31.