Inte sha kwa Yehova Bafulilako pa Cishi Icisuma

UKWABULA no kutwishika abatandala ku Taiwan balatemwa sana ukumona imiti iyafumba, icani icafunda bwino ne fimenwa fimbi ifyaba pali ici cishi icakaba. Umupunga ulamoneka bwino sana ilyo ulekuula, kabili ilyo wapya ulakashikila. Mu mbali ya mpili mwaba imiti iikalamba iyafumba. Kabili ukupusanako ne misumba umwafulisha abantu, iyi mpanga umwaba impili ne fimenwa ifyalelema, ilalenga icishi ukumoneka bwino sana. Na kuba e calengele no kuti umwina Bulaya uwabalilepo ukumona ici cishi aciinike ukuti Ilha Formosa nelyo “Icishi Icisuma.”

Ca cine, Taiwan cishi icinono kabili icisuma nga nshi, mu butali caba amakilomita 390 e lyo mu bufumo caba amakilomita 160. Impili ishitali e shafula pali ici cishi. Ulupili lwa Yü Shan (Mount Morrison) lutali sana ukucila no lupili lwa Mount Fuji ulwa mu Japan, e lyo no lupili lwa Mount Cook ulwa mu New Zealand. Impanga yashinguluka impili shaba pa kati ka cishi yafika fye na kuli Bemba, kabili e mwaikala abantu abengi ukufika ku mamilioni 22.

Na Bambi Abalefulilako

Kuli ukulunduluka na kumbi ukulecitika sana mu Taiwan. Uku kulunduluka kwa mulimo Inte sha kwa Yehova babomba. Ukulunduluka kulemonekela mu fyo abaice na bakalamba balebombesha ilyo fye baishiba Lesa wa cine Yehova. Cileleta insansa ukumona abengi balebombesha ukwafwa bambi ukusambilila pali Yehova ne fyo afwaya.

Ukufulilako kwa bantu abalebomba umulimo wa kushimikila kwalengele balundeko amaofesi aya Nte sha kwa Yehova mu December mu mwaka wa 1990. Amaofesi ya kale ayaali mu Taipei yalicepele ica kuti teti basakamane bakasabankanya ba Bufumu mu Taiwan abali 1,777 pali ilya nshita. Pa numa ya myaka iingi iya kubombesha kwa bamunyinefwe aba mishinku iyapusanapusana abafuma ku fyalo fimbi, e lyo na ba mu Taiwan  mwine, amaofesi ayapya mu Hsinwu yalipwile ukukuulwa mu August 1994. Pali ilya nshita kwali 2,515 abalebila imbila nsuma iyaba mu Cebo ca kwa Lesa, Baibolo. Nomba pa numa ya myaka 10, abantu na bafula sana, nabacila 5,500. Kabili cila mweshi, abantu nalimo 1,400 balapoosa inshita iikalamba sana mu kushimikila. Iciweme sana, kumona abaice abaume na banakashi balebombako uyu mulimo kabili baba kwati “mume” walucelo uupembesula.—Amalumbo 110:3.

Abaice Abengi Balebombako Umulimo wa kwa Yehova

Abengi abacincila abalebombako uyu mulimo wa kubila imbila nsuma baice. Bamo bana be sukulu. Ku ca kumwenako, mwi tauni lyabela lwa ku kuso mu Taiwan, abalume na bakashi balibetile ukusangwa kwi Sukulu lya Bulesa uko Inte sha kwa Yehova basambilila ifya kusambilisha abantu bambi Baibolo. Uyu wali e muku wa kubalilapo. Aba bantu balipapile sana ilyo bamwene akalumendo ka Weijun kalebelenga bwino sana Baibolo pa cisebele kwati mukalamba. Ilyo basangilwe ku kulongana na kumbi, balitemenwe sana ukumona abana abashilatendeka ne sukulu baleasukapo bwino sana pa kulongana. Aba bantu balandile na pa fyo abana baikele mucinshi mucinshi mu Ng’anda ya Bufumu ukwabula ukupanga icongo.

Mulandu nshi abaice balebombelako uyu mulimo wa kusambilisha Baibolo mu calo umwafula abaBudda na baTao? Ni pa mulandu wa kuti abafyashi babo Abena Kristu balabomfya ifishinte fya mu Baibolo, kabili balilenga ulupwa lwabo ukuba ulwa nsansa pantu balipanga bucibusa na Yehova. Abafyashi ba kwa Weijun balesha na maka ukulenga ukusambilila Baibolo pamo no ulupwa lwabo no kushimikila ukuwama ica kuti abakalamba ba uyu mulumendo, umwaume no mwanakashi, balibatishiwa kale. Ilyo Weijun aipwishe nomba line ukuti alefwaya ukutendeka ukulashimikila, banyina batile uyu mulumendo alishalike bamagazini abengi ukucila impendwa ya bamagazini bonse abo ulupwa lonse lwashalike. Ukwabula no kutwishika Weijun afwile alatemwa sana ukulanda pali Baibolo, ukwasukapo pa kulongana, e lyo no kwebako bambi ifyo alesambilila.

Ilyo Baleya Balekulilako

Bushe abaice ba musango yo babomba shani ilyo baleya balekulilako? Abengi balatwalilila ukutemwa Yehova no mulimo wa kushimikila. Ica kumwenako, Huiping aba ku sukulu. Bushiku bumo kafundisha wakwe atile, kwaliba ibumba limo ilya mapepo abo ashaishiba abashisumina ukubabikamo umulopa. Ilyo abana be sukulu bafumine mu kalasi, Huiping alondolwelele kafundisha wakwe ukuti abo bantu ni Nte sha kwa Yehova, kabili alilondolwele no mulandu bashisuminina ukubabikamo umulopa.

Kafundisha na umbi atambishe vidio umwali ifyo abantu bambula amalwele ayambukila pa mulandu wa kulungana. Muli vidio balumbwilemo 1 Abena Korinti 6:9, kabili kafundisha atile Baibolo taikanya ukulungana kwa baume nelyo abanakashi bekabeka. Na kabili, Huiping alilandile na kafundisha pa fyo Lesa amona imibele ya musango yu.

Ilyo umusambi munankwe Shuxia alepekanya lipoti pa lukaakala ulucitika mu lupwa, Huiping amupeele Awake! ya November 8, 2001 iyakwete umutwe uwaleti “Ubwafwilisho ku Banakashi Abapumwa,” kabili amulondolwelele ukuti muli uyu magazini ifyebo ifingi ifilelanda pali ili lyashi fifumine mu Baibolo. Mu kupita kwa nshita Shuxia aishileba kasabankanya wa mbila nsuma uushabatishiwa. Pali lelo Shuxia na Huiping balashimikila kuli bambi.

Ku Bena Kristu abengi ukuishibisha ukuti balakonka ifishinte fyaba mu Baibolo kulafya, sana sana mu ncende sha mu mishi. Zhihao alishipikishe ukumupumya pa mulandu wa citetekelo cakwe e lyo no mulimo wa kushimikila uo alebomba. Asosa ukuti:  “Naleumfwa ububi ica kuti naletiina ukukumanya abo nalesambilila nabo nga ndeshimikila. Inshita shimo abalempumya baleba nangu 10!” Nomba bushiku bumo, kafundisha aebele Zhihao ukulanda ku bana be sukulu banankwe pa fyo asuminamo. Zhihao atila: “Natile ndetendekela ukulanda pa Ukutendeka icipandwa 1, lyena nalalanda pa mepusho pamo nga, Nani wapangile icalo na fyonse ifyabamo? Kabili bushe umuntu aishilebako shani? Lelo ilyo natendeke fye ukubelenga Baibolo, bamo batendeke ukunseka ukuti nacetekele mu fintu ifishabako. Nangu cibe fyo, nalitwalilile mpaka napwisha ilyashi lyandi. Pa numa, nalilandile na bamo aba mwi kalasi lyandi pa mulimo tubomba uwa kushimikila e lyo ne fyo twasuminamo. Nomba ino nshita, nga bankumanya ndeshimikila tabanseka nakalya!”

Zhihao akonkanyapo ukusosa ukuti: “Apo abafyashi bandi ni ba Nte, tulalanshanya ilembo cila lucelo. Na kabili tulasambilila Baibolo no kusangwa mu kulongana lyonse. Ici e calenga ukuti ndeshipa nga ca kuti umo alefwaya ukumpumya ilyo ndeshimikila kuli bambi icine caba mu Baibolo icitusansamusha.”

Tingmei aba ku sekondari. Bushiku bumo balimwitile ukuya ku kwangala na bana be sukulu banankwe abanakashi, e lyo balitileko na balumendo ukufuma kwi sukulu limbi. Tingmei alimwene ukuti ukucite fyo kuti kwabaletelela e calengele ukuti akaane ukuyako. Nangu cingatila aleeba abasambi banankwe ifyaba mwi buuku lya Ifipusho Abacaice Bepusha—Ifyasuko Fibomba, batwalilile fye ukumwita. * Abakashana balemuseka abati ashala mu fya kale. Lelo caishilemoneka fye apa buuta ukuti ukukonka ifyo Baibolo ilanda kusuma ilyo umukashana umo aimite kabili pa numa aliponeshe ifumo. Tingmei atila: “Ukukonka ifyo Yehova atweba kwalinenga ukukwata kampingu musuma, kabili calilenga ukuti ndeba ne nsansa no kulaumfwa bwino.”

Ukucimfya Amafya Ayalelesha Ukufula

Umo pa banankwe ba kwa Tingmei ni Ruiwen. Ilyo ali umwaice, Ruiwen aleumfwa ukuti ukuya ku kulongana kwa Bwina Kristu no kushimikila kwalemutendusha. Lelo ilyo amwene ubupusano bwali pa kutemwa uko aba mu cilonganino balemulanga e lyo no kutemwa ukwa bufi uko abanankwe balemulanga, alyalwile imibele yakwe. Ruiwen atendeke ukushimikila ku banankwe ku sukulu, kabili mu kwangufyanya fye amwene kuti alingile ukucitapo cimo. Atendeke umulimo wa  bupainya bwakwafwilisha e kutila ukulashimikila ukucila pa amaawala 50 cila mweshi. Pa numa atendeke ukubomba bupainiya bwa nshita yonse e kutila ukulashimikila ukucila pa amaawala 70 cila mweshi. Ruiwen alanda ukuti: “Ndatasha sana Yehova. Tandekeleshe nelyo nacitile ifintu ifyo ashatemenwe, lelo alitwalilile ukuntemwa. Bamayo na bambi mu cilonganino nabo batwalilile ukuntemwa. Apo ino nshita ndesambilisha abantu basano Baibolo, ndeyumfwa ukuti ndebombako umulimo uuleta insansa isha cine cine.”

Pe sukulu lya Sekondari limo, mu ncende ya ku mushi, abana ba baNte babili balibasalile ukuyaimininako isukulu ku kucifyanya mu kucinda inyimbo sha cikaya ukwali no kubako. Ilyo baishibe ifyo uku kucimfyanya kwali no kuba, baNte bacaice batile ukuyasangwa kulya kwali no konaula kampingu wabo uwa Bwina Kristu. Ilyo baeseshe ukulondolola ifyo baleyumfwa no kweba bakafundisha ukuti tabalefwaya ukuyacimfyanyako, balibakanine, babebele ukuti apo balibasalile bafwile fye ukuya. Apo aba baice tabalefwaya ukuyako, batumine kalata kuli departiment iilolekesha pa masukulu ukulondolola uyu mulandu. Nangu cingatila tabapokelele icasuko, isukulu lyapokelele ifunde lya kuti tabafwile ukulapatikisha uushilefwaya ukuya mu kucimfyanya. Ala aba baice balitemenwe sana ukwishiba ukuti ukusambilila Baibolo kwalibalengele ukukwata kampingu musuma kabili kwabalengele ukushipa pa kucita icalungama!

Abalemana nabo balatemwa ukushimikila bambi isubilo ilyaba mu Baibolo. Minyu afyelwe uwalemana, te kuti abomfye iminwe yakwe. Pa kukupukula Baibolo abomfya ululimi pa kuti asange apo alefwaya ukubelenga. Ilyo alepeela ilyashi mwi Sukulu lya Bulesa, alalambalala pa cipuna e lyo uo babanankwe mwi lyashi ekala pa mupando uwipi pa kuti alemwikatilako icisoselo. Ala cilaleta insansa icine cine ukumona ifyo Minyu aibikilishako pa kupekanya amalyashi!

Ilyo Minyu alefwaya ukulashimikila pa Bufumu, bankanshi nankwe mu cilonganino balisambilile ifya kulashimikila pa foni pa kuti balemwafwa pa kushimikila. Minyu alatinika inambala ya foni ku lulimi, e lyo bankanshi nankwe balamwafwa ukulemba amanambala ya bantu alanda nabo. Alitemwa ukushimikila ica kuti nomba alabomba bupainiya bwa kwafwilisha, ukulalanda na bantu pa Bufumu bwa kwa Lesa ukubomfya foni pa amaawala 50 ukufika kuli 60 cila mweshi. Alisanga bamo abafwaya impapulo ishilanda pali Baibolo kabili balamusuminisha ukulalanda nabo pa foni. Pali ino nshita alesambilisha abantu batatu Baibolo abo alandile nabo fye pa foni.

Ca cine, kwati mume uupembesula, abalumendo na bakashana mu filonganino 78 ifya Nte sha kwa Yehova mu Taiwan baleipeela kabili mu kucincila balabilisha imbila nsuma ya Bufumu ku bantu abengi nga nshi ababa pali ici cishi. Ifilecitika ku Taiwan mulimo unono fye nga ku uulinganya ku mulimo ulebombwa icalo conse ukufikilisha ukusesema kwa mu Baibolo ukutila: “Abantu bobe bakaipeela kuli iwe no kwanga mu kasuba ka bulamba bobe; mu fisamo fya mushilo, ukufuma mwi fumo lya macaca, ngo mume, abalumendo bobe bakesa kuli iwe.” (Amalumbo 110:3) Aba baice balakoselesha abakalamba, bakabilisha ba nabo aba Bufumu, ne cacilapo balalenga Shifwe wa ku muulu Yehova Lesa ukusekelela!—Amapinda 27:11.

[Futunoti]

[Akabokoshi ne Cikope pe bula 10]

AMAYANDA YA BUFUMU NA YAMBI YALEFWAIKWA

Apo bakasabankanya ba mbila nsuma na bafulilako mu Taiwan, amayanda ya Bufumu yalefwaikwa. Lelo calyafya ukukwata amayanda ya Bufumu ayengi. Mulandu nshi? Ni co mu mishi mumo mumo, impanga iisuma iya kukulapo Amayanda ya Bufumu yaliceepa. Na kabili impanga na yo yalyuma umutengo, kabili amafunde ya kupeela impanga yalyafya. Mu matauni, incende iyo bengasanga fye, ni palya apaba ifikuulwa fya maofesi, kabili kuti bayasangula ukuba Amayanda ya Bufumu. Nangu cibe fyo, palafu wa maofesi ayengi abela sana mupepi, imitengo ya kuwamya ifikuulwa yaliluma, iminshi ya kwingililapo na yo ilacepa, e lyo, kulaba na fimbi ifilenga ukuti cafye ukubomfya ifi fikuulwa nga Mayanda ya Bufumu.

Nangu cibe fyo, Inte sha kwa Yehova mu Taiwan balikuula amayanda ya Bufumu ayapya. Balitwalilila ukufwaya impanga apa kukuula, pantu balaipeelesha ukusangula indalama ishifwaikwa ukushita impanga kabili baleshiba ne nshila shisuma isha kukuulilamo Amayanda ya Bufumu.