“Lekeni Ifya Kulomba Fyenu Fiishibikwe Kuli Lesa”
“Lekeni Ifya Kulomba Fyenu Fiishibikwe Kuli Lesa”
“Muli fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela.”—ABENA FILIPI 4:6.
1. Lishuko lya kulanda na nani twakwata, kabili cinshi twingalandilo kuti ico cintu ca kupapa?
KUTI caba shani nga mulefwaya ukumonana na kateka wa mu calo cenu? Ababombela ku maofesi yakwe kuti bamwasuka cikuuku cikuuku ifyo mulefwaya ukuyamwipusha, nomba katwishi nga kuti bamusuminisha ukuyalanda na kateka umwine. Lelo kuli Yehova Lesa Kateka mukalamba pali bonse kabili Uwabumbile umuulu ne calo, kwena te fyo caba, ena kuti mwalanda nankwe. Kuti twalanda nankwe konse uko tuli kabili inshita fye yonse iyo tulefwaya. Lyonse fye alomfwa amapepo ayo amona ukuti nayalinga ukupokelela. (Amapinda 15:29) Ala te pa busuma! Ukwishibe fyo kufwile ukutukoselesha ukulapepa lyonse kuli Lesa uo Baibolo itila e “umfwo kupepa”!—Amalumbo 65:2.
2. Finshi fifwaikwa pa kuti amapepo ya muntu yaleumfwika kuli Lesa?
2 Nomba umo kuti aipusha ukuti, ‘Mapepo nshi ayo Lesa omfwa?’ Baibolo yalitweba cimo icifwaikwa pa kuti amapepo yaleumfwika kuli Lesa ilyo itila: “Ukwabula icitetekelo te kuti ateemunwe, pantu uupalamina kuli Lesa afwile ukusumina ukuti e ko aba no kuti aba kalambula wa bamufwaisha.” (AbaHebere 11:6) Ca cine, nge fyo twasambilile na mu cipande cifumineko, icitetekelo calicindama sana pa kupepa kuli Lesa. Lesa alafwaya ukumfwa amapepo ya bafwaya ukulanda nankwe, lelo bafwile ukuba ne citetekelo pa kupepa e lyo ne mibele isuma, ubufumacumi no mutima usuma.
3. (a) Finshi fimo ifyo twingalanda mu mapepo yesu nga filya na bantu kwa Lesa aba cishinka balepepa kale? (b) Mapepo nshi ayalekanalekana ayo twingapepa?
3 Umutumwa Paulo akoseleshe Abena Kristu mu nshiku shakwe ukuti: “Mwisakamikwa nangu kamo, lelo muli fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela.” (Abena Filipi 4:6, 7) Baibolo yalilanda pa bantu abengi abalepepa kuli Lesa ukumweba ifyalebasakamika. Bamo pali abo ni Hana, Eliya, Hisekia, na Daniele. (1 Samwele 2:1-10; 1 Ishamfumu 18:36, 37; 2 Ishamfumu 19:15-19; Daniele 9:3-21) Tulingile ukupashanya aba bantu. Lelo moneni ukuti Paulo alandile no kuti tufwile ukulapepa amapepo ayalekanalekana. Atile mu mapepo yamo tufwile ukutootela Lesa, e kutila ukumutasha pa fyo atucitila. Na kabili, pa kumutootela pene, tufwile no kumulumbanya. Alandile no kuti tulingile ukupaapaata kuli Lesa, e kutila ukuiceefya no kuba no mukoosha wa kupepa kuli ena. E lyo kuti twapepa na mapepo ya kulomba fimo ifyo tulefwaya atupeele nangu ukutucitila. (Luka 11:2, 3) Shifwe wa ku muulu alomfwa bwino ukulanda nankwe mu mapepo yalekanalekana aya musango yo.
4. Cinshi tulombela kuli Yehova nangu ca kuti alishiba kale fyonse ifyo tukabila?
4 Bamo kuti baipusha abati, ‘Bushe Yehova taishiba kale fyonse ifyo tukabila?’ Ee, alishiba. (Mateo 6:8, 32) Nomba cinshi afwaila ukuti tulelomba ifyo eshibe kale? Natulangilile: Uwakwata ituuka kuti aeba abantu ukuti akalapeela abantu bamo ubupe nga bashita sana ifintu mwi tuuka lyakwe. Lelo pa kubapeela, bafwile ukuya kuli ena mu kupoka ubo bupe. Umuntu nga tele mu kupoka, ninshi talefwaya. E cimo cine ne pepo, nga tatulombele ifyo tulekabila, ninshi tatulefwaya Yehova ukutwafwa. Yesu atile: “Lombeni kabili mukapokelela.” (Yohane 16:24) Nga tulelomba kuli Lesa, ninshi tulelanga ukuti twalimucetekela.
Tufwile Ukupepa Shani Kuli Lesa?
5. Mulandu nshi uo tulingile ukupepela mwi shina lya kwa Yesu?
5 Yehova tabikako amafunde ayengi sana ayakosa aya kukonka pa kupepa. Lelo kwena tulingile ukwishiba ifyo twingapepa kuli Lesa mu mucinshi ukulingana ne fyo Baibolo yalanda. Cimo icacindama ni cilya Yesu aebele abakonshi bakwe ilyo atile: “Nga mwalomba icintu conse kuli Tata, akamupeela mwi shina lyandi.” (Yohane 16:23) Kanshi, tufwile ukupepela mwi shina lya kwa Yesu no kwishiba ukuti amapaalo yonse ayo umuntu engapokelela ukufuma kuli Lesa yeshila muli Yesu.
6. Bushe Baibolo yalilanda ifya kwiminina, ifya kwikala nangu ifya kufukama pa kupepa?
6 Bushe Lesa alilanda ifya kwiminina nelyo ifya kwikala, nangu ifya kufukama ilyo tulepepa? Iyo, Baibolo tayalandapo pali fyonse ifi. (1 Ishamfumu 8:22; Nehemia 8:6; Marko 11:25; Luka 22:41) Pa kuti amapepo yesu yaleumfwika kuli Lesa, icacindama kupepa mu bufumacumi no mutima usuma.—Yoele 2:12, 13.
7. (a) Bushe ukutila “amene” ni mwi calola? (b) Mulandu nshi cawamina ukwasuka ati “amene” ipepo nga lyapwa?
7 Ngo kulanda ukuti “amene” ipepo nga lyapwa, cena ni mwi calola? Amalembo yatulanga ukuti cisuma ukulanda ukuti “amene” ipepo nga lyapwa, sana sana nga tulepepa ku bantu abengi. (Amalumbo 72:19; 89:52) Ishiwi lya ciHebere ilya kuti ʼa·menʹ nga kulikonka fye lyalola mu kuti “cibe ifyo fine.” Icitabo cilondolola amashiwi ica kwa McClintock na Strong citila, cisuma ukulanda “Amene” ipepo nga lyapwa, pantu ninshi “mulesuminisha ifilandilwe mwi pepo kabili mulefwaya ukuti cibe ifyo fine.” E ico kanshi, uulepepa nga atila “amene” ukufuma pa nshi ya mutima, ninshi alefwaya ukuti fyonse ifyo alanda mwi pepo lyakwe fipokelelwe kuli Lesa. Ilyo uulepepa mu cilonganino atila “amene” ipepo lyakwe nga lyapwa, abasangilweko na bo kuti bayasuka ati “amene” ukusumina ifilandilwe mwi pepo kabili limbi kuti bayasukila mu mutima nangu ukwikatisha ishiwi.—1 Abena Korinti 14:16.
8. Bushe amapepo yesu yamo kuti yapalana shani na ya kwa Yakobo nangu Abrahamu, kabili bushe ukucite fyo kukalanga ukuti tulemona shani ico tulepepela?
8 Limo Lesa kuti atemwa ukumona nga tulefwaya sana ico tulepepela. Kuti cawama nga twapashanya Yakobo umwina kale, uwashombweke na malaika ubushiku bonse ukufwaya ipaalo. (Ukutendeka 32:24-26) Na kabili, kuti cawama nga twapashanya Abrahamu pa kulombe fintu fimo. Abrahamu apaapeete Yehova imiku iingi ukupususha Lote na balungami bambi nakalimo abali no kusangwa mu Sodomu. (Ukutendeka 18:22-33) Na ifwe limbi kuti twapaapaata Yehova pa fintu fyacindama nga nshi kuli ifwe, ukulomba ipaalo lyakwe pantu twalishiba ukutila ni Lesa wa mulinganya, uwa cikuuku kabili uwa luse.
Ni Finshi Ifyo Twingapepela?
9. Finshi tulingile ukubikako sana amano mu mapepo yesu?
9 Ibukisheni ukuti Paulo atile: “Muli fyonse lekeni ifya kulomba fyenu fiishibikwe kuli Lesa.” (Abena Filipi 4:6) Kanshi mu mapepo ayo tupepa fweka kuti twalanda pali fyonse ifikumine imikalile yesu. Na lyo line, ico tufwile ukubikako sana amano, kupepela ifikumine ubufwayo bwa kwa Yehova. Natulepashanya Daniele muli ici. Ilyo Lesa akandile abena Israele pa mulandu wa kubembuka, Daniele apaapeete Yehova ukuti ababelele uluse ilyo atile: “Mwishimba, pa mulandu wa mwe bene, mwe Lesa wandi, [pa mulandu we] shina lyenu.” (Daniele 9:15-19) Bushe na ifwe ilyo tulepepa tulabika amano ku kufwaya ukuti abantu bonse bakacindike Yehova no kuti fyonse ifyo Lesa afwaya fikacitike?
10. Twaishiba shani ukuti tacalubana ukupepela ifyo tulefwaya Lesa ukutucitila?
10 Lelo kwena, tacabipa ukupepela ne fintu ifyo tulefwaya Lesa ukutucitila. Ica kumwenako fye, nga filya uwaimbile amalumbo apepele, kuti twapepa kuli Lesa ukutwafwa ukwishiba bwino ifyaba mu Baibolo ifyakosa ukumfwa. Uwaimbile amalumbo apepele ukuti: “Nengeni ukwiluka, no kuleka ndesunga amalango yenu, awe ndeyabaka umutima wandi onse.” (Amalumbo 119:33, 34; Abena Kolose 1:9, 10) Yesu “apaapeete no kulomba pamo no kukuuta kukalamba ne filamba kuli Wene uwali na maka ya kumupususha ku mfwa.” (AbaHebere 5:7) Pa kucite fyo, atulangile ifyo cacindama ukulomba kuli Lesa ukutwafwa nga tuli no bwafya nangu tulepita mu bucushi. Ilyo Yesu asambilishe abasambi bakwe ifya kupepa, atile bafwile ukupepela ne fyo balefwaya Lesa ukubacitila, ifili nga ukubelelwa uluse no kusanga ifya kulya fya cila bushiku.
11. Bushe ipepo kuti lyatwafwa shani ukucimfya amatunko?
11 Mwi pepo lya We Shifwe, Yesu atile tulingile ukupepa no kuti: “Mwitutwala mu kutunkwa, lelo tupokololeni ku mubifi.” (Mateo 6:9-13) Inshita imbi afundile abasambi ukuti: “Loleni kabili akupepeni, pa kuti mwi-ingila mu matunko.” (Mateo 26:41) Calicindama ukupepa ilyo amatunko yaisa. Limbi kuti twatunkwa ukusuula ifishinte fya mafunde ya mu Baibolo ku ncito nelyo ku sukulu. Abashili baNte kuti batweba ukuya na bo ku kucita fimo ifyo Abena Kristu ba cine bashifwile kucita. Bambi na bo kuti batweba ukucita fimo ifyapusana ne fishinte fya mafunde yalungama aya mu Baibolo. Nga kwacitika ifya musango yo, tulingile ukupepa nga filya Yesu atufundile. Natulepepa ilyo itunko talilaisa na lintu lyaisa, natulelomba kuli Lesa ukuti atwaafwe ukukosa ilyo tulemubombela.
12. Ni finshi ifitusakamika ifingatulenga ukupepa kuli Lesa, kabili bushe Yehova akacitapo shani?
12 Ababombela Lesa muno nshiku balacula ku mafya yalekanalekana, ne fibasakamika na fyo fingi sana. Ukulwala na malangulusha pamo ne fyabipa fimbi ificitika muno calo e fisakamika sana abengi. Pa kuti fye umuntu akumanishe ififwaikwa mu mikalile ni nkondo. Ala tulatemwa ukwishiba ukuti Yehova alomfwa amapepo ya babomfi bakwe ayo bapepa pa fya musango yu! Amalumbo 102:17 yalanda pali Yehova ukuti: “Akaalukila kwi pepo lya wabulwa, kabili takasuule ipepo lyabo.”
13. (a) Ni finshi ifitukumine ifyo twingalanda mu mapepo yesu? (b) Shimikeni icacitike ku muntu umo uwapepele kuli Lesa.
13 Na kuba, icili conse icikumine umulimo wesu kuli Yehova nelyo icikumine bucibusa bwesu nankwe, calilinga ukulandapo mwi pepo. (1 Yohane 5:14) Nga mulefwaya ukusala fimo ifya kucita ifikumine icupo nangu incito, nangu mulefwaya ukubombesha mu mulimo wa kushimikila, mwitiina ukulanda na Lesa pa fya musango yu fyonse, pepeni ukuti amupeele amano ya kwishiba ifya kucita. Ica kumwenako fye, umukashana umo ku Philippines alefwaya ukutampa bupainiya, nomba ilya nshita ninshi talaingila incito. Ashimiko kuti: “Kasuba kamo pa Cibelushi, nalipepele kuli Yehova ukwabula ukupita mu mbali ukuti ndefwaya ukutampa bupainiya. Bulya bwine bushiku ilyo naile mu kushimikila, nashiliile umukashana umo ifi icitabo. Ukwabula no kwishiba icalengele, uyu mukashana atile: ‘Nga mwabuuka fye pali Cimo ulucelo, mukaye pa sukulu nsambilila.’ Na ine e kumwipusha ati, ‘Mu kucita cinshi?’ Na o atile balefwaya uwa ncito, kabili batile nga amoneka fye, akatampa no kubomba. E fyo naileko kabili bulya bwine bushiku nalitampile no kubomba. Nalipapile sana ifyo incito yamoneke.” Ifyapalako fyalicitika na ku Nte sha kwa Yehova na bambi abengi sana. Kanshi mwilawayawaya ukupepa kuli Lesa ukumweba fyonse ifili ku mutima!
Bushe Kuti Twapepa Nga Natulufyanya?
14, 15. (a) Mulandu nshi umuntu ashilingile kumfwila umwenso wa kupepa nga nalufyanya? (b) Ukulunda pa mapepo ya muntu umwine, cinshi cimbi icikafwa uulufyenye ukuwamya bucibusa na Lesa?
14 Bushe ipepo kuti lyayafwa shani umuntu nga nalufyanya? Bamo abalufyanya balatiina ukupepa pantu balomfwe nsoni. Ala ukucite fyo takwawama iyo. Natulangilile: Abensha indeke balishiba ukuti nga baluba mu muulu, kuti balanda na bali pa nshi ku cibansa ca ndeke pa kuti beshibe ifya kwenda. Cinshi cingacitika nga ca kuti uule-ensha indeke talefwaya ukulanda na bali pa nshi pantu aletiina ukumuseka ukutila naluba? Indeke kuti yaya fye iciyeyeye! E cingacitika na ku muntu nga nalufyanya nomba aleumfwe nsoni ukupepa, ifintu kuti fyamubipila ukucilapo. Ukumfwe nsoni pa co acitile takufwile ukulenga umuntu ukutiina ukulanda na Yehova. Na kuba, Lesa afwaya abacita ifilubo ifyabipisha ukupepa kuli ena. Kasesema Esaya akoseleshe ababembu mu nshiku shakwe ukupepa kuli Yehova, “pantu akabalekelela apakalamba.” (Esaya 55:6, 7) Kwena, umuntu nga nalufyanya afwile no ‘kusengula ku cinso ca kwa Yehova,’ e kutila ukupaapaata ukuti amubelele uluse. Alingile ukuleka ifyabipa no kulapila no mutima onse.—Amalumbo 119:58; Daniele 9:13.
15 Umuntu nga nalufyanya, kwaliba umulandu na umbi uo cawamina ukupepa. Umusambi Yakobo alandile pa muntu uushilekonka bwino amafunde ya kwa Lesa ukuti: “Ete abakalamba ba cilonganino bese kuli wene, kabili bapepe pali wene, . . . na Yehova akamwimya.” (Yakobo 5:14, 15) Ca cine ukuti umuntu nga nalufyanya alingile ukuyebelela ulubembu lwakwe kuli Yehova mwi pepo, lelo afwile ukulomba na bakalamba mu cilonganino ukumupepelako. Ukucite fyo kukamwafwa ukuwamya bucibusa bwakwe na Lesa.
Ifyo Lesa Aasuka Amapepo
16, 17. (a) Bushe Yehova aasuka shani amapepo? (b) Finshi ifyacitike ifiletulanga ukuti Lesa alaasuka amapepo ayakuma umulimo wa kushimikila?
16 Bushe Lesa aasuka shani amapepo? Yamo alayasuka bwangu kabili kuti twaishiba fye ilyo line ukuti nayasuka ipepo lyesu. (2 Ishamfumu 20:1-6) Yambi na yo nakalimo te kuti aasuke ilyo line, kabili nga tatucenjele kuti twafilwa no kwishiba nga ca kuti nayasuka. Nga filya Yesu afundile mu cilangililo ca kwa mukamfwilwa uwali no mukoosha wa kubwelela kuli kapingula, tufwile ukuba no mukoosha wa kupepela ifintu fimo. (Luka 18:1-8) Lelo, tulingile ukwishiba ukuti nga tulepepela ifilingene no kufwaya kwakwe, Yehova takatwasuke ukuti: “Wimpamfya.”—Luka 11:5-9.
17 Ababombela Yehova balimona ifingi ifilanga ukuti Lesa alaasuka amapepo. Ilingi line mu mulimo wa kushimikila e mo ico cimoneka sana. Cimo icacitike, abanakashi babili Abena Kristu baleshiila abantu ifitabo filanda pa fyaba mu Baibolo mu cifulo cimo icabela mu mishi ku Philippines. Ilyo bapeele umwanakashi umo trakiti, atampile ukulila. Atile: “Mailo ubushiku nalipepele kuli Lesa ukuti akantumine aba kumfunda Baibolo, nomba ifi twakumana nenu, Lesa ayasuka ipepo lyandi.” Tapakokwele, ulya mwanakashi atampile ukuya ku kulongana ku Ng’anda ya Bufumu. Na cimbi, lwa ku kapinda ka ku kuso aka Asia kwine, munyinefwe umbi na o aletiina ukushimikila mu cikuulwa cimo icacingililwa sana umwaba amayanda ayengi. Lelo alipepele kuli Yehova kabili alishipile no kwingila muli ico cikuulwa. Aile pa ng’anda imo no kukonkonsha kabili mwafumine umukashana. Ilyo munyinefwe alandile ico akonkele, umukashana atampile ukulila. Atile alafwaya Inte sha kwa Yehova kabili alapepa kuli Lesa ukumwafwa ukubasanga. Munyinefwe alitemenwe kabili amulangile icilonganino ca Nte sha kwa Yehova icabela kulya kwine.
18. (a) Cinshi tufwile ukucita ilyo Lesa ayasuka amapepo yesu? (b) Cikaba shani kuli ifwe nga tulepepa lyonse?
18 Ca cine, ipepo cintu icisuma nga nshi. Yehova alomfwa kabili alaasuka amapepo yesu. (Esaya 30:18, 19) Na lyo line, tulingile ukubika amano ku kwishiba ifyo Yehova aleyasuka amapepo yesu. Nakalimo takaasuke ukulingana ne fyo tule-enekela. Lelo nga twaishiba ukuti nayasuka ipepo lyesu, tatufwile kulaba ukumutasha no kumulumbanya. (1 Abena Tesalonika 5:18) Na kabili, lyonse fye natuleibukisha ukufunda kwa mutumwa Paulo ukwa kuti: “Muli fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela.” E ico kanshi, landeni na Lesa lyonse mwi pepo. Nga mulecite fyo, ico Paulo alandile ukuti e cicitika ku bantu abo Lesa aasuka amapepo yabo, ninshi e cikacitika na kuli imwe, “umutende wa kwa Lesa uwacila amatontonkanyo yonse ukalinda imitima yenu na matontonkanyo yenu.”—Abena Filipi 4:6, 7.
Kuti Mwayasuka Shani?
• Mapepo nshi ayalekanalekana ayo twingapepa?
• Kuti twapepa shani kuli Lesa?
• Ni finshi ifyo twingalandapo mu mapepo yesu?
• Bushe ipepo lyacindama shani umuntu nga nalufyanya?
[Amepusho]
[Ifikope pe bula 29]
Ipepo lya kufuma pa nshi ya mutima lilatwafwa ukucimfya amatunko
[Ifikope pe bula 31]
Mwi pepo, tulatasha Lesa, tulalanda nankwe pa filetusakamika no kupepela ifyo tulefwaya