“Pa Mulandu wa Kalumendo ka Myaka fye 9”

LYONSE Inte sha kwa Yehova nga shaya pa ng’anda ya kwa Wiesława, uwikala ku kapinda ka ku kulyo aka Poland, alekaana ukulanda na bo, kabili alebatasha fye no kubeba ukuti baleya. Ubushiku bushilile kantu, ka Samuel akalumendo ka myaka fye 9 kailekonkonsha pa mwinshi ilyo kali na banyina. Uyu muku wena Wiesława alisumine ukumfwa ku mashiwi ya mu Baibolo kabili alipokele na magazini yalelanda pali paradaise pe sonde.

Ne co mukwai inshita ya kusefya Icibukisho ca mfwa ya kwa Yesu Kristu na yo yalipalamine, Samuel alefwaya ukuyaita Wiesława pa kuti akayesangwa ku kusefya kwacindamisha. Kanshi, aka kalumendo kaile na banyina ku kuyamutandalila na kabili, uno muku wena kaile na kapepala apo balembele ubwite. Ilyo amwene ukuti akalumendo nakafwala ubusaka, Wiesława alilombele ukuti abale afumepo panono kabili ailefwala ubusaka. Ilyo abwelele, alikutike ku fyo Samuel alemweba, alisumine ubwite, no kumwipusha ati: “Bushe nkese fye neka nangu nkese na balume bandi?” Kabili alimwebele no kuti: “Abalume bandi nga tabakese, ine nkesa. Ico nkeshila pantu ni we unjitile Samuel, ababa ni bambi, nga nshaishileko.” Samuel alitemenwe pantu ulya mwanakashi alifikilishe icilayo cakwe.

Ilyo balelanda ilyashi lya Cibukisho, Samuel aikele mupepi na Wiesława kabili alemulanga na malembo ayo balebelenga. Alitemenwe. Alitemenwe ifyo basefeshe Icibukisho kabili alitashishe pa kutila ifintu ifyakosele kuli ena balifilondolwele mu mashiwi ayaleumfwika. Kabili alitootele icine cine pa fyo bamupokelele na pa cikuuku cali na ba mu cilonganino. Ukufume lyo line, Wiesława alicindika nga nshi amashiwi ya kwa Lesa, kabili alitampa no kulongana lyonse ne Nte sha kwa Yehova. Tapakokwele apo alandile ukuti: “Te pa nsoni pa fyo kale nalekaana ukumumfwa ilyo mwaleisa

pa ng’anda pa mwandi. Kabili ningile fye ukusumina ukuti nalikutike ku mashiwi yenu pa mulandu wa kalumendo ka myaka fye 9, ka Samuel.”

Inte sha kwa Yehova abaice abengi, kwati ni filya fine Samuel uwa ku Poland acitile, balalumba Lesa kabili bamulumbila na mu micitile yabo isuma. Ngo li musepela, nobe wine limbi kuti wayafwilisha abantu aba cishinka ukwisacindika amashiwi ya kwa Lesa.