Amepusho Ukufuma ku Babelenga

Cinshi icilonganino cilingile ukucita nga ca kuti Umwina Kristu uuleensha motoka apanga ubusanso ica kuti mwafwa na bantu?

Baeluda balingile ukufwailisha ukumona nga ca kuti uwaleensha kuti apeelwa umulandu wa mulopa. Umulandu umo balingile ukucitile fyo wa kuti bafwile ukucingilila icilonganino ku kuba no mulandu wa mulopa. (Amalango 21:1-9; 22:8) Uwaleensha motoka iyali mu busanso akapeelwa umulandu wa mulopa nga ca kuti taleensha bwino nelyo nga alipulile mu mafunde ya buteko aya pa musebo nelyo aya kuicingilila. (Marko 12:14) Lelo kuli na fimbi ifyo bengatontonkanyapo.

Nangu ca kuti umwina Israele uwaipeye umunankwe mu kukanaishiba alebutukila ku mushi wa kushinamo, balemulubulwisha. Nga basanga ukuti tamwipeye ku mufulo, balemuleka kabili aletwalilila ukwikala mu mushi wa kushinamo pa kuti uwa kulandula umulopa wa kwa munyina tamwipeye. (Impendwa 35:6-25) Kanshi Umwina Kristu nga apanga ubusanso ubwa kuti na bantu bamo bafwa, baeluda balingile ukufwailisha pa kuti bamone nga ali no mulandu wa mulopa. Ifyo icilye nelyo aba mu buteko bengalanda te fikapima ifyo icilonganino cikapingula umulandu.

Tutile, icilye catila uwaleensha ali no mulandu pantu alipula mu mafunde ya pa musebo, baeluda abalefwailisha bena kuti basanga ukutila tali no mulandu wa mulopa pantu tapali ico ali no kucita ku kucilikila ubusanso. E lyo nangu icilye citile tali no mulandu, baeluda bena kuti basanga ukuti ali no mulandu wa mulopa.

Ilyo balepingula, baeluda abalefwailisha umulandu bafwile ukupingula ukulingana na Malembo e lyo ne fishinka, e kutila uwaleensha nga asumina ukuti alilufyanya e lyo bakambone babili nelyo batatu abalipo ilyo ubusanso bwalecitika nabo basumina ukuti alilufyenye, lyena kuti apeelwa umulandu wa mulopa. (Amalango 17:6; Mateo 18:15, 16) Nga asangwa no mulandu wa mulopa, baeluda bafwile ukupanga komiti ya bupingushi. Abali muli komiti nga bamona ukuti nalapila, bakamwebaula ukulingana na Malembo kabili akaba pa fibindo, e kuti bakamulesha ukubombako imilimo ya mu cilonganino. Te kuti abe eluda nelyo umubomfi utumikila. E lyo kuti bamubika pa fibindo na fimbi. Kabili, akalubulula na kuli Lesa pa mulekelesha wakwe uwalengele ukuti kube ubusanso umwafwile abantu.—Abena Galatia 6:5, 7.

Tutile limbi imiceele tayali bwino ilyo kwali ubusanso, nga e fyo cali lyena namutekenya aalingile ukubikako sana amano. Nga aleshipula, ali no kwimika motoka no kutusha mpaka aleka ukushipula, nelyo kuti apeela umbi ukuti enshe.

Inga ca kuti namutekenya alebutusha sana? Nga Umwina Kristu alebutusha ukucila apo alingile ukwendela, ninshi afilwa ukupeela “ifya kwa Kaisare kuli Kaisare.” Kabili cilelanga no kuti tacindamika ubumi pantu motoka nga yabutuka sana kuti mwafuma ubusanso. (Mateo 22:21) Tontonkanyeni na pali ici. Ninshi eluda aleimika ica kumwenako nshi nga ca kuti talebikako amano ku kukonka amafunde ya pa musebo nelyo nga ca kuti alepulamo fye ku mufulo?—1 Petro 5:3.

Abena Kristu tabalingile ukupeela bambi inshita iinono iya kufika pa cifulo apo balefwaikwa ica kuti babutusha sana motoka pa kuti becelwa. Ilingi line, icifwaikwa kubeba ukwima ilyo kucili inshita iikalamba nangu ukwalula inshita ya kucita ifyo mulefwaya pa kuti bende ukwabula ukulabutusha motoka. Nga balecita ifi, Abena Kristu tabakaletunkwa ukulabutusha sana, lelo cikanguka ukulakonka amafunde ya pa musebo aya “bakateeka bacilamo.” (Abena Roma 13:1, 5) Ici cikalenga abensha bamotoka ukukanapanga ubusanso ubwingalenga ukuti babe no mulandu wa mulopa. Kabili cikalenga bambi ukulabapashanya kabili bakatwalilila ukuba na kampingu musuma.—1 Petro 3:16.