Balitemenwe Sana Amafunde ya kwa Yehova

BA ALBERT D. SCHROEDER, abaali mwi Bumba Litungulula ilya Nte sha kwa Yehova, bapwishishe umulimo ya kubombela Yehova pano isonde pali Citatu pa March 8, 2006. Baali ne myaka 94 kabili babombele myaka ukucila pali 73 mu mulimo wa nshita yonse.

Munyinefwe Schroeder afyalilwe ku Saginaw, mu Michigan ku U.S.A., mu 1911. * Ilyo ali umwaice, banakulu abafyele banyina balimusambilishe icine ca mu Baibolo, kabili alitemenwe sana ukulabelenga Baibolo. Munyinefwe Schroeder asambilile iciLatini, ululimi lwa bena German, na buinjiniya bwa malaiti pa University of Michigan. Nangu cali fyo, ilyo asambilile ifingi pali Baibolo, alilekele amasambililo yakwe no kutendeka umulimo wa nshita yonse uwa kubilisha Ubufumu. Mu 1932 atendeke umulimo wa pa Bethel ku Brooklyn, mu New York.

Mu 1937, ilyo munyinefwe Schroeder ali ne myaka 26, balimusontele ukulaangalila umulimo wa Nte sha kwa Yehova ku Britain. Ukubombesha kwakwe mu mulimo wa kushimikila kwalengele bambi mu Britain ukutendeka umulimo wa nshita yonse. Umulumendo babombele sana nankwe pa Bethel ya ku London ni John E. Barr. Kabili pa numa balibombele bonse mwi Bumba Litungulula pa myaka iingi.

Ilyo kwali inkondo abengi balishibe ifyo munyinefwe Schroeder alebomba umulimo wa Nte sha kwa Yehova. Mu August 1942 balimutamfishe mu Britain. Mu September afikile ku Brooklyn, pa numa ya bulendo ubwabipa nga nshi pali Bemba wa Atlantic.

Pali iyo nshita Inte sha kwa Yehova baleenekela ukuti ilyo Inkondo ya Calo iya Bubili ikapwa bakakwata umulimo uukalamba uwa kushimikila. Munyinefwe Schroeder alipapile kabili alitemenwe ilyo bamwebele umulimo ali no kulabomba. Bamupeele umulimo wa kwafwa ukulapekanya ifyebo bali no kulasambilisha pe Sukulu lya Watchtower Bible School of Gilead. Pa myaka iingi ali kafundisha, aleafwa bamunyinefwe na bankashi ukusambilila bumishonari. Abengi abo asambilishe mwi sukulu lya Gilead ne Sukulu lya Butumikishi bwa Bufumu balebukisha sana ifyo alebasambilisha bwino. Alitemenwe sana ukusambilisha bambi ukutemwa amafunde ya kwa Lesa kabili alekomaila sana pa mulandu cawamina ukwishiba Yehova.

Mu 1956, munyinefwe Schroeder aupile baCharlotte Bowin. Mu 1958 balikwete umwana umwaume Judah Ben. Munyinefwe Schroeder ali umulume kabili wishi umusuma uwa Bwina Kristu. Mu 1974 atendeke ukubomba mwi Bumba Litungulula, kabili abo alebomba nabo baletemwa sana ifyo ali uwashilimuka. Aali uwa cikuuku, kabili uwaicefya, ne cacililepo alefwaya ukulumbanya ishina lya kwa Lesa ilikalamba. Ukwabula no kutwishika munyinefwe Schroeder alipokelela icilambu cakwe ica ku muulu ngo Umwina Kristu wasubwa uwatemenwe sana amafunde ya kwa Yehova.—Amalumbo 1:2.

[Futunoti]