“Inshiku sha Kulekelesha” ni Shili Kwi?

BUSHE mwalitala amutontonkanya pa fikamucitikila, ne fikacitikila ulupwa lwenu e lyo ne fibusa fyenu ku ntanshi? Abengi balabikako amano ku kumfwa ilyashi ku mulabasa pa kuti beshibe ifyo ifilecitika mwi sonde fingabakuma. Lelo ukulabelenga sana Icebo ca kwa Lesa icapuutwamo kuti kwalenga ukwishiba bwino sana ifilecitika. Umulandu twingeshibila ni co Baibolo yaseseme kale sana ifilecitika e lyo ne fikacitika ku ntanshi.

Ica kumwenako, ilyo Yesu Kristu ali pe sonde, alilandile na bantu abengi nga nshi pa Bufumu bwa kwa Lesa. (Luka 4:43) Kuti twaenekela ukuti abantu abalekutika kuli ena, balefwaya ukwishiba ilyo ubo Bufumu ubwawamisha bwali no kwisa. Ilyo kwashele inshiku shitatu isha kuti bepaye Yesu apabula umulandu, abasambi bakwe bamwipwishe ukuti: “Cinshi cikaba icishibilo ca kubapo kwenu [pa Bufumu] ne ca mpela ya bwikashi?” (Mateo 24:3) Yesu abebele ukuti ni Yehova Lesa fye eka e waishiba inshita ine ine lintu Ubufumu buli no kuteka isonde lyonse. (Mateo 24:36; Marko 13:32) Nangu cibe fyo Yesu na bambi baliseseme ifyali no kucitika pe sonde, ifyo abantu bali no kwishibilako ukuti Kristu Aleteka.

Ilyo tushilalanda pa fya kwishibilako ukuti tuleikala mu “nshiku sha kulekelesha” isha buno bwikashi, lekeni tulande panono pa cintu cacindama icacitike ku muulu. (2 Timote 3:1) Mu 1914 Yesu Kristu ali Imfumu mu muulu. * (Daniele 7:13, 14) Pa numa fye ya kumupeela amaka ya kuteka, Yesu alicitilepo cimo. Baibolo itweba ukuti: “Kwabuukile inkondo mu muulu: Mikaele na bamalaika bakwe balwile ne cing’wena, ne cing’wena na bamalaika ba ciko fyalilwile.” (Ukusokolola 12:7) Yesu Kristu e “Mikaele malaika mukalamba” etwa ifyo pa mulandu wa cifulo akwata ku muulu. * (Yuda 9; 1 Abena Tesalonika 4:16) Icing’wena ni Satana Kaseebanya. Bushe cinshi cacitike kuli Satana e lyo na bamalaika bakwe ababipa abetwa ifibanda? Balibacimfishe, kabili ‘babapoosele pe sonde,’ nelyo mulwelele. (Ukusokolola 12:9) Ici calengele “imyulu na baikalamo,” e kutila abana ba kwa Lesa aba cishinka aba mu muulu ukwanga. Nangu cibe fyo, abantunse tabasekelele nga filya bamalaika bayangile. Baibolo yasobele ukuti: “Kalanda kwi sonde, pantu Kaseebanya naikila pali imwe, ali ne cipyu cikalamba, pa kwishiba ukuti ali ne nshita inono.”—Ukusokolola 12:12.

Apo Satana alikalipe cibi, alileta ubulanda, ukucula na mafya ku baikala pe sonde. Nangu cibe fyo ubu bulanda tabwakabeko pa nshita ikalamba bukaba fye bwa pa “nshita inono.” Baibolo ilosha kuli iyi ine nshita ukuti “nshiku sha kulekelesha.” Tufwile ukutemwa pa kwishiba ukuti nomba line fye Kaseebanya takakwate amaka nangu panono aya kusonga abantu pe sonde. Nomba, fishibilo nshi ifitulanga ukuti tuleikala mu nshiku sha kulekelesha?

[Amafutunoti]

 [Abatumtuminishe Ukubofya Ifikope Fili pe bula 2]

PA NKUPO: Foreground: © Chris Stowers/Panos Pictures; background: FAROOQ NAEEM/AFP/Getty Images