Amepusho Ukufuma ku Babelenga

Mulandu nshi Baibolo ya New World Translation ilandila pa Amalango 31:2 ukuti Mose atile “capwa, nshakasuminishiwe ukufuma no kwingilamo” nge ntungulushi ya bena Israele, ilyo amaBaibolo yambi yena yatila nafilwa nomba ukufuma no kwingila?

Nangu ca kuti ishiwi lya ciHebere ilyo babomfya pali ili ilembo kuti lyapilibula aya yene amashiwi yabili aya kuti nshakasuminishiwe nelyo aya kuti nafilwa, amaBaibolo yamo aya ciNgeleshi yena yatila napamo aya mashiwi yalola mu kuti amaka ya kwa Mose yalipwile ilyo ali mupepi no kufwa, ica kuti alefilwa kubomba imilimo ya kutungulula abena Israele. Ku ca kumwenako, nangu fye ni Baibolo ya Diocese of Mbala ilanda ukuti Mose atile: “Ndi ne myaka umwanda umo na makumi yabili nomba; kabili ndefilwo kufuma no kubwela.” E fyo na Baibolo wa Mushilo uwa mu 1983 alanda ilyo atila: ‘Ine nomba ndi ne myaka umwanda umo na makumi yabili, kabili nshikwete maka aya kuti ndemutungulula.’

Lelo pa Amalango 34:7 pena palanda ukuti nangula Mose alikotele, amaka yakwe yena tayapwile. Palya patila: “Mose ali ne myaka umwanda umo na makumi yabili pa kufwa kwakwe: amenso yakwe tayanakile, nangu ukuluma kwakwe takwapomponteke.” Kanshi Mose alikwete amaka ya kutungulula abena Israele, lelo Yehova umwine e ushalefwaya ukuti Mose atwalilile ukubatungulula. Ici, cishinka pantu Mose umwine asosele ati: “Yehova anjebele, ati, Tawakaabuke Yordani uyu.” Napamo icalengele ca kuti Yehova alebwekeshapo ukweba Mose filya fine ifyo amwebele pa menshi ya Meriba.—Impendwa 20:9-12.

Mose alikeele nshiku ishingi kabili ali no bumi busuma ubo twingalekanya mu fiputulwa fitatu. Imyaka 40 aikele ku Egupti, uko “asambilishiwe amano yonse aya bena Egupti,” kabili “ali uwa maka mu cebo na mu mulimo.” (Imilimo 7:20-22) Imyaka na imbi 40, aikele ku Midiani. Kulya na ko asambilileko imibele isuma iya kwa Lesa iyo alekabila ukukwata pa kuti akatungulule bwino abantu ba kwa Yehova. Na mu kulekelesha, aikele imyaka 40 ukutungulula abena Israele. Nomba, mu nshita ya kuti Mose atwalilile ukulatungulula abena Israele, Yehova asalile Yoshua ukuti e wali no kutungulula uluko ukulwabusha Umumana wa Yordani no kulwingisha mu Calo ca Bulayo.—Amalango 31:3.

E ico kanshi New World Translation yena yalilungika ukupilibula Amalango 31:2. Mose tali na kutwalilila ukutungulula abena Israele, te pa mulandu wa kuti takwete amaka, lelo ni pa mulandu wa kuti Yehova tamusuminishe.