Bushe Lesa Kuti Twamwishiba?
Bushe Lesa Kuti Twamwishiba?
“Awe ubu e bumi bwa muyayaya, ukuti baleishiba . . . mwe lesa wa cine mweka.”—Yohane 17:3.
“UMUTUMWA Paulo atile: “We kushika kwa bucindami bwa kwa Lesa na mano yakwe no kwishiba kwakwe!” Kabili alundilepo no kutila: “Ifya bupingushi fyakwe tafingelulwa ne mibele yakwe taingelukwa!” (Abena Roma 11:33) Bushe tufwile ukutontonkanya ukuti aya mashiwi yalolele mu kuti abantu te kuti bakwate ukwishiba na amano nga filya Lesa akwata, ica kuti teti bamwishibe nelyo ukwishiba ukufwaya kwakwe?
Abantu abatontonkanya sana pa fyo abantu basuminamo pali Lesa batila ca cine Lesa te kuti tumwishibe. Icitabo ca The Encyclopedia of Religion cilanda pa kutontonkanya kwa musango yo ukutila: “Lesa alicila icili conse ico twingeshiba pali ena. . . . Te kuti tumupeele ishina kabili te kuti tumulondolole. Ishina ilili lyonse nelyo ifyo twingamulondolola te kuti fifike pa fyo aba, Lesa alicila pali . . . fyonse. . . . Taba ngo muntu uo twingeshiba, te kuti tumwishibe.” *
Magazini ya Newsweek yatile, abantu abengi abashipepa balitemwa aya “mano yapya,” basumina ukuti “kwaba fye icishinka cimo, ne ci ca kuti takwaba icine.”
Nangu cabe fi, abengi balafwaya ukwishiba ico babelako lelo balifilwa. Ilyo balemona uko abantu balecula ku nsala, amalwele, no lukaakala, balaba no bulanda nga nshi. Kabili ukukanaishiba ico babelako kuti kwabakalifya sana. Nalimo kuti bafwaisha ukwishiba ico babelako, lelo nga bafilwa batila fye e fyo ubumi bwaba. Ilingi line abantu ba musango yo balaleka ukupepa ku macilici yabo, no kulacita ifintu ifyo abene bamona ukuti e fingabapalamika kuli Lesa. Lelo ilyo bacita ifyo katwishi mukwai nga balatwalilila no kusumina ukuti Lesa eko aba.
Ifyo Baibolo Ilandapo
Abo bonse abacetekela Baibolo kabili abasumina ukuti ni muli Yesu Kristu e mo Lesa alandila, kuti batemwa sana kwishiba ifyo Baibolo ilanda pali ili lyashi. Nalimo namwibukisha ukuti inshita imo Yesu alandile pa misebo ibili, ‘umusebo uutwala ku bonaushi uwasaalala kabili uwapabuka’ . . . no ‘musebo uutwala ku bumi uwafyenenkana.’ Yesu alilondolwele ifyo mwingeshiba abaleenda pali iyi misebo, ilyo atile: “Ku fisabo fyabo e ko mukabeshibila.” Bushe fisabo nshi ifyo mwingabeshibilako? Te ku fyo balanda, lelo ni ku fyo bacita. Yesu alilondolwele bwino sana ilyo atile: “Te onse uutila kuli ine, ‘Shikulu, Shikulu’ akengila mu bufumu bwa mu muulu, kano uucita ukufwaya kwa kwa Tata uwaba mu muulu e ukengilamo.” Kanshi tatufwile fye ukulatila twalisumina muli Lesa, lelo tulingile no kulacita ifyo afwaya. E co, kanshi, intanshi tulingile ukwishiba ifyo Lesa afwaya.—Mateo 7:13-23.
Yesu alandile ukwabula no kutwishika ukuti abantu kuti baishiba Lesa, atile: “Awe ubu e bumi bwa muyayaya, ukuti baleishiba imwe, mwe Lesa wa cine mweka, no yo mwatumine, Yesu Kristu.” (Yohane 17:3) Nangu cibe shani nga twabombesha tukanonka amano kabili tukeshiba Lesa. Ukunonka amano no kwishiba Lesa kwaliwama nga nshi pantu Lesa akapeela umweo wa muyayaya kuli bonse abacite fyo.
[Futunoti]
^ para. 4 Ifi fine e fyo aba mu mipepele ya ku fyalo fya ku Kabanga, abaHindu, abaTao, na baBuddha, basuminamo.
[Icikope pe bula 4]
Umusebo wafyenenkana uutwala ku bumi