Lekeni Ubushiku bwa Bwinga Bwenu Bukabe Ubwa Kusangalalapo Kabili Ubwacindama

PAPITA imyaka 60 apo baGordon bapishishe ubwinga bwabo. Batila: “Ubushiku napishishe ubwinga bwalicindeme nga nshi kabili nalisansamwike sana.” Mulandu nshi ubushiku bwa kupisha ubwinga bucindamina sana ku Bena Kristu ba cine? Buba bushiku ubo balapa imilapo ku bo batemwa nga nshi, e kuti abena mwabo na Yehova Lesa. (Mateo 22:37; Abena Efese 5:22-29) Ukwabula no kutwishika abalepanga ukuupana balafwaya ukusansamuka sana pa bushiku bwa kupisha ubwinga bwabo, kabili balafwaya no kucindika Katendeka wa cupo.—Ukutendeka 2:18-24; Mateo 19:5, 6.

Bushe shibwinga kuti acita shani pa kulenga ubu bushiku ubwa kusangalalapo ukuba ubwacindama? Cinshi nabwinga alingile ukucita pa kuti alange akatiina ku mulume wakwe na kuli Yehova? Nga bambi abasangwako kuti balenga shani ubu bushiku ukuwama nga nshi? Ukutontonkanya pa fishinte fimo ifya mu Baibolo kuti kwatwafwa ukwasuka aya mepusho, kabili ukukonka ifyo fishinte kuti kwacefyako amafya ayengalenga ubu bushiku ukumoneka kwati tabwacindama.

Nani Washingamwa Ukupekanya Ubwinga?

Mu fyalo ifingi umwiminishi wa Nte sha kwa Yehova kuti aufya abaleupana. Nangu fye ni mu fyalo umwaba ifunde lya kuti aba mu buteko e balingile fye ukuufya abantu, abaleupana kuti bafwaya ukuti kukabe ilyashi lya bwinga ilifuma mu Baibolo. Muli ili lyashi shibwinga balamufunda ifya kubomba umulimo Lesa amupeela uwa kuba umutwe mu lupwa lwakwe. (1 Abena Korinti 11:3) Ukulingana ne ci cishinte, shibwinga e ushingamwa sana ne fintu fyonse ificitika pa bwinga. Lelo, ukupekanya ubwinga no kusefya ukuli konse, kubako ilyo ubushiku bwa bwinga bushilafika. Mulandu nshi shibwinga cingamwafisha ukupekanya ifi fintu?

Cimo icingalenga ca kuti nabwinga nelyo balupwa bakwe nangu aba kwa shibwinga limbi kuti bafwaya ukuti ifintu fikabe ukulingana no mo balefwaila. BaRodolfo abaufya abantu abengi batila: “Limo shibwinga balamupatikisha ukucite fintu ukulingana no mo balupwa balefwaila, sana sana nga e balefumya indalama sha kusefesha. Kuti batemwa ukuti ifyo balefwaya e fyo cikabe pa kusefya ubwinga. Ici kuti calanga ukuti nabasuula umulimo Lesa apeela shibwinga pantu e ushingamwa ukupekanya ifikacitika pali bulya bushiku.”

BaMax abaufya abantu ukucila pa myaka 35 batila: “Caliseeka sana kuli banabwinga ukupingula ifyo ubwinga bukaba na fintu cikaba ilyo bakaya mu kusefya ica kuti shibwinga tabamupeela ishuko lya kulanda ifyo alefwaya ukuti ifintu fikabe.” BaDavid abaufya abantu abengi na bo batila: “Limo bashibwinga tabeshiba ifya kucita, kabili ilingi line tababako pa kupekanya ifyo cikaba pali bulya bushiku.” Bushe shibwinga kuti abomba shani umulimo wakwe bwino bwino?

Ukulanshanya Kulalenga Insansa Ukufulilako

Ukulanshanya kulafwaikwa pa kuti shibwinga engapekanya bwino ubwinga. Baibolo ilanda ukuti: “[Ukushili ukulanshanya kwa fibusa, NW] amapange yafulunganiwa.” (Amapinda  15:22) Icimfulunganya kuti cacepako nga ca kuti shibwinga alanshanya na nabwinga ifyo bakapekanya ubwinga, e lyo na balupwa, na bambi abengamupanda amano pa fyo Baibolo ilanda.

Calicindama ukuti bankobekela intanshi balanshanya ifyo bakapekanya ubwinga. Mulandu nshi? Moneni ifyo baIvan na bakashi babo baDelwyn balandile. Nangu ca kuti intambi sha baIvan na baDelwyn shalipusana, balikala bwino mu cupo pa myaka iingi. BaIvan bebukisha ukuti: “Nalikwete amapange pa fyo ubwinga bwandi bwali no kuba pamo pene no kusefya kubako pa numa. Nalefwaya kube keke ya pa bwinga, abanandi bonse babeko, e lyo nalefwaya Delwyn ukufwala ilaya lya bwinga. Lelo, Delwyn ena alefwaya fye ubwinga ubunono ukwabula na keke, kabili talefwaya fye no kufwala ilaya lya bwinga.”

Bushe aba bankobekela bacitile shani pa kuti bapekanye bwino ubwinga? Balilanshenye mu cikuuku kabili mu bufumacumi. (Amapinda 12:18) BaIvan basosa na kabili ukuti: “Twalibelengele ifipande filanda pa bwinga, pamo nga filya basabankanya mu Ulupungu lwa kwa Kalinda ulwa April 15, 1984. * Ifyebo twabelengele muli ifi fipande fyalengele tulemona ubwinga nge fyo Lesa amona. Na kabili apo intambi shesu shalipusana, bonse babili tatwacitile ukulingana ne fyo twalefwaya, twalilanshenye no kusuminishanya pa fyo ubwinga bwali no kuba.”

BaAret na baPenny nabo bacitile cimo cine. BaAret balanda pa fyo bapekenye ubwinga bwabo, batila: “Ifyo nalefwaya ne fyo Penny alefwaya ukuti ubwinga bwesu bukabe fyalipusene, lelo twalilanshenye no kusuminishanya ifyo bwinga bwali no kuba. Twalipepele ukuti Yehova akapaale ubushiku tukapisha ubwinga. E lyo twaipwishe na abafyashi besu na Bena Kristu bakosoka ukuti batupandeko amano. Ifyo batwebele fyalitwafwile nga nshi kabili ubwinga bwesu bwaliweme sana.”

Ukulanga Umucinshi mu Mifwalile na mu Kuipempenkanya

Abantu bonse benekela shibwinga na nabwinga ukufwala bwino sana pa bushiku bwa bwinga bwabo. (Amalumbo 45:8-15) Nalimo kuti bapoosapo inshita, amaka, ne ndalama ishingi pa kuti fye bashite ifya kufwala ifisuma. Bushe fishinte nshi ifya mu Baibolo ifingabafwa ukusala ifya kufwala ifya mucinshi kabili ifimoneka bwino?

Natulande pa fyo nabwinga afwala. Nangu ca kuti ifya kufwala filapusana ukulingana ne fyo umuntu umwine alefwaya nangu ukulingana ne fyalo, ifishinte fya mu Baibolo fyena filabomba kuli bonse fye. Abanakashi balingile ‘ukufwala ifiyene, pamo no bufuuke na mano ayatuntulu.’ Ici cishinte cilabomba ku banakashi  Abena Kristu pa nshita iili yonse, ukusanshako na pa bushiku bwa bwinga bwine. Icishinka ni ci: Ubwinga ukuwama, te ‘kufwala fye ifya mutengo sana.’ (1 Timote 2:9; 1 Petro 3:3, 4) Ala cilawama sana abaleupana nga bakonka uku kufunda!

BaDavid, abo tulandilepo na pa kubala, basosele ukuti: “Abengi abopana balakonka sana ifishinte fya mu Baibolo, kabili tulingile ukubatasha. Lelo, limo limo, ilaya lya kwa nabwinga na malaya ya nshindishi yaba fye cimbi cimbi, yafimba fye icifuba ilyo inuma yonse ili pa mbilibili nelyo ayapepuka ica kuti mulemona ne fyo bafwele mu kati.” Eluda umo uwakosoka nga akumanya shibwinga na nabwinga inshiku ishinono ilyo kushilaba ubwinga, alabafwa pa kuti ubwinga bwabo bukalemoneka ukuti bwa Bena Kristu. Bushe acita shani? Alabepusha nga ifya kufwala bakafwala fisuma ica kutila kuti bafifwala na ku kulongana. Kwena, ifya kufwala pa bwinga limo kuti fyapusana ku fyo tufwala ku kulongana e lyo limo filingana ne ntambi sha kuli iyo ncende. Nangu cibe fi, filingile ukuba ifisuma kabili ifya mucinshi ifingawamina ukufwala Abena Kristu. Nangu ca kuti abantu bamo kuti bamona kwati amafunde ya mu Baibolo yalyafya ukukonka, Abena Kristu bena balayakonka kabili ici cilabacingilila ku kukonkelesha ifyo aba mu calo bamona ukuti e fisuma.—Abena Roma 12:2; 1 Petro 4:4.

BaPenny batile: “Ico ine na baAret twabikileko sana amano, te fya kufwala no kusefya kubako pa numa, twabikile amano ku bwinga, e kutila ku lyashi lya bwinga ilifuma mu Baibolo. Ilyashi e lyacindamishe sana pa bushiku twapishishe ubwinga bwesu. Ifisuma ifyo njibukisha ukufika na lelo, te fya kufwala nafwele nelyo ifya kulya naliile. Lelo njibukisha sana ifibusa nali na fyo ne nsansa nakwete pa kuupwa ku mwaume uo natemwa nga nshi.” Abena Kristu abalefwaya ukuupana balingile ukulatontonkanya pali ifi ilyo balepekanya ubwinga bwabo.

Ing’anda ya Bufumu Cifulo Icacindama nga Nshi

Abena Kristu abengi bafwaya ukuti ubwinga bwabo bukabele mu Ng’anda ya Bufumu nga ca kuti e ko yaba. Mulandu nshi basalilapo ukwatila ubwinga mu Ng’anda ya Bufumu? Abaupana bamo batile: “Twalishibe ukuti Yehova e wateyenye icupo kabili ca mushilo mu menso yakwe. Ukuupanina mu Ng’anda ya Bufumu, icifulo ico tupepelapo Lesa, kwalengele twishibe ukutula fye pa kubala ukuti Yehova alingile ukuba mu cupo cesu. Cimbi ico twasalilepo ukuupanina mu Ng’anda ya Bufumu ukucila ukuli konse kumbi ca kuti twalefwaya balupwa lwesu abashili Bena Kristu abasangilwe ku lyashi bamone ifyo twacindamika ukupepa Yehova.”

Nga ca kuti baeluda abalolekesha pa Ng’anda ya Bufumu basumina ukuti ilyashi lya bwinga e po likabele, abaleupana balingile ukwishibisha baeluda pa filefwaikwa ilyo kucili inshita. Inshila imo iyo shibwinga na nabwinga bengalangilamo umucinshi kuli balya betile, kufika pa Ng’anda ya Bufumu pa nshita ubwinga bulingile ukutendeka. Ukwabula no kutwishika kuti bafwaya ukuti ifintu fyonse ficitwe mucinshi mucinshi. * (1 Abena Korinti 14:40) Kanshi balingile ukusengauka ukucita ifintu fishalinga pamo nge fya kukobaika ifyo abashili Bena Kristu bakobaika pa menga yabo.—1 Yohane 2:15, 16.

Na basangilwe ku bwinga nabo bene kuti balanga ukuti bamona ubwinga nga fintu Yehova amona. Ica kumwenako fye, tabalingile ukufwaya ukuti ubwinga bucile pa menga yambi, kwati kwali ukucimfyanya kwa kuti bamone ubwinga ubucililepo ukuwama. Abena Kristu bakosoka balishiba no kuti ukusangwa ku lyashi lya bwinga pa Ng’anda ya Bufumu kwalicindama kabili kulanonsha sana ukucila ukusangwa ku mutebeto wa bwinga nelyo ukusefya kumbi ukwingakonkapo. Nga kwaba ifyacitika ifingalenga ukuti mwisangwa konse kubili, kuti cawama sana ukusangwa ku Ng’anda ya Bufumu. BaWilliam ni baeluda kabili batile: “Nga ca kuti ku bwinga pa Ng’anda ya Bufumu kwasangwa fye  abantu abanono e lyo ku kusefya ukubako pa numa kwena kwasangwa abantu abengi, cilanga fye ukuti tabaishiba ifyo ubwinga bwacindama mu menso ya kwa Yehova. Ne lyo bashitwitile ku kusefya, kuti twatungilila shibwinga na nabwinga pa kuyasangwa ku Ng’anda ya Bufumu kabili ici kuti caba bunte kuli balupwa abashipepa.”

Insansa Ishitwalilila Ukubako pa Numa ya Bushiku bwa Bwinga

Muli icino calo ca makwebo, ubwinga buli mwa kusangila indalama ishingi nga nshi. Abafwailisha bamo batile, pa bwinga ubo bamona kwati nabulinga mu United States bapoosapo indalama “$22,000 [K75,240,000], nelyo hafu ya ndalama isho ulupwa lwingafola pa mwaka.” Amalyashi ayo aba makwebo basabankanya yalenga abaleupana abengi nelyo balupwa lwabo ukukongola indalama ishingi nga nshi isha kubomfya fye pali bulya bushiku bumo ishisenda imyaka pa kushibwesha. Iyi te nshila isuma iya kutendekelamo icupo. Abashaishiba ifishinte fya mu Baibolo nelyo abashifwaya kufikonka kuti basalapo ukonaula indalama muli uyu musango, lelo Abena Kristu bena tabacita ica musango yu.

Abena Kristu abengi bacita ubwinga ubwalinga ubushingabalenga ukuipoosa mu nkongole kabili babika sana amano ku lyashi lya bwinga ilifuma mu Baibolo. Ici cilenga ukuti balebomfya inshita yabo ne fyuma ukulingana no kuipeela kwabo kuli Lesa. (Mateo 6:33) Tontonkanyeni pali baLloyd na baAlexandra abatwalilila ukubomba umulimo wa nshita yonse pa myaka 17 ukutula apo baupanine. BaLloyd batila: “Bamo balemona ubwinga bwesu ukuti bunono, lelo ine na Alexandra e fyo twalefwaya ukuti bube. Tatwalemona ubwinga bwesu nge cintu ica kutupoosa mu nkongole, lelo kuli ifwe bwali bushiku bwa kusefya ifyo Yehova ateyenye ukuti ine na Alexandra tube ne nsansa nga nshi.”

BaAlexandra nabo batila: “Natendeke bupainiya ninshi tatulaupana, e lyo nshalefwaya ukuleka bupainiya pa kuti fye ningacita ubwinga ubwa lulumbi. Ubushiku twaupenepo bwalicindeme nga nshi. Lelo bwali e ntendekelo ya cupo cesu ico tukatwalilila ukubamo pa myaka iingi. Twalikonkele ifyo batupandile amano ukuti twikabika fye amano ku bwinga bwesu kabili tulakonka ukufunda kwa kwa Yehova mu cupo cesu. Ukucita ifi kwalenga Yehova ukulatupala sana.” *

Ca cine, ubushiku bwa bwinga bwalicindama nga nshi. Ifyo mukaba ne fyo mukacita pali bulya bushiku kuti fyalanga ifyo mukalaikala mu cupo cenu. E ico, mukashintilile pa kufunda kwa kwa Yehova. (Amapinda 3:5, 6) Mukabike sana amano ku lyashi lya bwinga ilikafuma mu Baibolo. Mukaletungililana pa kuti mukalebomba bwino imilimo Lesa akamupeela mu cupo cenu. Icupo cenu cikakosa ukutula fye pa kutendeka, kabili Yehova akalamupaala ica kuti mukatwalilila ukuba ne nsansa na mu myaka ikakonkapo pa numa ya bwinga.—Amapinda 18:22.

[Amafutunoti]

[Icikope pe bula 29]

Abaleupana balingile ukulanshanya bwino kabili mucinshi mucinshi ilyo balepekanya ubwinga bwabo

[Icikope pe bula 31]

Mukabike sana amano ku lyashi lya bwinga ilikafuma mu Baibolo