Daniel na Baji Yakwe iya ku Citungu

YESU alikalipile intungulushi sha mapepo ishaleimona ishalungama ishakalipe ilyo shamwene abaice balelumbanya Lesa pa cintubwingi. Yesu alibepwishe icipusho icisuma sana ica kuti: “Bushe tamwabelenga ukuti, ‘Mu tunwa twa tunya no tuleonka e mo mwateyanishishe amalumbo’?”—Mateo 21:15, 16.

Daniel ali ne myaka ya kufyalwa 6, alongana mu cilonganino umo balanda ululimi lwa ku Russia mu Germany. Ico acitile bushininkisho ubuletulanga ukuti na baice balalumbanya Yehova. Daniel na banyina e lyo na nkashi yakwe, baile mu kulongana kwa citungu ukwa Nte sha kwa Yehova ku Duisburg. Uyu wine wali e muku wa kubalilapo ukusangwa ku kulongana kushaikulile fi. Fyonse kuli bena fyali fipya: ihotela, cinkupiti wa bantu, ukwikala pa fipuna inshiku shitatu ishituntulu, ulubatisho e lyo ne cilangililo cikalamba. Bushe Daniel aisungile shani? Ali-icindike sana.

Ilyo ukulongana kwa citungu kwapwile, pali Cimo ulucelo ninshi bali ku ng’anda, Daniel aimine lucelocelo ukuya ku sukulu ku nasari. Cinshi cali pe jaketi lyakwe? Paali baji yakwe iya ku kulongana kwa citungu! Banyina bamwebele ukuti: “Ala ukulongana kwalipwa kale, shi fuulako baji lelo.” Daniel abaswike ati: “Ndefwaya bonse beshibe uko naile ne fyo nailesambililako.” E ico afwele baji akasuba fye konse kabili alefwaya ukuti bonse baleimona. Ilyo kafundisha wakwe amwipwishe ico afwalile baji, amushimikile ifyo asambilile ku kulongana kwa citungu.

Pa myaka iingi, abalumendo na bakanshana abengi balilumbanya Yehova. Aba bene e bo Daniel apashenye ilyo ashimikile pali Yehova ku banankwe na kuli kafundisha.