Ifilanda “Impanda Mano” pa fya Kukusha Abana Tafitwalilila Ukubomba

MULI cino calo, abantu abakwata ishuko lya kubomfya kompyuta kuti bafwaya amalyashi pa Intaneti ayafunda abafyashi pa fya kukusha abana kabili mu kwangufyanya fye kuti basanga amalyashi ukucila pali 26 milioni ayalanda pa kukusha abana. Nga ca kuti mwalepwisha fye mineti umo ukusanga ilyashi limo na limo no kulibelenga, umwana wenu kuti akula aya na mu kuikalila ukwabula ukuti mupwishe ukubelenga amalyashi yonse.

Ilyo kushilaba badokota abasambilila pa malwele ya bana ne misango yabo, e lyo na basambilila ifyo abana batontonkanya, kabili ninshi takulaba na Intaneti, ni kwi abafyashi baaleya ku kupandwa amano? Ilingi line, baleya kuli balupwa lwabo. Banyinabo, bashibo, banasenge na banalume, bonse baleiteyanya ukubafunda, ukubapeela indalama, no kubafwa ukusunga abana. Nomba mu fyalo ifingi, abantu abengi nga nshi balefuma ku mushi no kukuukila ku tauni, ne ci nacilenga ukuti ukwampana kwali pa ndupwa kupwe. Muno nshiku, ilingi line abafyashi babomba beka umulimo wakosa uwa kukusha abana.

Uyu e mulandu umo uulengele muno nshiku utubungwe twa kufunda abafyashi ifya kusakamana abana ukufula sana. Umulandu na umbi wa kuti abengi balisumina sana muli sayansi. Ku kupwa kwa myaka ya ba1800, abena Amerika abengi basumine ukuti sayansi kuti yalenga imikalile yonse iya bantu ukuwama. Balemona ukuti sayansi kuti yaafwa na bafyashi ukwishiba bwino ifya kukusha abana! E ico, mu 1899, ilyo aba mu kabungwe ka American National Congress of Mothers bailishenye ukuti “abafyashi tabaishiba ukukusha abana,” abasambilila sana “sayansi” abo baleti ni mpanda mano, bwangu bwangu bali-ipeeleshe ukwafwilisha. Balaile ukwafwa abafyashi abashaishibe ifya kucita pa kukusha bwino abana babo.

Ifitabo Filanda pa Kukusha Abana

Nomba, cinshi ico aba abetwa impanda mano baacita? Bushe abafyashi ino nshita balileka ukusakamikwa sana kabili bushe balishiba bwino ifya kukusha abana babo ukucila abafyashi abaliko imyaka yapita? Awe nakalya. Ukufwailisha kumo ukwaliko ku Britain kwalangile ukuti abafyashi abengi abakwata abana abanono bacili balefwaya aba kubapanda mano abo bengacetekela. Bambi na bo batila kanshi ico bengacita fye kukonka ifyo abene baletontonkanya.

Ann Hulbert, mu citabo alemba icitila, Raising America: Experts, Parents, and a Century of Advice About Children, alanda pa fyaba mu fitabo ifyalembelwe na basambilila sana pa fya kukusha abana. Hulbert, uwakwata abana babili, atila, banono fye pali aba bampanda mano abalembele ifi fitabo abalandile ifya cine cine ifyo sayansi yalanda. Lelo, ilingi line cimoneka ukuti balefunda abantu ukulingana ne fyo abene bapitilemo, tabalebafunda ifishinka fine fine iyo. Kanshi kuti twatila, cimoneka ukuti ifingi ifyo balembele fyabombele fye pa nshita inono, tafyalandile pa cintu cimo cine, kabili limo fyalepelenganya no kupelenganya.

Nomba bushe ici calenga abafyashi muno nshiku ukuba shani? Ukwabula no kupita mu mbali, abengi balipelenganishiwa, pantu aba kubapanda amano balifula, ne fyo balandapo fyalifula kabili fyalipusanapusana ukucila ifyo cali kale. Nomba te bafyashi bonse abatontonkanya ukuti tabakwata wa kubatungulula. Abafyashi isonde fye lyonse balemwenamo mu kupandwa amano ukwa kale na kale ukucili kulabomba na ino ine nshita, kabili ifyo e fyo icipande cikonkelepo calalandapo.