Ukubombela Pamo Ukukuula Amayanda Ayalenga Abantu Ukulacindika Lesa

PA CISHI cimo icaba pa Solomon Islands abantu baletamba Ing’anda ya Bufumu ipya iya Nte sha kwa Yehova. Namayo umo atile: “Imiku ingi tulacita ifyalekanalekana ifya kusangilamo indalama sha kukuulila icalici lyesu. Tuleba abantu besu ukuleta indalama, nomba tatukwata indalama ishingakumana ukukuulila icalici. Bushe mwe banensu baNte ni kwi kanshi mufumya indalama?” Nte umwanakashi uo aipwishe amwebele ukuti: “Icalo conse tuli lupwa lumo ulwaikatana mu kupepa Yehova. Icilonganino cesu e lyo na bamunyinefwe icalo conse apo capela balisangwile indalama ishalefwaikwa pa kukuula Ing’anda ya Bufumu ipya. Yehova alitufunda ukulayafwana mu fintu fye fyonse.”

Mulamona ifyo Inte sha kwa Yehova babombela pamo muli fyonse ifyo balecita, nangu fye ilyo balekuula Amayanda ya Bufumu ayengi. Ukubombela pamo ukwa musango yu te lyo kwayamba. Ukutula fye na kale abantu ba kwa Lesa balabombela pamo. Cinshi twalandila ifyo?

Ukupanga Ihema no Kukuula Itempele

Papitile nomba imyaka 3,500, apo Yehova aebele Mose ifyo aletontonkanya pa luko lwa Israele ilyo atile: “Bancitile umwashila.” (Ukufuma 25:8) Alibebele amafunde ya kukonka pa kupanga ihema, Yehova atile: “Ifyo caba conse ico ndekulanga, ica mikuulile ca Ca kwikalamo [ihema], ne ca mipangile ca fipe fyonse fya ciko, e fyo mukacicite.” (Ukufuma 25:9) Kabili Yehova alimwebele fyonse ifyo ihema lyali no kupangwa ne fipe ifyali no kubamo, ne fipe fyali no kulabomba mulya. (Ukufuma 25:10–27:19) Ici “Ica kwikalamo,” nangu ihema lya kupepelamo e mwali no kuba pa kati apo abena Israele bonse bali no kulapepela.

Tatwaishiba impendwa ya bantu ababombeleko umulimo wa kupanga ihema, ico twaishiba fye ca kuti abena Israele bonse balibebele ukulatwala imisangulo ye hema. Mose abebele ukuti: “Mubuule muli imwe ica musangulo ca kwa Yehova: onse uwaitemenwa mu mutima acilete, ca musangulo ca kwa Yehova.” (Ukufuma 35:4-9) Bushe abena Israele balisangwile nangu cali shani? Ukufuma 36:3 kutila: “Na bo babuulile ku cinso ca kwa Mose ica musangulo conse ico abana ba kwa Israele baleteleko ku mulimo wa bubomfi bwa mwashila, ku kuucita. Lelo abantu bene ukuleta balaleta kuli wene ifya kuitemenwa ulucelo no lucelo.”

Ilyo line fye baletele imiina ne miina iya fintu ifyo basangwile, kabili abantu baleleta fye na fimbi. Mpaka abaishiba bwino imilimo abalepanga ihema baeba Mose ati: “Abantu baleleta fimbi pa fikumene ku bubomfi bwa mulimo uo Yehova aebele ukucita.” E ico Mose abebele ati:  “Umwaume nangu mwanakashi bebwekeshapo ukucito mulimo wa ca musangulo ca mwashila.” Cinshi cakonkelepo nomba? “Ifya mulimo ifyalipo fyalikumene ku mulimo onse ku kuucita, no kushalapo.”—Ukufuma 36:4-7.

Pa mulandu wa bukapekape bwa bena Israele, ihema lyalipwile ukupangwa mu mwaka fye umo. (Ukufuma 19:1; 40:1, 2) Abantu ba kwa Lesa balicindike Yehova pa mulandu wa kuti balyafwilishe ukupepa kwa cine. (Amapinda 3:9) Ku ntanshi, bali no kukwata umulimo wa kukuula uukalamba sana. E lyo na kabili, bonse abalefwaya ukwafwilisha umulimo wa kukuula kuti bayafwa, nangu tabaishiba ukukuula nangu balishiba.

Ilyo imyaka 500 yapwile ukufuma apo bapangiile ihema, abena Israele bayambile ukukuula itempele mu Yerusalemu. (1 Ishamfumu 6:1) Lyali no kuba ilya lulumbi, kabili lyali no kukokola pantu lyali no kukuulilwa na mabwe e lyo ne mbao. (1 Ishamfumu 5:17, 18) Yehova, ukupitila “mu mupashi” wakwe aebele Davidi fyonse ifyo itempele lyali no kukuulwa. (1 Imilandu 28:11-19) Nomba ni Solomone mwana Davidi e o asontele ukwangalila umulimo wa kukuula. (1 Imilandu 22:6-10) Davidi na o alyafwilishe uyu mulimo no mutima onse. Alishitile amabwe, imyalo, ne fya kukuulila fimbi kabili atuulile golde na silfere ifingi icine cine. Kabili akonkomeshe abena Israele banankwe ukulapeela ubupe, abepwishe no kuti: “Nomba nani uulepeela lelo ku kuitemenwa ica bupe kuli Yehova?” Bushe abantu bayaswike shani?—1 Imilandu 29:1-5.

Ilyo Solomone aishiletendeka ukukuula itempele, ninshi alikwete golde iingi nga nshi na sifere. Kwali umukuba uwingi sana ne fyela ifingi sana ica kuti balifilwe no kupima ifyo fyafinine. (1 Imilandu 22:14-16) Pa mulandu wa kuti Yehova alyafwile abena Israele bonse no kubakoselesha, umulimo wa kukuula wapwile fye imyaka 7 na hafu.—1 Ishamfumu 6:1, 37, 38.

“Ing’anda ya kwa Lesa” wa Cine

Fyonse fibili ihema ne tempele balefiita ati “ing’anda ya kwa Lesa.” (Abapingushi 18:31; 2 Imilandu 24:7) Yehova tabala aebapo abantu ukumukuulila ing’anda iya kwikalamo. (Esaya 66:1) Ico balekuulila filya fikuulwa ni pa kuti abantu balepepelamo. Naendi, ilyo baleisula itempele, Solomone aipwishe ati: “Bushe cine cine Lesa kuti aikala pano isonde? Moneni, umuulu,  nangu umuulu wa muulu te kuti imukumane; pali bufi ing’anda ino iyo imukuulile!”—1 Ishamfumu 8:27.

Yehova alandile kuli kasesema wakwe Esaya ati: “Ing’anda yandi iketwe ng’anda ye pepo iya bantu na bantu bonse.” (Esaya 56:7) Imituulo na mapepo ayo balepepa mwi tempele, ukubikako no kusefya konse uko balesefya, kwalengele abantu ba kwa Lesa abaYuda na bashali baYuda ukupalama kuli Lesa wa cine. Balisangile bucibusa no bucingo ilyo balepepela mu ng’anda ya kwa Yehova. Mwi pepo Solomone apepele ilyo baleisula itempele alilandile ici cishinka. Kuti mwabelenga ifyalefuma ku mutima ifyo Solomone alandile kuli Lesa ifyalembwa muli 1 Ishamfumu 8:22-53 na muli 2 Imilandu 6:12-42.

Ilya ng’anda ya kwa Lesa wa cine ni kale sana bayonawile, nomba Icebo ca kwa Lesa cilalanda pa nshita iyo abantu ba mitundu yonse bakalongana ku kupepa Yehova mwi tempele ilya mampalanya ilyapuulama nga nshi. (Esaya 2:2) Ilambo lyapwililika ilya Mwana wa kwa Lesa uwafyalwa umo mpo, ilyaleimininwako na malambo ya nama ayo baletuula pe tempele, lyali no kuba e nshila ya kuilamo kuli Yehova. (Yohane 14:6; AbaHebere 7:27; 9:12) Inte sha kwa Yehova pali nomba balepepa Lesa muli iyi nshila yacindamisha, kabili baleyafwa abantu na bambi ukupepa Lesa mu nshila imo ine.

Ukukuula Amayanda ya Kupepelamo Muno Nshiku

Icalo conse apo capela, Inte sha kwa Yehova babombela Lesa wa cine. Bapanga “uluko lwakosa,” kabili abantu muli ulu luko balaya balefula fye. (Esaya 60:22) Icifulo ico Inte sha kwa Yehova balonganinamo sana ni Ng’anda ya Bufumu. * Amayanda ya Bufumu ayengi yalikuulwa kale, kabili na yambi ayengi yacili yalefwaikwa.

Inte sha kwa Yehova ‘balaipeela’ ukukuula Amayanda ya Bufumu ayalefwaikwa. (Amalumbo 110:3) Nomba ilingi line, baNte abekala mu ncende ishingi tabaishiba kukuula, mu fyalo fimo fimo umo baNte bafulile sana abantu abengi bapiina icine cine. E calengele ukuti mu 1999 Ibumba Litungulula litendeke programu ya kukuula Amayanda ya Bufumu pa kucefyako ubu bwafya. Mu kucite fi, baNte abaishiba bwino ukukuula baliya ku fyalo fya kutali mu kufunda bamunyinabo na bankashi ifya kukuula Amayanda ya Bufumu. Kabili abo bene bakansha e batendeka no kulakuula mu fyalo mu mwabo. Nomba finshi fyatumbuka mu kuipeela kwa musango yu?

Ukufika mu February 2006, Inte sha kwa Yehova mu fyalo ifipiina balikuula Amayanda ya Bufumu 13,000. Belengeni amashiwi ayo bamo bamo abakwata Amayanda ya Bufumu ayapya balandile.

Kangalila wa muputule mu Ecuador atile: “Kale abalesangwa ku kulongana cila mulungu baleba 160. Ilyo Ing’anda ya Bufumu ipya yapwile, ubushiku bwa kubalilapo ukulongana, abasangilweko bali 200. Nomba, ilyo imyeshi 6 yapwile, na kabili impendwa yafikile kuli 230. Ipaalo lya kwa Yehova lilamoneka pali aya mayanda ayalinga fye, lelo ayabomba nga nshi.”

Icilonganino cimo mu Uganda catile: “Pa myaka iingi abantu baletwipusha abati ‘kanshi imwe ni lilali mukakwata Ing’anda ya Bufumu ipya iyaba nga aya tumona mu mpapulo shenu?’ Tuletootela Yehova, natusuka twakwata icifulo ca kupepelamo ica mucinshi. Twalelongana mwi shitolo lya kwa munyina, kabili twaleba fye 30. Ilyo ing’anda yesu iya Bufumu yapwile, umuku wa kubalilapo fye pa kulongana twali 110.”

 Aba pa ofesi lya musambo ku Solomon Islands batile: “Bapainiya ba nshita yonse babili abanakashi baletila cilomfwika bwino ukubomba mu cifulo ca cilonganino ukufuma fye apo bakuulila Ing’anda ya Bufumu iipya. Abantu nomba baletemwa sana ukumfwa imbila nsuma ilyo tuleba ku mwinshi no mwinshi nangu ni mu bunte bwa mu lyashi fye. Ino nshita bankashi aba babili balikwata amasambililo ya Baibolo 17, kabili abengi pali aya masambililo balalongana no kulongana.”

Aba pa ofesi lya musambo ku Myanmar batile: “Pasita uwikala mupepi ne Ng’anda ya Bufumu ipya alandile pa bucindami ing’anda ya bufumu yaleta mu mushi onse kabili atile no kuti abantu balomfwa icilumba pali yena. Abapita nshila bonse balatasha imimonekele ya iko. Ico cilakoselesha bamunyina ukushimikila bwino ku bantu. Abengi sana balefwaya ukwishiba ifyaba ubwananyina bwesu ubwaba mu calo conse. Na balekele ukulongana imyaka iingi nabakoseleshiwa ukutampa ukwisa ku kulongana lyonse.”

Aba pa ofesi lya musambo ku Colombia batile: “Nkashi umo aitile umwaume uwalefwaya ukusambilila Baibolo ukwisa apo balekuula Ing’anda ya Bufumu mulya mwine mu ncende. Inshita imbi, ulya muntu atile: ‘Ine naletila abalebomba palya tabali no kunsuminisha ukwingila. Nomba icampapwishe ca kuti, baNte bonse balimpokelele bwino sana. Abaume na banakashi bonse bali abacincila, tapali no waleyangala. Baleumfwa bwino ukubombela pamo.’ Ulya mwaume alisumine ukusambilila Baibolo kabili alitampile no kulasangwa ku kulongana. Ilyo papitile inshita, atile: ‘Nomba nimpilibuka. Nshakaleke ukubombela Lesa pantu nomba nimusanga.’”

 Ubwafwilisho Bwesu Bwalicindama

Ukukuula Amayanda ya Bufumu na o mulimo wa mushilo kabili walicindama. Tuletasha sana Inte sha kwa Yehova isonde lyonse abatungilila uyu mulimo, mu misangulo nangu mu kubomba imilimo imbi, ne nshila shimbi isho bafwilamo. Kwena tatulingile ukulaba no kuti imilimo na imbi iya mushilo na yo yalicindama. Limo limo Abena Kristu balasanswa no tuyofi kabili balakabila ubwafwilisho bwesu. Ukulemba no kupanga impapulo sha Baibolo na ko lubali lukalamba ulwafwilisha umulimo wesu uwa mushilo. Fwe bengi twalimona amaka ya bamagazini balanda pali Baibolo ne fitabo ilyo twapeela uwaba no mutima wa kusambilila. Na kabili, ukwafwilisha bamishonari e lyo na bambi ababomba umulimo waibela uwa nshita yonse na ko kwalicindama. Abena Kristu abaipeela muli uyu musango balabomba imilimo yacindama iya kutwala pa ntanshi umulimo wa kubila muli shino nshiku sha kulekelesha.

Abayafwilisheko umulimo wa kukuula itempele balisekelele nga nshi. (1 Imilandu 29:9) Na muno nshiku mwine, ukwafwilisha ukupepa kwa cine ku misangulo yesu kulatusansamusha. (Imilimo 20:35) Tulomfwa bwino sana nga twabika imisangulo yesu mu kabokoshi ka misangulo ya Mayanda ya Bufumu. Nga twasangula ninshi tuletungilila umulimo wa mwi sonde lyonse, e lyo no kwafwilisha imilimo imbi iya kubila imbila nsuma iya Bufumu. Muno nshiku, Inte sha kwa Yehova balabombela pamo ubusaka nga nshi mu kupepa kwa cine. Kanshi ifwe bonse katube ne nsansa ishifuma mu kwafwilisha uku kupepa!

[Futunoti]

[Akabokoshi ne Cikope pe bula 20]

Ifyo Bamo Basangula

IMISANGULO YA MULIMO WA MWI SONDE LYONSE

Abengi balapaatwilako libela, nelyo ukupekanishisha libela indalama isho babika mu tubokoshi twa misangulo utwalembwapo ati “Imisangulo ya Mulimo wa Mwi Sonde Lyonse—Mateo 24:14.”

Cila mweshi, ifilonganino filatuma ishi ndalama ku maofesi ya Nte sha kwa Yehova aya mu calo cabo. Imisangulo ya kuitemenwa iya ndalama na yo kuti yatumwa mu kulungatika ku Watch Tower Bible and Tract Society of Pennsylvania, Akabokoshi 33459, Lusaka 10101. Amacheke yafwile ukulembwapo ukuti abafwile ukupoka indalama ni ba “Watch Tower.” Ifibeekobeeko nelyo ifipe fimbi ifya mutengo na fyo fine kuti fyasangulwa. Kalata umwipi uulelondolola ukuti ubu bupe bwa kulungatika, alingile ukutumwa pamo ne yi misangulo.

UKUPEKANYA UKUPEELA MU KUITEMENWA

Ukulunda pa kupeela indalama sha kulungatika, kwaliba inshila na shimbi isha kupeelelamo ku kwafwilisha umulimo wa Bufumu mwi sonde lyonse. Inshila shimo shimo ni shi:

Inshuwalansi: Umuntu kuti alembesha ba Watch Tower ukuti e bakapoka indalama sha cipangano ca inshuwalansi nelyo isha penshoni.

Indalama sha ku Banki: Umuntu kuti alemba icipangano ca kuti indalama sha ku banki, ifipepala ifilanga ukuti umuntu alibikishako indalama ku banki nelyo indalama sha penshoni, fyaseekeshiwa kuli ba Watch Tower Society. Nangu kuti alembesha ukuti ba Watch Tower Society e bakapoka indalama ilyo umwine akafwa. Kuti acite fyo ukukonka na mafunde ye banki abikishako indalama.

Nsonsela: Bamo abakwata indalama ishingi mu twampani kuti batila nsosela wabo aleya ku Watch Tower ngo bupe bwa kulungatika. E lyo bambi na bo, kuti baumana akapi no kubika pamo indalama shabo no kushitwala ku banki, e lyo batila nsonsela wabo aleya ku Watch Tower.

Impanga ne Fikuulwa: Impanga ne fikuulwa ifyo bengashitisha kuti fyasangulwa ngo bupe bwa kulungatika nelyo, nga ni ng’anda, ukulemba fye icipangano ca kuti ba Watch Tower Society e bakaba abene ba ng’anda ilyo umwine akafwa. Ipusheni ku maofesi ya Nte sha kwa Yehova aya mu calo cenu ilyo mushilalembesha ifipepala fya buteko ifya kupeelelapo Sosaite impanga ne fikuulwa.

Ifya Cishale no Kuseekesha: Umuntu kuti alemba no kusuminishanya na ba Watch Tower Society ukuti nga afwa ifipe fyakwe nelyo indalama fikabe fyabo, nelyo kuti aseekesha ifipe atemwa indalama kuli ba Watch Tower Society. Limo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Nge fyo amashiwi ya kuti “ukupekanya ukupeela mu kuitemenwa” yatulanga, uulesangula ukubomfya ishi nshila twalandapo afwile ukupekanishisha kabela.

Nga mulefwaya ukupeela mu kuitemenwa, mulingile ukwipusha iofesi lya Nte sha kwa Yehova ukupitila mu kulemba nelyo ukutuma lamya ukubomfya akeyala kali pe samba.

Treasurer’s Office

Watch Tower Bible and Tract Society of Pennsylvania

Box 33459, Lusaka 10101

Lamya: (01) 272062

[Icikope pe bula 18]

Ukubombela pamo e kwalenga ukukuula Amayanda ya Bufumu ayasuma isonde lyonse

[Icikope pe bula 18]

Ing’anda ya Bufumu iipya mu Ghana