Cinshi Tulingile Ukulacitila Icalungama?

UMUNTU uwasambilile sana alandile ukuti: “Amaka ya kufwaya ukucite cisuma e mo yaba, lelo amaka ya kucicita e yashabamo. Pantu icisuma ico mfwaya nshicita, lelo icibi ico nshifwaya e co ncita.” Mulandu nshi cayafishe uyu muntu ukulacita icisuma ico alefwaya ukucita? Alondololwele ukuti: “Awe ifunde ilyo ine nasanga ni li: ukuti ilyo mfwaya ukucita icalungama, icabipa e ciba muli ine. Mbekelwa icine cine mu mafunde ya kwa Lesa umwabela ubuntu bwandi ubwa mu kati, lelo ine mona mu filundwa fyandi ifunde limbi lilelwa ne funde lya matontonkanyo yandi no kulantwala bunkole kwi funde lya lubembu ilili mu filundwa fyandi.”—Abena Roma 7:18, 19, 21-23.

Aya mashiwi ya mutumwa Paulo, ayalembelwe mupepi ne myaka 2,000 iyapitapo, yalondolola umulandu cayafisha ku bantu abashapwililika ukulacita icalungama. Pa kuti tulekonka ifishinte fyalungama ilyo tuli na mafya, tufwile ukukosa. Kanshi tulingile ukuipusha ukuti, Mulandu nshi uwacindama sana uo tulingile ukulacitila icalungama?

Moneni ifyo Amalembo yalanda pa fyo cikaba ku muntu uwa misango isuma ku nshita ya ku ntanshi. Pa Amalumbo 37:37, 38, tubelengapo ukuti: “Lolesho wa bumpomfu, kabili mono watambalala; pantu kuli inkonkani ku muntu wa mutende. Lelo abapulumushi bakafitilwa pamo; inkonkani sha babifi shikalofiwa.” Kabili Amapinda 2:21, 22 yatweba ukuti: “Pantu abatambalala bakekala mu calo, na ba mpomfu bakashalamo; Lelo ababifi bakaputulwa mu calo, na bafutika bakafumpulwamo.”

Nangu ca kuti aya malayo pamo na yambi ayasangwa mu Baibolo yalatulenga ukufwaya ukulacita ifyo Lesa atemwa, uyu te mulandu wine wine tulingile ukulacitila ifyo Lesa atemwa. Umulandu tulingile ukulacitila ifyo Lesa atemwa wakuma ku fikansa ifyabimbamo ifibumbwa fyonse ifya mu muulu na pe sonde. Icipande cikonkelepo cilelanda pa fyo uyu mulandu waba na fintu watukuma.