Isukulu Ilisambilisha Abantu Ukwafwa Bambi mu Fyalo Ifingi

LESA alasambilisha abantu abalekanalekana mu filonganino ukucila pali 98,000 ifya Nte sha kwa Yehova ifyaba mu fyalo ukucila pali 200. Baibolo e citabo babomfya sana ilyo balesambilila. Ili sukulu lyabelako ku kwafwa abantu ukukosha bucibusa bwabo na Lesa kabili basambilila ifyo Lesa afwaya ne fyo bengalacita ifintu ukulingana no kufwaya kwakwe. Bonse abasumina ukusambilila balanonkelamo apa kalamba nga nshi. E lyo balasambilishako bambi ifyo basambilila, nge fyo Yesu Kristu abeba ukuti mulelenga bambi ukuba abasambi.—Mateo 28:19, 20.

Ukulunda pa fyo basambilila lyonse mu filonganino fyabo, Inte sha kwa Yehova shalikwata amasukulu yaibela ayalenga bamunyinefwe ukukampuka sana mu milimo yalekanalekana iikumine ukuteyanya. Isukulu lya Kukansha Ilya Butumikishi e limo pali ayo masukulu. Lyatendeke mu October 1987 ku Pittsburgh, mu Pennsylvania ku U.S.A. Ikalasi lya kubalilapo lyali mu ciNgeleshi, kabili mwali abasambi 24. Ukutule lyo kwaliba amakalasi na yambi mu ndimi 21 mu fyalo 43. Ukufika pali ino nshita, baeluda na babomfi batumikila abashimbe mu fyalo ukucila pali 90 balipita muli ili sukulu. Nga bapwisha isukulu ilya myeshi ibili, balabatuma ku kubombela ku ncende ukuli ukukabila, limbi kuti caba mu calo cabo cine nelyo ku fyalo fimbi. Pa mpela ya 2005, bamunyinefwe ukucila pali 22,000 e bapitile muli ili sukulu. Yehova alibapaala nga nshi pa fyo babombesha mu kuicefya ilyo baletwala pa ntanshi Ubufumu no kwafwa  abantu bambi ica kuti mu mulimo wabo mulafuma ifisuma.—Amapinda 10:22; 1 Petro 5:5.

Ifyo Bacita pa Kusangwa kwi Sukulu

Pa kuti basangwe kwi Sukulu lya Kukansha Ilya Butumikishi, abengi balalomba cuti ku ncito. Nomba ici tacayanguka. Ku Hawaii, bamunyinefwe babili bakafundisha abo baitile ukusangwa kwi sukulu balefwaya ukwipusha abakalamba ba ncito ukubapeela cuti. Balicetekele ukuti Yehova ali no kubafwa. Balitumine kalata ya kwipushishapo cuti no kulondolola umulandu balefwaila ukuyasangwa kwi sukulu, ne fyo bakanonkelamo nga bacite fyo. Bonse babili balibasuminishe.

Ilingi line bamunyinefwe abalelomba cuti pa kuti basangwe kwi sukulu balebeba fye ukuti incito yapwa, ilyo bakabwela tabakabe pa ncito. Lelo basalilepo ukusangwa kwi sukulu ilyo ukuteyanya kwa kwa Yehova kwabikako, nangu cingatila ukucite fyo kwalengele incito yabo ukupwa. Bamo pa numa ya kupwisha isukulu balibetile ukubwelela pa ncito. Nga kusupula ifyo aba bamunyinefwe bacitile kuti twatila fye: Lombeni cuti ku bakalamba ba ncito, pepeni kuli Yehova, no kushila fyonse mu maboko yakwe.—Amalumbo 37:5.

“Basambilishiwa Kuli Yehova”

Isukulu lisenda imyeshi ibili, kabili balasambilila sana ifyaba mu Baibolo. Abasambi balasambilila ifyo abantu ba kwa Yehova babomba pa kucita ukufwaya kwakwe. Kabili pa lwabo balasambilila ifyo bengabomfya Baibolo bwino sana ilyo baleshimikila, pa kulongana mu filonganino babamo, e lyo na pa kulongana kukalamba.

Munyinefwe uwatemenwe sana ifyo asambilile kwi sukulu alembele munyinefwe umbi uwali no kusangwa kwi sukulu ukutila: “Ca cine ukasambilila ifyacila pali fyonse ifyo wasambililapo. E lyo ukamona ifyo ilembo lilanda pa ‘kusambilishiwa kuli Yehova’ lipilibula icine cine. Ifyo ukasambilila fikakumumunga, e lyo fikalopolola umutima obe pamo ne mibele yobe pa kuti ukalepashanya Yesu Kristu. Ukulanda fye icishinka ayo e masambililo yacindama sana ayo ukasangwako.”—Esaya 54:13.

Bakabila wa Mbila Nsuma, Abacemi, Kabili Bakasambilisha

Abapita kale mwi Sukulu Iya Kukansha Ilya Butumikishi balebombela mu fyalo 117. Ifi fyalo fisanshako ne fishi fyaba mu Atlantic, mu Caribbean, na mu Pacific e lyo ne fyalo ifingi umwaba amaofesi ya Nte sha kwa Yehova. Imisambo yalicita lipoti ukuti inshila abasambi babomfya pa kushimikila, ukucema, e lyo na pa kusambilisha shilanga fye ukuti balisambilile bwino sana. Ifyo basambilile fibalenga ukulabomfya bwino Baibolo ilyo baleshimikila. (2 Timote 2:15) Ilyo baleasuka amepusho ku bantu abo bashimikilako, balabomfya sana icitabo ca Ukupelulula Ukufuma mu Malembo * kabili balasambilishako na bakabila ba Bufumu bambi ukucita cimo cine. Ukucincila kwa bamunyinefwe abapwisha ili sukulu kulakoselesha bamunyinefwe bambi nabo ukuba abacincila, kabili ifyo babomba filakosha ifilonganino.

Baeluda mu cilonganino balipeelwa umulimo wa ‘kucema umukuni,’ ukwafwa bambi ukuba bacibusa ba kwa Lesa. (1 Petro 5:2, 3) Eluda umo atile: “Tulatasha sana umusambo ukututumina bamunyinefwe abakanshiwa bwino sana ukutwafwa mu mulimo wa kucema impaanga sha kwa Lesa.” Umusambo umo mu Asia watile: “Aba bamunyinefwe abapita mwi sukulu lya kukansha balaba aba cikuuku. Balabombesha sana ica kuti bonse mu cilonganino balabatasha. Tulatasha sana pa fyo baba abaicefya, aba bucibusa, e lyo ne fyo bafwaisha ukubomba umulimo. Kabili balaipeelesha ukuya ku filonganino ifilekabila abacemi.” (Abena Filipi 2:4) Aba baume balakosha bakapepa banabo, kabili tufwile ukubatasha pa fyo bacita.—1 Abena Korinti 16:18.

Na kabili bakafundisha be Sukulu lya Kukansha Ilya Butumikishi balaafwa abasambi ukuwamya inshila babomfya pa kulanda ku cintubwingi. Ilyo balekonka imitubululo e lyo no kufunda uko babapeela, abengi balababomfya pa kulongana kwa muputule no kulongana kwa citungu. Kangalila umo uwa muputule atile abapita mwi isukulu lya kukansha “balapeela amalyashi ayasuma nga nshi kabili balalondolola bwino ifyebo.”—1 Timote 4:13.

 Mu calo cimo mu Afrika, imisambilishishe mu filonganino yaliwamineko sana pa numa ya kutuma mwi bala abapitile mwi Sukulu lya Kukansha Ilya Butumikishi ilyabelele mu calo cabo cine. Baeluda abo batuma mu filonganino nga bafuma ku sukulu balaafwa sana mu mulimo wa kushimikila, ubucemi, e lyo no kusambilisha. Ici cilalenga ifilonganino ukukula ku mupashi.—Abena Efese 4:8, 11, 12.

Balatendeka Ukutungulula Bwino Ifilonganino

Mu ncende ishingi baeluda na babomfi batumikila abafulilako balefwaikwa. Ifilonganino fimo nga tafyakwata eluda nangu umo nga ca kutila tabatumineko bamunyinefwe abapwisha Isukulu lya Kukansha Ilya Butumikishi. Kanshi abengi abapwisha ili isukulu balabatuma ku kubombela ukuli ukukabila kwa musango yo.

Imisambo iingi itila aba baume “baleshiba bwino sana ifyo ukuteyanya kwaba,” “balabikako sana amano ku milimo bapeelwa,” “balaafwa bambi ukwishiba no kucindika ukuteyanya kwa kwa Yehova,” kabili “balalenga aba mu cilonganino ukukosha bucibusa bwabo na Lesa no kuba abaikatana.” Aba bamunyinefwe balabomba bwino pantu balakonka ifyalembwa mu Cebo ca kwa Lesa, kabili tabashintilila fye pa kwishiba kwabo nelyo pa mano yabo abene. (Amapinda 3:5-7) Ifilonganino batumako abaume ba musango yo filanonkelamo apakalamba nga nshi.

Ukubombela mu Ncende Ishabela Ukutali Sana

Bamo abapita muli ili isukulu abo basonta ukuba bapainiya baibela balabatuma ku kwafwa bamunyinefwe ne nkashi abekala ukutali sana ukushaba ifilonganino pa kuti nabo bakwate ifilonganino. Eluda umo uwikala ku ncende yabela ukutali sana mu Guatemala atashishe ifyo bamunyinefwe abafuma kwi sukulu baafwa ifilonganino, atile: “Pa myaka 20 nalesakamikwa, nshaishibe ifyo abantu muli iyi ncende ikalamba bali no kushimikilwa. Ilingi line nalepepela ici cintu. Bamunyinefwe abafuma kwi Sukulu lya Kukansha Ilya Butumikishi balikanshiwa bwino sana mu kupeela amalyashi e lyo na mu fintu fimbi ifikumine ukuteyanya, ndi uwa nsansa ukuti muli iyi ncende nomba muli abalebombelamo.”

Bamunyinefwe abapita mwi sukulu lya kukansha balisambilila ukubomba bwino sana mu ncende umo benda intamfu iitali nga nshi ukuninika impili pa kuyafika ku tumishi utunono. Nga bafika kuli iyi mishi bwangu bwangu balapanga no kuteyanya amabumba ya bamunyinefwe ababela ukutali, nangu cingatila bakasabankanya bambi balifilwa ukucite fyo. Ku ca kumwenako eluda umo ku Niger alombele ukuti bamunyinefwe abapita mwi sukulu bafwe icilonganino cabo pantu alishibe ukutila aba kuti babomba bwino sana mu ncende ekalamo. Maka maka ku ncende ishabela ukutali sana kuti cayanguka nga ca kuti batumako bapainiya baibela na bakangilila ba muputule abashimbe. Nga fintu cali ku mutumwa Paulo, aba bamunyinefwe balashipikisha ‘amasanso ya pa mimana, amasanso ku fipondo, amasanso mu matololo,’ kabili balacucutika, no kubombesha pa kusakamane filonganino babamo.—2 Abena Korinti 11:26-28.

Abaice Balenonkelamo

Amalembo yakonkomesha abaice ukwibukisha Kalenga wabo. (Lukala Milandu 12:1) Bamunyinefwe abacincila abapwisha Isukulu lya Kukansha Ilya Butumikishi baba fya kumwenako fisuma ku Bena Kristu bacaice. Ilyo bamunyinefwe babili abapwishishe isukulu lya kukansha bafikile pa cilonganino cimo mu United States, inshita iyo bakasabankanya pa cilonganino bapoosele mu kushimikila yalikulileko imiku ibili. Na kabili, Impendwa ya bapainiya ba nshita yonse, nelyo abapoosa inshita iikalamba ukulabila imbila nsuma ya Bufumu, yalikulileko ukufuma pali babili ukufika kuli 11. Ifi e fyacitika mu filonganino ifingi.

Abapita mwi sukulu balakoselesha abalumendo mu filonganino ukusangwa kwi Sukulu lya Kukansha Ilya Butumikishi. Ici calikoselesha bamo abashilaba ababomfi batumikila ukubombesha ukuba abatumikila. Umusambo wa ku Netherlands wita abapwisha Isukulu lya Kukansha Ilya Butumikishi ukuti “fya kumwenako ku balumendo baletontonkanya pa fyo balefwaya ukucita mu bumi bwabo.”

 Ukubombela mu Filonganino Ifibomfya Ululimi lwa ku Fyalo Fimbi

Mu fyalo ifingi, bamunyinefwe balebombesha sana ukushimikila abantu imbila nsuma mu lulimi lwabo lwine. Abapwisha Isukulu lya Kukansha Ilya Butumikishi ilingi line balasambilila indimi shimbi kabili balabombela mu ncende umwaba abantu abengi abafuma ku fyalo fimbi. Mu Belgium ku ca kumwenako, bakabila ba Bufumu balefwaikwa nga nshi abengashimikila ku bena Albania, abena Persia, na bena Russia.

Kale kale ifilonganino na mabumba ya bamunyinefwe mu Britain, Germany, Italy, Mexico, United States, ne fyalo fimbi ifibomfya ululumi lwa ku calo cimbi balenonkelamo ukukwata bakangalila bamuputule, baeluda, na babomfi batumikila abapita mwi Isukulu lya Kukansha Ilya Butumikishi. Umusambo wa ku Korea wacita lipoti ukuti “ukucila pali 200 bamunyinefwe abapwisha isukulu lya kukansha balebombesha ukwafwa ababa mu filonganino na mabumba ababomfya ululimi lwa ku fyalo fimbi.”

Balaicefya Ilyo balebomba Imilimo Imbi

Ukulunda pa kubomba ne filonganino na mabumba ayabomfya ululimi lwa ku calo cimbi, abapita mwi Sukulu lya Kukansha Ilya Butumikishi balabomba nga baeluda, ababomfi batumikila na bakangalila benda. Bamo balaya mu kubombela mu fyalo fimbi, nalimo ukubomba mu Dipartimenti wa Mulimo mu misambo ukuli ukukabila sana. Abaishiba ifya bukuule kuti nalimo babomba mu bukuule bwa Mayanda ya Bufumu.

Ukufulilako ukwa filonganino ne miputule kulepilibula ukuti bakangalila benda na bambi balefwaikwa. Pa kuti basange bakangalila benda abalefwaikwa, balasala bamo muli bamunyinefwe abapwisha Isukulu lya Kukansha Ilya Butumikishi no kubasambilisha ifya kubomba umulimo wa kwenda pa milungu 10. Kabili balabomba nga bakangilila bamuputule abakwafwilisha, nelyo aba lyonse. Pali ino nshita bamunyinefwe ukucila pali 1,300 abapwisha isukulu lya kukansha balabomba nga bakangilila benda mu fyalo 97. Mu calo cimo mu Afrika, ukucila pali hafu wa bakangalila benda ni abo abapitile mwi Sukulu lya Kukansha Ilya Butumikishi. Mu calo na cimbi mu Afrika, pali bakangilila benda 10, ninshi 7 balipitile mwi sukulu lya kukansha.

Abapwisha ili sukulu mu Asia, Australia, mu Bulaya, mu Canada, na mu United States, balibatuma mu fyalo umo aba kubomba imilimo imo balefwaikwa sana. Ici calilenga abantu mu fyalo ifingi ukunonkelamo mu fyo basambilile ku sukulu.

Ukupitila mu Mwana wakwe, Yesu Kristu, Yehova alimya bakabila ba mbila nsuma, abacemi, bakasambilisha, na bambi abaletwala pa ntanshi umulimo wa Bufumu muli shino nshiku sha kulekelesha. Bushe kuli isubilo lya kuti abantu ba kwa Lesa bakafulilako? Ukwabula no kutwishika! Kanshi inshita yonse bamunyinefwe abaipeela bakulafwaikwa ukufika pa kubomba imilimo iikalamba. (Esaya 60:22; 1 Timote 3:1, 13) Isukulu lya Kukansha Ilya Butumikishi lilalenga baeluda na babomfi batumikila ukuipangasha ukubomba bwino mu butumikishi. Kabili ici cilenga bena pamo na bambi mu fyalo ifingi ukunonkelamo.

[Futunoti]

[Ifikope pe bula 10]

Isukulu lya Kukansha Ilya Butumikishi liletwala pa ntanshi umulimo uukumine Ubufumu mu fyalo ifingi

[Ifikope pe bula 13]

Bushe mulafwaya ukusangwa kwi Sukulu lya Kukansha Ilya Butumikishi pa kuti mukanonshe bambi?