Sambilisheni Abana Benu Ukwasukapo pa Kulongana

BA PERLA abekala ku Mexico batila, ilyo bali abaice banyina balebafwa ukupekanya ifyasuko ifipi ifya kuya asukapo pe Sambililo lya Ulupungu lwa kwa Kalinda. Ino nshita baPerla balikwata umwana umwaume uwa myaka isano. Nomba bushe baafwa shani umwana wabo? Batila: “Ica ntanshi ndapekanya Ulupungu neka. Ilyo ndepekanya ndafwaya paragrafu iyo mwana wandi engomfwikisha bwino kabili iyo engalondolola mu mashiwi yakwe umwine. Lyena tulapituluka muli ilya ine paragrafu iyo eta kuti ‘paragrafu yakwe’. Ndamweba ukulondolola iyi paragrafu ukubomfya ifya kumwenako ifyo aishiba. Pa numa tulapitulukamo imiku iingi mu fyo akaya-asuka. Tulabomfya icintu icili kwati cisoselo pa kuti alebelesha ifya kwikata icisoselo ilyo aleasukapo. Naliba uwa sansa nga nshi pantu pa kulongana konse umwana wandi alasukapo nelyo ukwimya ukuboko ukuti asukepo. Ilingi line alaya kuli munyinefwe uletungulula Ulupungu ilyo ukulongana kushilatendeka ukumweba paragrafu alefwaya ukwasukapo.”

BaJens, ni ba eluda mu cilonganino umo balanda iciHindi, balikwata abana babili abaume, umo ali ne myaka ibili e lyo umbi ali ne myaka ine. Ilyo baJens na bakashi babo balepekanya ukulongana pamo na bana babo, balabomfya inshila ya kupekanishishamo iyo baJens basambilile ku bafyashi babo. BaJens batila: “Tulamona ifyebo ifyo abana bengomfwikisha bwino. Lyena tulabalondolwela ifyo fyebo mu kusupawila nelyo ukulondolola ifishinka fikalamba ifili muli ico cipande. Pa numa tulabepusha ifipusho ifyo tulefwaya ukuti bakasuke pa kulongana. Ilingi line tulapapa ifyo basuka bwino. Ifyasuko fyabo ifisuma filanga fye ifyo bomfwikishe ifyo bakalandapo. Ilyo basukapo, balalumbanya Yehova ukufuma pa mitima yabo, kabili balalanga ukuti balikwata icitetekelo muli Lesa.”