Bushe Kapingula Kuti Asambilila?

BA SLADJANA, ni Nte ya kwa Yehova, abekala ku Croatia. Baile ku cilye pa mulandu wa lyashi limo ilya ndalama. Balifikile bwangu ku cilye. Lelo, abo balelubulula na bo umulandu bena balicelelwe ukufika. BaSladjana balefwaya sana ukushimikila, e co ilyo bonse balelolela ukuti icilye citendeke, balishipile no kulanda kuli kapingula.

Baipwishe kapingula ukuti, “Bushe mwalishiba ukuti nomba line fye pano calo tapakabe ifilye nangu ni bakapingula?” Balelanda pali bakapingula aba bene babako ino nshita.

Kapingula alipapile, kabili abaloleshe fye ukwabula ukusosa nangu cimo. Lyena, icilye calitendeke. Ilyo icilye capwile, baSladjana balimine ukuya mu kusaina icipepala cimo ifi, e lyo kapingula abatotweshe ati: “Bushe ca cine naushininkisha ukuti nomba line muno calo tamwakabe bakapingula ne filye?”

BaSladjana bamwaswike ati, “E mukwai. Ninshininkisha sana!”

Kapingula abepwishe ukuti: “Bushininkisho nshi winganjeba ubulelanga ukuti cishinka?”

BaSladjana bamwaswike abati: “Ubushininkisho busangwa muli Baibolo.”

Kapingula atile kuti atemwa ukubelenga ifyo fishinka, nomba takwete Baibolo. E co baSladjana bamulaile ukumufwaila Baibolo. BaNte balitandalile uyu kapingula, balimupeele Baibolo kabili bamukoseleshe ukulasambilila Baibolo cila mulungu. Kapingula alisumine kabili tapakokwele aishileba Inte ya kwa Yehova.

Amashiwi ya kusesema ayaba pa Amalumbo 2:10 yatila: “E ico nomba, mwe shamfumu, shilimukeni; salapukeni, mwe bapingushi ba pano isonde.” Ala cilawama sana ilyo abantu ba musango yu mu kuiceefya basumina ukutungululwa na Yehova!

[Icikope pe bula 32]

BaSladjana na kapingula