Mulandu Nshi Tulingile Ukwishibila Mukaanya Kristu?

Kale sana, umutumwa uwapuutilwemo no mupashi alembele ukuti: “Mwaumfwile ukuti mukaanya Kristu aleisa.” (1 Yohane 2:18) Kuti twafwaya ukutontonkanyapo sana pa kwishiba umwalola aya mashiwi! Pa myaka iingi, abantu balitontonkanyapo sana pali aya mashiwi ukufwaya ukwishiba umo yalola. Bushe mukaanya Kristu nani? Ni lilali akesa? Cinshi akacita ilyo akesa?

UKUFUMA fye na kale, abantu abengi balibabepesha ukuti ni bamukaanya Kristu. Kale, pa bantu abo baletila ni “bamukaanya Kristu” pali abaYuda, bapapa ba ku Katolika, na bakateka ba ku Roma. Ku ca kumwenako, ilyo Kateka Frederick II (uwaliko ukufuma mu 1194 ukufika mu 1250) akeene ukulwako inkondo isho icalici lyalelwa na baShilamu, Papa Gregory IX atile Fredrick ni mukaanya Kristu kabili alimutamfishe na mu calici. Innocent IV, uwapyene pali Gregory, na o wine aishiletamfya Fredrick mu calici. Ilyo bamucitile fi, Fredrick na o atile Innocent e mukaanya Kristu.

Umutumwa Yohane fye eka e kalemba wa Baibolo uwalanda pe shiwi lya kuti “mukaanya Kristu.” Mu makalata yabili ayainikwa ishina lyakwe, amashiwi ya kuti mukaanya Kristu nelyo ukuti bamukaanya Kristu yasangwamo imiku isano. Ifikomo umo aya mashiwi yasangwa fili mu mukululo uli pe bula likonkelepo. Muli ifi fikomo, kuti twamona ukuti mukaanya Kristu wa bufi kabili ni kabeepa, afwaya sana ukonaula bucibusa umuntu akwata na Kristu e lyo na Lesa. E mulandu wine umutumwa Yohane akonkomeshe Abena Kristu banankwe ukuti: “Mwe batemwikwa, mwisumina icebo conse icapuutwamo, lelo esheni ifyebo fyapuutwamo mumone nga fyafuma kuli Lesa, pantu bakasesema wa bufi abengi nabafumina pano calo.”—1 Yohane 4:1.

Yesu na o asokele ukuti kukesa bakabepa, nelyo bakasesema ba bufi, kabili atile: “Besa kuli imwe mu fya kufwala fya mpaanga, lelo mu kati mimbulu iyabuuka. Ku fisabo fyabo [nelyo imilimo] e ko mukabeshibila.” (Mateo 7:15, 16) Bushe Yesu na o alesoka abasambi bakwe ukuti kukesa mukaanya Kristu? Natumone ifyo twingeshiba uyu kabeepa umubi icine cine.