Ificitika pa Krisimasi Filanga Cinshi?

IMYAKA 10 iyapita, muli uno wine mweshi, magazini ya U.S. News & World Report yakwete icipande caleti “Ukufwaya Ukwishiba Ificitika pa Krisimasi.” Ici cipande calandile “pa fyo abantu bacita sana pa Krisimasi nga fya mapepo fye fyeka ukwabula amakwebo.” Bushe e fyo caba?

Icipande calandile pa milandu tushilingile ukwenekela ukuti e fyo bacita. Catile: “Takwaba ifyalembwa ifilanga ukuti kwaleba ukusefya ukufyalwa kwa kwa Yesu. Uku kusefya kwatendeke mu myaka ya ba300 C.E., ilyo Constantine . . . aishileba kateka wa Roma.” Ubo bwali “bushininkisho bumo ubwa kuti takwali nangu umo uwaishibe mu cine cine ilyo Yesu afyelwe.” Cilya cipande catile “amalandwe tayalanda pa mwaka ilyo Yesu afyelwe, pali bufi umweshi nelyo ubushiku afyalilwepo.” Kalemba wa lyashi lya kale pa Universiti ya Texas atile, “Abena Kristu ba kubalilapo tabalesefya ukufyalwa kwa kwa Yesu.”

Pa mutwe unono uwaletila “Ukutunganya Fye,” icipande calilandile “umulandu icalici lyasalile ubushiku bwa December 25.” Catile: “Ico abengi baishiba ca kutila balefwaya fye ukulenga ukusefya kwa Saturnalia pamo no kusefya kumbi ukwa cisenshi ukuba ukwa Bwina Kristu.” “Pa kuti abantu abengi bengalasefya ukufyalwa kwa Mupusushi, intungulushi sha mapepo shabikile Krisimasi ku kupwa kwa December inshita iyo abantu babeleshe kale ukulasefya.” Lelo mu myaka ya ba1800 ifintu fyalyalwike, batendeke ukulashita no kulapeelana ifya bupe pa Krisimasi. “Nomba uyu musango wa kupeelana ifya bupe pa Krisimasi walengele ukuti aba makwebo na basabankanya balenonkelamo. Kabili aba makwebo batendeke ukulasabankanya amakwebo yabo pali iyi nshita ya mwaka.”

Kanshi tatwingenekela ukuti ifyo abantu bakulacita pa Krisimasi fya mapepo fye. Nangu muli Krisimasi ya nomba mwalingila “amakwebo” lelo icine ca kutila ukutula fye na kale Abena Kristu ba cine tabalesefya ukufyalwa kwa kwa Yesu. Baibolo ikomaila sana pa cilubula ca kwa Kristu ico apeele ilyo afwile, kabili alibuushiwe no kuya ku muulu. (Mateo 20:28) Imfwa yakwe ikatwalilila ukuba iyacindama ku ciyayaya.