“Nabupalamo bushiku bukulu bwa bwa Yehova”

“Nabupalamo bushiku bukulu bwa kwa Yehova, nabupalama no kwangufyanisha.”—SEFANIA 1:14.

1, 2. (a) Bushiku nshi ubwacindama ubo Abena Kristu balolela? (b) Mepusho nshi tulingile ukuipusha, kabili mulandu nshi?

UMUKASHANA uuli mupepi no kuupwa alasansamuka nga nshi ilyo alelolela ubushiku bwa kupisha ubwinga. Umwanakashi uwaba pa bukulu alafwaisha ukuti ubushiku umwana wakwe akafyalwa bukafike bwangu. Umubomfi uunakile na o alafwaisha sana ukuti ubushiku bwa kutuusha ubo alelolela pa nshita ntali bukafike bwangu. Ni mwi umo aba bantu bapalene? Bonse balelolela ubushiku ubwacindama nga nshi, ubushiku ubo bakasangalala. Nangu ifyo baleenekela nafipusana, bonse balefwaisha ukuti ico baleenekela cikacitike. Ubushiku bafwaisha bukasuka bukafike, kabili ilyo bukafika, bakaba nabaiteyanya.

² Abena Kristu ba cine nabo balalolela ubushiku bumo ubwacindama nga nshi. No bu, “bushiku ubukulu ubwa kwa Yehova.” (Esaya 13:9; Yoele 2:1; 2 Petro 3:12) Bushe “ubushiku bwa kwa Yehova” ubuleisa e cinshi, kabili ukwisa kwa ubu bushiku kukakuma shani abantunse? E lyo kuti twacita shani pa kushinikisha ukuti natuipekanishisha ilyo tuleenekela ubu bushiku? Nacicindama sana ukwishiba amasuko kuli aya mepusho ino ine nshita, pantu ificitika filelanga ukuti aya mashiwi yasangwa mu Baibolo ya cine, ayatila: “Nabupalamo bushiku bukulu bwa kwa Yehova, nabupalama no kwangufyanisha.”—Sefania 1:14.

“Ubushiku Ubukulu Ubwa kwa Yehova”

3. Bushe “ubushiku ubukulu ubwa kwa Yehova” e cinshi?

³ Bushe “ubushiku ubukulu ubwa kwa Yehova” e cinshi? Mu Malembo, amashiwi ya kuti “ubushiku bwa kwa Yehova” yalosha ku nshita shaibela ilyo Yehova alepingula no konaula abalwani bakwe no kulenga ishina lyakwe ilikalamba ukucindikwa. ‘Inshiku sha kwa Yehova’ shalishile pa bantu ba mu Yuda na mu Yerusalemu abashali ne cishinka, e lyo na bena Babiloni na bena Egupti abaletitikisha abanabo nabo Yehova alibapingwile no kubonaula. (Esaya 2:1, 10-12; 13:1-6; Yeremia 46:7-10) Lelo, “ubushiku bwa kwa Yehova” ubukalamba nga nshi bucili ku ntanshi. “Bushiku” ubo Yehova akapingula no konaula abantu abaseebanya ishina lyakwe. Ubu bushiku bukatendeka lintu bakonaula “Babiloni Mukalamba,” ubuteko bwa mipepele ya bufi iya mu calo, kabili bukapwa pa nkondo ya Armagedone lintu abantu babipa aba mu calo conse bakonaulwa.—Ukusokolola 16:14, 16; 17:5, 15-17; 19:11-21.

4. Ifi ubushiku bwa kwa Yehova bupalamishe, mulandu nshi abantunse abengi balingile ukubela no mwenso?

⁴ Nampo nga balishiba ukuti ubushiku bwa kwa Yehova nabupalamisha nelyo iyo, abantunse abengi balingile ukuba no mwenso. Mulandu nshi balingile ukubela no mwenso? Ukupitila muli kasesema Sefania, Yehova ayasuka ukuti: “Ubo bushiku bushiku bwa kububuka, bushiku bwa kumanama kabili ubwa mpatapata, bushiku bwa kusampanya kabili ubwa cimfulumfulu, bushiku bwa mfifi kabili ubwa mfifi iyatoola, bushiku bwa makumbi kabili ubwa makumbi ayafiitula.” Awe kwena ubu bushiku bwa kutiinya! Na kabili kasesema atila: “Nkaletamo ukumanama ku bantu . . . pantu babembuka kuli Yehova.”—Sefania 1:15, 17.

5. Mulandu nshi abengi nga nshi balolelela no kufwaisha ukuti ubushiku bwa kwa Yehova bwise bwangu?

⁵ Lelo, kuli bambi abengi nga nshi abalolela  ubushiku bwa kwa Yehova kabili balafwaisha ukuti bwise bwangu. Mulandu nshi? Pantu balishiba ukuti bushiku bwa kupusuka no kulubuka kwa balungama, bushiku ubo Yehova umwine akalumbanishiwa kabili ishina lyakwe ilya bukata likacindikwa. (Yoele 3:16, 17; Sefania 3:12-17) Ifyo abantu bacita mu bumi bwabo pali ino nshita e fipima nampo nga balingile ukuba no mwenso nelyo balingile ukulaenekela ubu bushiku. Bushe mwaliba no mwenso nelyo mulenekela ubu bushiku? Bushe mwali-iteyanya? Bushe ukwishiba ukuti ubushiku bwa kwa Yehova nabupalamisha kulakuma ifyo mucita cila bushiku?

“Kukaba Bakapumya no Kupumya Kwabo”

6. Bushe abantu abengi bamona shani “ubushiku bwa kwa Yehova,” kabili mulandu nshi Abena Kristu ba cine bashipapila?

⁶ Te mulandu ne fyo “ubushiku bwa kwa Yehova” bupalamishe, abantu abengi mu calo tababikako amano. Balapumya fye na babasoka ukuti ubushiku bwa kwa Yehova nabupalama nga nshi. Abena Kristu ba cine tabapapa ilyo bamona ifi filecitika. Balebukisha ukusoka uko umutumwa Petro alembele, ukutila: “Mwalishiba ici intanshi, ukuti mu nshiku sha kulekelesha kukaba bakapumya no kupumya kwabo, abenda umwabela ifya lunkumbwa fyabo fine no kusosa abati: ‘Kuli kwi ukubapo kwakwe ukwalaiwa? Pantu, ukufuma pa bushiku ifikolwe fyesu fyaponene mu tulo twa mfwa, ifintu fyonse filetwalilila filya fine fye fyali ukufuma pa kutendeka kwa bubumbo.’”—2 Petro 3:3, 4.

7. Cinshi cikatwafwa ukutwalilila ukulamona ukuti ubushiku bwa kwa Yehova nabupalama nga nshi?

⁷ Cinshi cingatwafwa ukukanatontonkanya nga aba bantu, no kutwalilila ukulamona ukuti ubushiku bwa kwa Yehova nabupalama nga nshi? Petro atweba ukuti: “Ndecincisha amatontonkanyo yenu ayafumaluka pa kumucinkulako, ukuti mwibukishe ifyebo fyalandilwe kale kuli bakasesema ba mushilo, ne funde lya kwa Shikulu kabili Umupusushi ukupitila mu batumwa benu.” (2 Petro 3:1, 2) Ukubika amano ku kusoka ukwaba mu kusesema kukatwafwa ‘ukucincisha amatontonkanyo yesu ayafumaluka.’ Nalimo libili libili tulakutika kuli ifi ifya kutucinkulako, lelo pali nomba e lyo cicindeme sana ukuti tutwalilile ukubika amano kuli uku kusoka ukucila kale.—Esaya 34:1-4; Luka 21:34-36.

8. Mulandu nshi abengi bashibikila amano ku fya kutucinkulako ifyaba mu Baibolo?

⁸ Mulandu nshi bambi bashibikila amano kuli ifi fya kutucinkulako? Petro atwalilile ukusosa ukuti: “Umwabela ukufwaya kwabo, baluba ici cishinka, ukuti ku kale kwali imyulu ne sonde ilyakambantaniwe ukufuma mu menshi kabili mu kati ka menshi ku cebo ca kwa Lesa; na kuli ifyo icalo icalipo lilya, calyonawilwe ilyo cabunshiwe ku menshi.” (2 Petro 3:5, 6) Ca cine, kwaliba bamo abashifwaya ubushiku bwa kwa Yehova ukwisa. Tabafwaya icili conse ukupumfyanya ifyo bacita mu mikalile yabo. Kabili tabafwaya fye na Yehova ukubalubulwisha pa fyo bacita ifintu ukulingana ne fyo abene balefwaya. Nge fyo Petro atile bekala “umwabela ifya lunkumbwa fyabo.”

9. Mibele nshi abantu bakwete mu nshiku sha kwa Noa na mu nshiku sha kwa Lote?

⁹ Umulandu no “kufwaya kwabo,” aba bakapumya basalapo ukukanabika amano ku cishinka ca kuti kale sana Yehova alyonawile abantunse babipa. Yesu Kristu no mutumwa Petro balilandile pa nshita shibili ilyo Yehova aonawile ababifi mu “nshiku sha kwa Noa” na mu “nshiku  sha kwa Lote.” (Luka 17:26-30; 2 Petro 2:5-9) Pa ntanshi ya Lyeshi, abantu tababikile amano ku kusoka Noa alebilisha. Nangu fye ni lintu imisumba ya Sodomu na Gomora ishilaonaulwa, bashifyala ba kwa Lote balemumona ‘ngo waleangala fye.’—Ukutendeka 19:14.

10. Cinshi Yehova akacita ku bantu abashibika amano ku kusoka kwaba mu Baibolo?

¹⁰ Na pali lelo, abantu baba ne mibele imo ine. Nomba, umfweni ifyo Yehova akacita ku bantu abashibika amano ku kusoka kwa mu Baibolo, atila: ‘Nkakanda abantu abalengamina pa fisweka fyabo, abatila mu mitima yabo, Yehova takacite cisuma nangu kucite cibi. E ico ifyuma fyabo fikabe fyakunkuntwa, na mayanda yabo icapomoka. Bakakuula amayanda no kwikalamo iyo, bakalima ne filime fya myangashi no kunwako umwangashi iyo.’ (Sefania 1:12, 13) Abantu kuti batwalilila ukwikala no kulacita ifintu nga filya fine bonse bekala, lelo ifyo bakanonkelamo mu kubombesha kwabo fya pa nshita fye iinono. Mulandu nshi? Pantu ubushiku bwa kwa Yehova bukabapumikisha, kabili ifyuma fyonse ifyo benganonka tafyakabapusushe.—Sefania 1:18.

“Ucilolele”

11. Kukonkomesha nshi uko tulingile ukulaibukisha?

¹¹ Ukupusanako na bantu ba muli cino calo, ifwe tulingile ukulaibukisha ifyo Habakuki atukonkomesha, atila: “Icimonwa cicili cilelola ku nshita iyalingilwe, cilabutukisha ukulola ku mpela—tacakabepe ubufi; nga cashingashinga e lyo ucilolele, pantu ukwisa cikesa, tacakashimbe iyo.” (Habakuki 2:3) Nangu mu buntunse bulya bushiku kuti bwamoneka ngo bulekokola, ico tulingile ukulaibukisha ca kuti Yehova tashingashinga. Ubushiku bwakwe bukesa pa nshita iyalinga, pa kashita ako abantu bashakaleenekela.—Marko 13:33; 2 Petro 3:9, 10.

12. Bushe Yesu asokele pali cinshi, kabili fyapusanako shani ku fyo abasambi bakwe aba cishinka bacita?

¹² Ilyo Yesu alekomaila pa bucindami bwa kulolela ubushiku bwa kwa Yehova, atile nangu fye basambi bakwe bamo bali no kutendeka ukulatontonkanya ukuti ubushiku bwa kwa Yehova tabwakese bwangu. Asobele pali bena ukuti: “Umusha mubi nga mu mutima wakwe atila, ‘Shikulu akokola,’ kabili atendeka ukupuma abasha banankwe, no kulya no kunwa pamo na bacakolwa bene bene, shikulu wa ulya musha akesa pa bushiku ubo ashenekele na mu nshita iyo ashishibe, kabili akamukanda icine cine.” (Mateo 24:48-51) Lelo, umusha wa cishinka kabili uwashilimuka ena alishiba ukuti ubushiku bwa kwa Yehova nabupalama nga nshi. Ababa mwi bumba lya musha wa cishinka balalola kabili bali-iteyanya. Yesu alibalaasa pa “fikwatwa fyakwe fyonse” ifya pano isonde.—Mateo 24:42-47.

Tulingile Ukulaibukisha Ukuti Tuli mu Nshita ya ku Mpela

13. Bushe amashiwi Yesu asosele yalanga shani ukuti Abena Kristu balingile ukumfwila ukusoka ukwabula ukushingashinga?

¹³ Calicindeme sana ku Bena Kristu ba kubalilapo ukulaibukisha ukuti bali mu nshita sha ku mpela. Ilyo bamwene Yerusalemu “nashingwa ku milalo ya fita,” balingile ukufulumuka ukwabula ukushingashinga. (Luka 21:20, 21) Abashilika bashingile Yerusalemu mu 66 C.E. Moneni amashiwi Yesu asosele ayalanga ukuti Abena Kristu baliko pali ilya nshita balingile ukulaibukisha ukutila bali mu nshita sha ku mpela. Atile: “Uuli pa mutenge eika ku kufumya  ifipe mu ng’anda yakwe; no uli mwi bala ebwelela ku ng’anda ku kubuulo mwingila wakwe.” (Mateo 24:17, 18) Apo ilyashi lilanda pa fyacitike kale lilanga ukutila palipitile imyaka ine pa kuti bonaule Yerusalemu, mulandu nshi Abena Kristu balingile ukufulumuka ukwabula ukushingashinga mu mwaka wa 66 C.E. pa kumfwila ifyo Yesu alandile?

14, 15. Mulandu nshi cacindamine sana ku Bena Kristu ba kubalilapo ukufulumuka mu Yerusalemu ukwabula ukushingashinga lintu bamwene Yerusalemu nashingwa ku milalo ya fita?

¹⁴ Ca cine, abena Roma tabaonawile Yerusalemu mpaka mu 70 C.E., lelo pali ilya myaka ine mu Yerusalemu tamwali umutende nangu panono. Mwali ukulwa imbuli no kusumya umulopa. Umwaume umo uulemba ilyashi lya kale alandile pa fyalecitika mu Yerusalemu ilya nshita ukuti “mwali inkondo ya bana calo umo baipeye abantu abengi nga nshi, kabili abantu balebacusha bulukubuluku.” Abalumendo balibengishe umulimo wa kukosha ilinga, ukusambilila ifya kubomfya ifyanso, no kubomba ubushilika. Cila bushiku balebakansha ifya kubomba mu bushilika. Abashaletungilila ifyalecitika mu musumba balebamona kwati ni bashikamfutu. Nga ca kuti Abena Kristu balikokwele ukufulumuka mu musumba, nga bali mu bwafya icine cine.—Mateo 26:52; Marko 12:17.

¹⁵ Moneni ukuti Yesu tatile abali mu Yerusalemu fye e bali no kufulumuka, lelo atile “abali mu Yudea” bali no kutendeka ukufulumuka. Ici calicindeme pantu pa numa fye ya myeshi iinono ukutula apo bafumine ku Yerusalemu, abena Roma balitendeke na kabili ubulwi. Mu 67 C.E., balicimfishe Galili, lyena mu mwaka wakonkelepo bacimfishe Yudea ukulingana ne fyo bateyenye. Ici calengele ukuti mu mishi yapalamineko mube amacushi. Kabili calengele no kuti abaYuda abali mu Yerusalemu bafilwe ukufulumukamo. AbaYuda balelinda impongolo, kabili onse uwalefwaya ukufulumuka mu musumba balemumona kwati afutuka abaYuda no kutendeka ukutungilila abena Roma.

16. Pa kupusuka ilya nshita ya mafya, mibele nshi Abena Kristu balingile ukukwata?

¹⁶ Ifi fishinka twalandapo filetwafwa ukumfwikisha umulandu Yesu akomailepo ukuti Abena Kristu bali no kwangufyanya ukufulumuka. Balingile ukuipeelesha, ukuipusula kuli fimo, tabali na kuleka ifikwatwa ukubapumbula. Bali no kuitemenwa ‘ukuleka fyonse ifyo [bakwete]’ pa kuti fye bomfwile ukusoka kwa kwa Yesu. (Luka 14:33) Abaumfwilile ukusoka no kufulumukila bushilya bwa Yordani ukwabula ukushingashinga, balipuswike.

Tatulingile Ukulaba Ukuti Inshita Naicepa

17. Mulandu nshi tulingile ukulamwena ukuti inshita iisheleko naicepa sana?

¹⁷ Ukusesema kwa mu Baibolo kulanga ukuti  tuli ku mpela ya nshiku sha kulekelesha. Kanshi, ukucila kale lyonse, tulingile ukulaibukisha sana ukuti inshita isheleko naicepa. Nga kuli icibote umushilika tapamfiwa nelyo ukusakamikwa ukuti kwalaba inkondo. Lelo ici nga camulenga ukukanalola e lyo mu kupumikisha bamwita ku nkondo, nalimo te kuti aiteyanye bwino bwino kabili kuti mwafuma ifyabipa. E fyo caba na ku bulwi bwa ku mupashi ubwa Bena Kristu. Nga ca kuti twalamona kwati ubushiku bwa kwa Yehova buli ku ntanshi sana, te kuti tuiteyanye ukucimfya amesho ayengesa pali ifwe kabili ubushiku bwa kwa Yehova kuti bwatupumikisha. (Luka 21:36; 1 Abena Tesalonika 5:4) Nga ca kuti bamo ‘balifutuka mu kukonka Yehova,’ ino e nshita ya kuti batendeke ukumufwaya na kabili.—Sefania 1:3-6; 2 Abena Tesalonika 1:8, 9.

18, 19. Cinshi cikatwafwa ukulaibukisha “ukubapo kwa bushiku bwa kwa Yehova”?

¹⁸ E mulandu wine umutumwa Petro atukonkomesha ukuti tuleibukisha “ukubapo kwa bushiku bwa kwa Yehova”! Bushe kuti tuleibukisha shani ukubapo kwa bushiku bwa kwa Yehova? Cimo ico twingacita kuba “abantu ba musango wa myendele ya mushilo ne milimo ya kuipeelesha kuli bukapepa.” (2 Petro 3:11, 12) Ukuba abacincila mu milimo ya bukapepa kukatwafwa ukulalolela no kulafwaisha ukuti “ubushiku bwa kwa Yehova” bufike. Nga kulikonka fye, ishiwi lya ciGriki ilyo bapilibula ukuti “ukulaibukisha” lipilibula “ukwangufyanya.” Kwena, teti tulenge inshita yashalako ukupwa mu kwangufyanya pa kuti ubushiku bwa kwa Yehova bwise. Lelo, ilyo tulelolela bulya bushiku, inshita ikamoneka kwati yaenda bwangu nga tuli abacincila mu mulimo wa kwa Lesa.—1 Abena Korinti 15:58.

¹⁹ Ukulatontonkanya sana pa fyo tubelenga mu Cebo ca kwa Lesa na pa fya kutucinkulako ifyabamo nako kukatwafwa ukucita ici, e kuti “ukufulukisho kwisa” kwa bulya bushiku, ‘ukubulolela.’ (2 Petro 3:12, Baibolo wa Cibemba uwa mu 1956; Icipangano Cipya) Mu fya kutucinkulako mwaba ukusesema ukwingi ukusobela ukwisa kwa bushiku bwa kwa Yehova, e lyo na mapaalo ayengi ayo abantu ‘abalindilila Yehova’ bakaipakisha.—Sefania 3:8.

20. Kukonkomesha nshi uko tulingile ukumfwila?

²⁰ Ino e nshita iya kuti ifwe bonse tumfwile ukukonkomesha kwa kwa kasesema Sefania ukutila: “Ilyo kucili takulaisa pali imwe icifukushi ca bukali bwa kwa Yehova, ilyo ubushiku bwa bukali bwa kwa Yehova tabulaisa pali imwe. Fwayeni Yehova, mwe bafuuka ba mu calo bonse; mwe bacito bupingushi bwakwe, fwayeni ubulungami, fwayeni ubufuke; napamo kuti mwabelama mu bushiku bwa bukali bwa kwa Yehova.”—Sefania 2:2, 3.

21. Cinshi ico abantu ba kwa Lesa bakalafwaisha ukucita mu mwaka wa 2007?

²¹ Kanshi ilembo lya mwaka ilisalilwe ilya mu 2007 nalilinga, lileti: “Nabupalamo bushiku bukulu bwa kwa Yehova.” Abantu ba kwa Lesa balishininkisha ukuti “nabupalama no kwangufyanisha.” (Sefania 1:14) ‘Tabwakashimbe iyo.’ (Habakuki 2:3) E ico, shi natulelola no kulaibukisha ukuti tuleikala mu nshita sha mpela no kuti ukufikilishiwa kwa kupelako ukwa uku kusesema na kupalama!

Bushe Kuti Mwayasuka Shani?

• Bushe “ubushiku ubukulu ubwa kwa Yehova” e cinshi?

• Mulandu nshi abengi bamwena kwati ubushiku bwa kwa Yehova bucili ukutali?

• Mulandu nshi Abena Kristu ba kubalilapo balingile ukufulumukila ukwabula ukushingashinga?

• Finshi tulingile ukulacita pa kuti tulemona ukutila ubushiku bwa kwa Yehova nabupalamisha?

[Amepusho]

[Amashiwi pe bula 19]

Ilembo lya mwaka mu 2007 likalati: “Nabupalamo bushiku bukulu bwa kwa Yehova.”—Sefania 1:14.

[Ifikope pe bula 16, 17]

Nge fyo cali mu nshiku sha kwa Noa, ilyo ubushiku bwa kwa Yehova bukesa bukapumikisha bakapumya

[Icikope pe bula 18]

Abena Kristu balifulumwike ukwabula ukushingashinga ilyo bamwene Yerusalemu “nashingwa ku milalo ya fita”