Yehova Akacita “Ubulungi”

“Bushe kanshi Lesa takacite ubulungi ku basalwa bakwe abalilila kuli wene akasuba no bushiku?”—LUKA 18:7.

1. Ni bani abamukoselesha sana, kabili mulandu nshi?

PA NTE SHA KWA YEHOVA mwi sonde lyonse paba abaume na banakashi aba cishinka ababombela Yehova pa myaka iingi. Bushe mwalishibapo bamo pali aba baume na banakashi batemwikwa? Nalimo mwatontonkanya pali nkashi umo umukalamba uwabatishiwe kale uushipuswa sana ku kulongana pa Ng’anda ya Bufumu. Nelyo limbi mwatontonkanya pali munyinefwe umukalamba uubombela pamo ne cilonganino mu mulimo wa kushimikila kabili alabomba ifyo fine pa myaka iingi. Na kuba, abengi pali aba baume na banakashi ba cishinka balemona kwati pali ino nshita Armagedone ikaba naipita kale. Nomba nangu ici calo cibifi calitwalilila ukubapo, icitetekelo cabo mu malayo ya kwa Yehova tacanenuka kabili bapampamina pa ‘kushipikisha ukufika na ku mpela.’ (Mateo 24:13) Icitetekelo cakosa ica aba babomfi ba kwa Yehova aba cishinka cilakoselesha sana aba mu filonganino.—Amalumbo 147:11.

2. Cinshi cicitika icituletela ubulanda?

² Lelo, limo limo, limbi kuti twamona abakwata imibele iyapusanako. BaNte bamo balebomba fye bwino mu mulimo wa kushimikila pa myaka iingi, lelo mu kuya kwa nshita icitetekelo cabo muli Yehova calinenuka, kabili balileka no kusangwa ku kulongana kwa Bena Kristu. Tulaba no bulanda ukumona abo twalelongana nabo baleka ukubombela Yehova. E ico, tufwaisha ukutwalilila ukwafwa ‘impaanga shaluba’ imo imo pa kuti shingabwelela kwi cinka. (Amalumbo 119:176; Abena Roma 15:1) Nge fyo tumfwile, bamo balatwalilila ukuba ne citetekelo icakosa no kulabombesha mu mulimo wa kushimikila e lyo bambi bena balanenuka kabili balaleka no kulalongana. Ici cilenga kwaima amepusho ya kuti, Cinshi cilenga baNte abengi ukutwalilila ukucetekela amalayo ya kwa Yehova ilyo bamo bena balanenuka? Cinshi ifwe pa lwesu twingacita pa kuti icitetekelo cesu mu kusesema kutila “ubushiku ubukulu ubwa kwa Yehova” nabupalama citwalilile ukukosa? (Sefania 1:14) Natulande pa cilangililo icaba mwi buuku lya kwa Luka.

Ukusoka ku Bakaba aba Mweo “Ilyo Umwana wa Muntu Akesa”

3. Ni bani benganonkelamo sana mu cilangililo ca kwa mukamfwilwa na kapingula, kabili mulandu nshi?

³ Muli Luka icipandwa 18 mwaliba icilangililo Yesu asosele icilanda pali mukamfwilwa na kapingula. Ici cilangililo calipalana na cilya ica kwa shibweni uwali no mupampamina ico twalandilepo mu cipande cafumineko. (Luka 11:5-13) Lelo, ifyebo fyaba muli ici cilangililo ca kwa mukamfwilwa na kapingula filanga ukuti ici cilangililo cakuma sana abakaba no mweo “ilyo Umwana wa muntu akesa” mu maka ya Bufumu, kabili iyi nshita yatendeke mu 1914.—Luka 18:8. *

4. Mashiwi nshi Yesu abalile asosa ilyo ashilalanda icilangililo caba muli Luka icipandwa 18?

⁴ Ilyo Yesu ashilalanda icilangililo ca kwa  mukamfwilwa na kapingula, abalile atila abantu abengi bakeluka ukuti aleteka mu maka ya Bufumu kwati fye ni “filya fine ne nkuba . . . isanika ukufuma ku lubali lumo ulwa muulu ukufika ku lubali lubiye ulwa muulu.” (Luka 17:24; 21:10, 29-33) Na lyo line, abantu abengi abaleikala mu “nshita ya ku mpela” tababika amano ku bushininkisho ubulanga ukuti Yesu aleteka. (Daniele 12:4) Mulandu nshi? Umulandu bashibikilako amano umo wine na ulya walengele abantu mu nshiku sha kwa Noa na Lote ukukanabika amano ku kusoka kwa kwa Yehova. Pali ilya nshita abantu ‘balelya, balenwa, baleshita, baleshitisha, balebyala, no kukuula mpaka no bushiku babonawile.’ (Luka 17:26-29) Balifwile pantu balisendelwe ku milimo ya cila bushiku ica kuti tababikile amano ku kucita ukufwaya kwa kwa Lesa. (Mateo 24:39) Na lelo line, abantu abengi balisendwa ku milimo ya cila bushiku ica kuti balafilwa ukwiluka ukuti impela ya ici calo cabipa naipalama.—Luka 17:30.

5. (a) Ni bani Yesu alesoka, kabili mulandu nshi? (b) Cinshi calenga icitetekelo ca bamo ukunenuka?

⁵ Yesu alisakamikwe ukuti icalo ca kwa Satana kuti calenga na basambi bakwe ukupumbulwa ica kuti ‘babwelela na ku fyashala ku numa.’ (Luka 17:22, 31) Na kabushe, e fyacitika ku Bena Kristu bamo. Pa myaka iingi aba musango yo balefwaisha ukuti Yehova akonaule cino calo cibifi. Lelo, ilyo Armagedone ishaishile pa nshita baleenekela, balinenwike. Icitetekelo bakwete, ukuti ubushiku bwa bupingushi ubwa kwa Yehova nabupalama, calinakile. Balekele ukubomba lyonse mu mulimo wa kushimikila kabili mu kuya kwa nshita babikile amano ku kubomba imilimo yalekanalekana iya mu bwikashi ica kuti tabalekwata inshita ya kukosha bucibusa bwabo na Lesa. (Luka 8:11, 13, 14) Ku ca bulanda, mu kupelako, ‘babwelele ku fyashele ku numa.’

Tufwile “Ukulapepa Lyonse”

6-8. (a) Shimikeni icilangililo ca kwa mukamfwilwa na kapingula. (b) Bushe Yesu alondolwele shani umo ici cilangililo calolele?

⁶ Cinshi tufwile ukucita pa kuti icitetekelo cesu mu malayo ya kwa Yehova cikanenuka? (AbaHebere 3:14) Yesu ayaswike ici cipusho ilyo fye asokele abasambi bakwe ukukanabwelela ku calo cabipa ica kwa Satana.

⁷ Luka ashimika ukuti Yesu “abebele icilangililo ca kuti bafwile ukulapepa lyonse no kukananenuka.” Yesu atile: “Mu musumba umo mwali kapingula umo uushaletiina Lesa, nangu kucindika abantu. Awe mwali mukamfwilwa mu musumba ulya uwaleya kuli wene, ati, ‘Mwikaleka nkafyengwe ku ulentwala ku cilye.’ Na o alikeene pa kashita kamo, lelo pa numa asosele mu mutima ati, ‘Nelyo nshitiina Lesa, nangu kucindika umuntu, kwena, pa mulandu wa kumpamfya pe kuli uyu mukamfwilwa, nshakaleke akafyengwe, pa kuti elaisa pe no kuntendusha.’”

⁸ Pa numa ya kushimika ici cilangililo Yesu  nomba alondolwele umo calolele, atile: “Umfweni ico kapingula asosa, nangu talungama! Bushe kanshi Lesa takacite ubulungi ku basalwa bakwe abalilila kuli wene akasuba no bushiku, nangu ca kuti alashishimisha kuli bene? Ndemweba, nati, Akacita bwangu ubulungi kuli bene. Lelo ilyo Umwana wa muntu akesa, bushe akasange citetekelo pano isonde?”—Luka 18:1-8.

“Mwikaleka Nkafyengwe”

9. Cinshi cilekomailwapo mu cilangililo ca kwa mukamfwilwa na kapingula?

⁹ Icilekomailwapo muli ici cilangililo nacumfwika bwino bwino. Bonse abali mu cilangililo nabacilandapo, ukusanshako fye na Yesu wine. Mukamfwilwa apaapaatile ukuti: “Mwikaleka nkafyengwe.” Kapingula atile: “Nshakaleke akafyengwe.” Yesu aipwishe ukuti: “Bushe kanshi Lesa takacite ubulungi.” Kabili Yesu alandile ulwa kwa Yehova ukuti: “Akacita bwangu ubulungi kuli bene.” (Luka 18:3, 5, 7, 8) Bushe ni lilali ilyo Lesa akacita “ubulungi”?

10. (a) Ni lilali inshiku sha cilandushi shaliko mu mwanda wa myaka uwa kubalilapo? (b) Ni lilali Lesa akacita ubulungi ku bantu bakwe muno nshiku kabili mu nshila nshi?

¹⁰ Mu mwanda wa myaka uwa kubalilapo, “inshiku sha cilandushi” shaliko mu 70 C.E. ilyo Yerusalemu ne tempele fyaonawilwe. (Luka 21:22) Ku bantu ba kwa Lesa pali lelo, Lesa akacita ubulungi pa “bushiku ubukulu ubwa kwa Yehova.” (Sefania 1:14; Mateo 24:21) Pali ilya nshita, Yehova ‘akabwesesho bucushi ku bacusha’ abantu bakwe “ilyo [Yesu Kristu] akalete cilandushi pa bashaishiba Lesa na bashinakila imbila nsuma iya kwa Shikulwifwe Yesu.”—2 Abena Tesalonika 1:6-8; Abena Roma 12:19.

11. Bushe Lesa akacita shani ubulungi “bwangu”?

¹¹ Bushe tulingile ukumfwila mwi ubulayo bwa kwa Yesu ubwa kuti Yehova akacita “bwangu” ubulungi? Icebo ca kwa Lesa citila “nangu ca kuti [Yehova] alashishimisha,” akangufyanya ukucita icilandushi ilyo inshita ikafika. (Luka 18:7, 8; 2 Petro 3:9, 10) Ilyo kwali Ilyeshi mu nshiku sha kwa Noa, ababifi balibonawile mu kwangufyanya. Nangu fye ni mu nshiku sha kwa Lote, ababifi balyonaike lintu umulilo walokele ukufuma ku muulu. Yesu atile: “E fyo cikaba na mu bushiku bulya ilyo Umwana wa muntu akasokololwa.” (Luka 17:27-30) Na kabili, “ubonaushi bwa kupumikisha” bukesa pa babifi. (1 Abena Tesalonika 5:2, 3) Ca cine, kuti twashininkisha ukuti Yehova takaleke nangu bushiku fye bumo ukupita pa nshita yalinga iya konaula icalo ca kwa Satana.

‘Akacita Ubulungi’

12, 13. (a) Bushe icilangililo casosele Yesu ica kwa mukamfwilwa na kapingula citusambilisha cinshi? (b) Mulandu nshi tulingile ukucetekela ukuti Yehova akomfwa amapepo yesu no kucita ubulungi?

¹² Icilangililo Yesu alandile ica kwa mukamfwilwa na kapingula cilakomaila pa fishinka na fimbi ifyacindama. Ilyo Yesu alelondolola umwalolele icilangililo, atile: “Umfweni ico kapingula asosa, nangu talungama! Bushe kanshi Lesa takacite ubulungi ku basalwa bakwe?” Kwena, Yesu talelinganya Yehova kuli kapingula kwati Lesa na o kuti asunga ababomfi bakwe mu nshila imo ine. Ukucila, Yesu asambilishe abasambi bakwe isambililo pali Yehova ilyo acilenye Lesa na kapingula. Ni mu nshila nshi umo Lesa apusanako na kapingula?

¹³ Kapingula uwa mu cilangililo ca kwa Yesu ali ‘uushalungama,’ lelo “Lesa mupingushi uwalungama.” (Amalumbo 7:11; 33:5) Kapingula talesakamana mukamfwilwa, nomba Yehova ena alasakamana ifwe bonse. (2 Imilandu 6:29, 30) Kapingula talefwaya ukwafwa mukamfwilwa, lelo Yehova ena aliiteyanya kabili alafwaisha ukwafwa ababomfi Bakwe. (Esaya 30:18, 19) Cinshi tulesambililako? Apo kapingula uushalungama alikutike kuli mukamfwilwa no kucita ubulungi, kanshi Yehova ena alacishanapo ukumfwa amapepo ya bantu bakwe kabili alacita ubulungi kuli bena!—Amapinda 15:29.

14. Mulandu nshi tushilingile ukunaka ukulolela ubushiku bwa kwa Lesa ubwa bupingushi?

 ¹⁴ Kanshi, abanaka ukulolela ubushiku bwa kwa Lesa ubwa bupingushi balacita icilubo icikalamba nga nshi. Mulandu nshi? Ukuleka ukucetekela ukuti “ubushiku ubukulu ubwa kwa Yehova, nabupalama,” kulanga ukutila balatwishika nampo nga Yehova kuti afikilisha amalayo yakwe. Nomba takwaba uwakwata insambu sha kutwishika Lesa. (Yobo 9:12) E ico, icipusho cacindama ca kuti, Bushe ifwe pa lwesu tukatwalilila ukuba aba cishinka? Ili line e lyashi Yesu alandilepo ku mpela ya cilangililo ca kwa mukamfwilwa na kapingula.

“Bushe Akasange Citetekelo ici Pano Isonde?”

15. (a) Cipusho nshi Yesu aipwishe, kabili mulandu nshi? (b) Cipusho nshi tulingile ukuipusha?

¹⁵ Yesu aipwishe icipusho icisuma, atile: “Ilyo Umwana wa muntu akesa, bushe akasange citetekelo ici pano isonde?” (Luka 18:8, utulembo twa pe samba) Amashiwi ya kuti “citetekelo ici” yalelanga ukutila Yesu talelosha ku citetekelo ico uuli onse engakwata, lelo alelosha ku citetekelo icaibela, nga cilya cakweteko mukamfwilwa. Yesu tayaswike icipusho aipwishe. Aipwishe ici cipusho pantu alefwaya abasambi bakwe ukutontonkanyapo pa kuti bamone nga bakwete icitetekelo nga cilya ica kwa mukamfwilwa. Bushe icitetekelo cabo caleya cilenaka ica kutila kuti babwelela na ku fintu ifyo bashile ku numa? Nelyo bushe bakwete icitetekelo nga cilya ica kwa mukamfwilwa? Na ifwe bene tulingile ukuipusha ukuti, ‘Citetekelo ca musango nshi ico “Umwana wa muntu” asanga mu mutima wandi?’

16. Citetekelo ca musango nshi ico mukamfwilwa akwete?

¹⁶ Pa kuti tukabe pa bantu Yehova akacitila ubulungi, tulingile ukuba ne citetekelo nge ca kwa mukamfwilwa. Citetekelo ca musango nshi akwete? Alangile icitetekelo cakwe lintu ali no mute wa ‘kuya kuli [kapingula] ati, “Mwikaleka nkafyengwe.”’ Ulya mukamfwilwa ali no mute pa kuti fye umuntu uushalungama acite ubulungi kuli ena. E fyo caba na ku babomfi ba kwa Lesa pali lelo, bafwile ukucetekela ukuti Yehova akacita ubulungi kuli bena, nangu cingamoneka kwati papita inshita iikalamba nga kulingana ne fyo baleenekela. Na kabili, balanga ukuti balitetekela amalayo ya kwa Lesa lintu baba no mute wa kupepa, lintu ‘balilila kuli ena akasuba no bushiku.’ (Luka 18:7) Na kabushe, nga ca kuti Umwina Kristu alekele ukupepela ubulungi ukucitwa, kuti calanga fye ukutila icitetekelo cakwe calinenuka. Alatwishika nampo nga Yehova kuti acita ubulungi ku bantu bakwe.

17. Milandu nshi twakwata iya kubela no mute wa kupepa no kucetekela ukuti ubushiku bwa kwa Yehova ubwa bupingushi bukesa?

¹⁷ Nga twatontonkanya pa fyo ifintu fyali kuli mukamfwilwa, tulamona ukuti ifwe twalikwata imilandu iingi iya kubela no mute wa kupepa. Natumone ubupusano bumo bumo ubwaba pali mukamfwilwa na ifwe. Mukamfwilwa aleya libili libili kuli kapingula nangu tapali nelyo umo uwalemukoselesha ukucite fyo, nomba ifwe Icebo ca kwa Lesa citukoselesha ‘ukuba no mute wa kupepa.’ (Abena Roma 12:12) Mukamfwilwa tabamulaile ukuti bakamupeela ifyo alefwaya, lelo ifwe Yehova alitulaya ukuti akacita ubulungi. Ukupitila muli kasesema wakwe, Yehova atile: “Nga cashingashinga e lyo ucilolele, pantu ukwisa cikesa, tacakashimbe iyo.” (Habakuki 2:3; Amalumbo 97:10) Mukamfwilwa takwete  uwa kumwafwa nelyo ukumupaapaatilako pa kuti bengamupeela ifyo alekabila. Nomba ifwe twalikwata uwakutwafwa uwa maka nga nshi, Yesu “uwaba ku kwa kulyo kwa kwa Lesa, kabili uutupaapaatilako.” (Abena Roma 8:34; AbaHebere 7:25) E ico, mukamfwilwa uo ifintu fyayafishe nga kuti aba no mute wa kupaapaata kapingula ukumucitila ubulungi, ninshi ifwe tufwile ukucishanapo ukucetekela ukuti ubushiku bwa kwa Yehova ubwa bupingushi bukesa!

18. Bushe ipepo kuti lyakosha shani icitetekelo cesu no kutwafwa ukupokelelela ubulungi?

¹⁸ Icilangililo ca kwa mukamfwilwa citusambilisha ukuti ipepo ne citetekelo fyalyampana sana, no kuti ukuba no mute wa kupepa kuti kwacincintila fyonse ifinganasha icitetekelo cesu. Lelo, ici tacilolele mu kuti ukumoneka fye ukutila tulapepa kuti kwacincintila ifingapwisha icitetekelo cesu. (Mateo 6:7, 8) Nga twaishiba ukuti twashintilila pali Lesa, tukalapepa kuli ena lyonse, kabili ipepo likatupalamika kuli wena ne citetekelo cesu cikakosa. Kabili icitetekelo cilafwaikwa pa kupusuka. Kanshi e mulandu wine Yesu amwenene ukuti calilingile ukukoselesha abasambi bakwe “ukulapepa lyonse no kukananenuka”! (Luka 18:1; 2 Abena Tesalonika 3:13) Kwena, ukwisa kwa “bushiku ubukulu ubwa kwa Yehova” takwashintilila pa mapepo yesu. Nangu tupepe nelyo iyo, ubushiku bwa kwa Yehova bwena bukesa. Lelo, ukupusuka inkondo ya kwa Lesa no kupokelela ubulungi kwena kwashintilila pa citetekelo twakwata na pa kuba no mute wa kupepa e lyo ne mibele isuma.

19. Bushe tulanga shani ukuti twalicetekela ukutila Lesa ‘akacita ubulungi ku basalwa bakwe’?

¹⁹ Nga tuleibukisha, Yesu aipwishe ukuti: “Ilyo Umwana wa muntu akesa, bushe akasange citetekelo ici pano isonde?” Bushe kuti twayasuka shani ici cipusho cisuma? Ala twaliba ne nsansa ukwishiba ukuti ababomfi ba kwa Yehova abengi nga nshi mwi sonde lyonse balikwata icitetekelo ca musango yu! Ici citetekelo cimonekela mu mapepo yabo, ukutekanya, no mute bakwata. Kanshi ukwabula no kutwishika, imilimo ya babomfi ba kwa Lesa ilasuka icipusho ca kwa Yesu. Ca cine, te mulandu ne fyo icalo ca kwa Satana citufyenga, twalicetekela ukuti Lesa ‘akacita ubulungi ku basalwa bakwe.’

[Futunoti]

Bushe Muleibukisha?

• Cinshi calenga icitetekelo ca Bena Kristu bamo ukunenuka?

• Mulandu nshi tulingile ukubela ne citetekelo cakosa ukuti ubushiku bwa kwa Yehova ubwa bupingushi bukesa?

• Milandu nshi twakwata iya kubela no mute mu kupepa?

• Bushe ukuba no mute wa kupepa kuti kwalenga shani icitetekelo cesu ukukananenuka?

[Amepusho]

[Icikope pe bula 26]

Bushe icilangililo ca kwa mukamfwilwa na kapingula cikomaila pali cinshi?

[Ifikope pe bula 29]

Pali lelo abantu abengi nga nshi balicetekela ukuti Lesa ‘akacita ubulungi’