Yehova Apeela “Umupashi Wa Mushilo ku Balemulomba”

“Nga imwe nangu muli babifi, mwaishiba ukupeela abana benu ifya bupe ifisuma, kanshi Shinwe wa mu muulu wena akacishamo ukupeela umupashi wa mushilo ku balemulomba!”—LUKA 11:13.

1. Ni lilali ilyo tukabila sana ukwafwa ukwa mupashi wa mushilo?

‘TE KUTI nshipikishe ubu bwesho pa lwandi. Kuti nashipikisha fye nga ca kuti umupashi wa mushilo wangafwa!’ Bushe mwaliyumfwapo ifi? Abena Kristu abengi balyumfwapo ifyo. Nalimo mwaumfwile ifi ilyo mwaishibe ukuti namulwala ubulwele ubwingamufisha ku mfwa. Limbi ni lintu abena mwenu abo mwaikele nabo imyaka iingi bafwile, nelyo napamo ni lintu insansa shenu shayalwike ubulanda. Pa nshita ilyo mwaculile nga nshi, nalimo mwamwene kwati icalengele mushipikishe ni co umupashi wa mushilo uwa kwa Yehova walimupeele “amaka yacila aya lyonse.”—2 Abena Korinti 4:7-9; Amalumbo 40:1, 2.

2. (a) Mafya nshi ayo Abena Kristu ba cine bapitamo? (b) Mepusho nshi ayo twalalandapo muli ici cipande?

² Pali lelo, fwe Bena Kristu ba cine tulapita mu mafya ayengi no kukaanya ififuma ku bantu ba muli cino calo abashipepa Lesa. (1 Yohane 5:19) Na kabili, Satana Kaseebanya, uulwisha “ababaka amafunde ya kwa Lesa kabili abakwata umulimo wa kushimika ubunte bwa kwa Yesu,” alatusansa. (Ukusokolola 12:12, 17) E mulandu wine tufwaila umupashi wa kwa Lesa ukulatutungilila sana ukucila kale lyonse. Cinshi tulingile ukucita pa kuti twingatwalilila ukulapokelela umupashi wa mushilo uwa kwa Lesa? Kabili mulandu nshi twingashininkishisha ukuti Yehova alafwaisha ukutupeela amaka ayo tukabila pa kushipikisha amesho? Amasuko kuli aya mepusho tuyasanga mu filangililo fibili ifya kwa Yesu.

Muleba no Mupampamina pa Kupepa

3, 4. Cilangililo nshi Yesu asosele, kabili acilondolwele shani ukulosha kwi pepo?

³ Bushiku bumo, umusambi aebele Yesu ukuti: “Mwe Shikulu, tusambilisheni ukupepa.” (Luka 11:1) Pa kwasuka, Yesu alandile ifilangililo fibili ku basambi bakwe. Ica kubalilapo cali pa mwaume uwapokelele umweni, e lyo ica bubili calelanda pali wishi uwakutike ku mwana wakwe. Natulande pali ifi filangililo cimo na cimo.

⁴ Yesu atile: “Nani pali imwe uuli no munankwe kabili nga aya kuli wene ubushiku pa kati no kumweba ati, ‘We munandi, njashimako imikate itatu, pantu umunandi uuli pa lwendo namfikilila kabili nshikwete ica kumupeela’? No uli mu kati ayasuka ati, ‘Wimpamfya. Ku ciibi nakukomwa, kabili ine na bana bandi tuli pa busanshi; te kuti njime nkupeele.’ Ndemweba, nati, Nangu taciba na kwima no kumupeela, pa mulandu wa kuti munankwe, na pa mulandu wa mupampamina wakwe, kuti aima no kumupeela ifyo alekabila.” Lyena Yesu alondolwele ifyo ici cilangililo cayampene ne lyashi balelandapo ilye pepo, atile: “E ico ndemweba, nati, Mulelomba, kabili mukapeelwa; Mulefwaya, kabili mukasanga; mulekonkonsha, kabili cikeswilwa kuli imwe. Pantu onse uulomba alapokelela, na onse uufwaya alasanga, na onse uukonkonsha aleswilwa.”—Luka 11:5-10.

5. Bushe icilangililo ca mwaume uwali no mupampamina citusambilisha cinshi pa mibele tulingile ukukwata ilyo tulepepa?

⁵ Ici cilangililo ca mwaume wali no mupampamina ciletusambilisha imibele tulingile  ukukwata ilyo tulepepa. Moneni ukuti Yesu atile icalengele ulya mwaume bamupeele ifyo alefwaya “mupampamina wakwe.” (Luka 11:8) Ishiwi lya ciGriki ilyo bapilibula ati “umupampamina” lisangwa fye umuku umo mu Baibolo. Nga kulikonka fye, ili shiwi lipilibula “ukupama.” Ilingi line “ukupama,” kupilibula ukuti umuntu aliba ne misango iyabipa. Lelo, ilyo ukupama nelyo umupampamina kwabomfiwa pa cintu iciweme, kuti kwaba mibele iisuma nga nshi. E fyo cali kuli ulya shibweni wa mu cilangililo ca kwa Yesu. Alipamine, nelyo ali no mupampamina, ilyo alelomba ifyo alekabila. Apo Yesu alanga ukuti tufwile ukupashanya uyu shibweni, tulingile ukuba no mupampamina ilyo tulepepa. Yehova afwaya ukuti ‘tulelomba, tulefwaya, no kulakonkonsha. Na o ‘akapeela umupashi wa mushilo ku balemulomba.’

6. Bushe abantu balekutika kuli Yesu balemona shani ulutambi lwa kuba ne cileela?

⁶ Yesu atulanga ifyo tulingile ukupepa no mupampamina e lyo no mulandu tulingile ukucitile fyo. Pa kuti twishibe bwino bwino isambililo lili muli ici cilangililo, tufwile ukutontonkanya pa fyo abantu abalekutika kuli Yesu balemona icileela. Imiku iingi, Amalembo yalanga ukuti pa nshita balelemba Baibolo, ukusakamana abeni kwali lutambi ulwacindama nga nshi, sana sana ku bantu ba kwa Lesa. (Ukutendeka 18:2-5; AbaHebere 13:2) Ukukanaba ne cileela kwali museebanya nga nshi. (Luka 7:36-38, 44-46) Apo twaishiba ifyo abalekutika kuli Yesu balemona icileela, nomba natulande pa cilangililo cakwe.

7. Mulandu nshi shibweni wa mu cilangililo ca kwa Yesu apamine ukubuusha umunankwe?

⁷ Ulya mwaume wa mu cilangililo apokelele umweni pa kati ka bushiku. Shibweni alefwaisha ukupeela umweni wakwe ifya kulya nomba ‘takwete ica kumupeela.’ Kuli ena ukupokelela umweni kwalicindeme nga nshi kabili alingile ukucitapo cimo palya pene fye! Alingile ukufwaya umukate te mulandu ne fyo ali no kupitamo. E ico, aile ku munankwe kabili akoselepo fye mpaka amubuusha. Shibweni abilikishe ukuti: “We munandi, njashimako imikate itatu.” Ilyo alelomba ali no mupampamina mpaka bamupeela ifyo alefwaya. Ali no kuba shibweni musuma nga ca kuti fye akwata imikate.

Umuntu Alaba no Mupampamina wa Kulomba Ifyo Alekabila

8. Cinshi cingalenga ukuti tube no mupampamina pa kulomba umupashi wa mushilo kuli Lesa?

⁸ Ukulingana ne ci cilangililo, bushe mulandu nshi tubela no mupampamina pa kupepa? Ulya mwaume atwalilile fye ukulomba imikate pantu aletontonkanya ukuti apo ali ni shibweni, alingile ukupekanishisha umweni wakwe ifya kulya. (Esaya 58:5-7) Ukwabula umukate, te kuti abe shibweni musuma. E cimo cine na kuli ifwe fwe Bena Kristu ba cine, twalishiba ukuti pa kubomba bwino umulimo wesu tulakabila umupashi wa kwa Lesa, e mulandu tutwalilila ukupepa kuli Lesa, ukumulomba umupashi wakwe. (Sekaria 4:6) Ukwabula  umupashi wa mushilo te kuti tubombe umulimo wesu. (Mateo 26:41) Bushe mwamona ifyo twasambililako kuli ici cilangililo? Nga twaishiba ukuti tulakabila sana umupashi wa kwa Lesa, tukaba no mupampamina wa kumulomba.

9, 10. (a) Langilileni umulandu tulingile ukubela no mupampamina ilyo tulelomba umupashi wa mushilo kuli Lesa? (b) Lipusho nshi tufwile ukuipusha, kabili mulandu nshi?

⁹ Pa kulanga ifyo twasambilila ku cilangililo Yesu asosele, natubomfye icilangililo ca muno nshiku. Elenganyeni ukuti uwa mu lupwa lwenu alwalisha pa kati ka bushiku. Bushe kuti mwayashibusha badokota? Te kuti mucite fyo nga ca kuti lupwa lwenu talwaliishe. Lelo, nga nalwala ubulwele bwa ku mutima, kuti mwapama ukubuusha badokota. Mulandu nshi? Pantu mwaponenwa no bwafya kabili mwailuka ukuti mulekabila badokota ukumwafwa. E ico, mufwile ukucitapo cimo apo pene fye. Pantu nga mwapoosa inshita, umulwele wenu kuti afwa. Mu mampalanya, Abena Kristu nabo baliponenwa no bwafya kabili bafwile ukwangufyanya ukucitapo cimo. Na kuba, Satana endauka nge “nkalamo iilebuluma,” iilefwaya untu ingalya. (1 Petro 5:8) Pa kuti tutwalilile ukuba ifibusa fya kwa Yehova ifya cine cine, tulakabila sana ukwafwa kwa mupashi wa kwa Lesa. Nga tatulombele Lesa ukutwafwa, kuti twaibika mu kapoosa mweo. Kanshi, e mulandu wine tubela no mupampamina pa kulomba umupashi wa mushilo kuli Lesa. (Abena Efese 3:14-16) Nga tulecite fyo, tukatwalilila ukuba na maka ayengatwafwa ‘ukushipikisha ukufika na ku mpela.’—Mateo 10:22; 24:13.

¹⁰ Kanshi, limo limo, calicindama sana ukwikala pa nshi no kuipusha ukuti, ‘Bushe ndaba no mupampamina nga nshi ilyo ndepepa?’ Mwilaba ukutila nga twaishiba ukuti tulakabila ukwafwa kwa kwa Lesa, tukaba no mupampamina pa kumulomba umupashi wa mushilo.

Cinshi Cilenga Tuleba ne Citetekelo Ilyo Tulepepa?

11. Bushe Yesu alondolwele shani icilangililo ca kwa wishi no mwana ukulosha kwi pepo?

¹¹ Icilangililo ca kwa Yesu ica kwa shibweni uwali no mupampamina cilanga imibele Umwina Kristu alingile ukukwata ilyo alepepa. Icilangililo ca bubili cena cilelanga imibele ya kwa Yehova Lesa, uumfwa amapepo. Yesu aipwishe ukuti: “Ni wishi nshi pali imwe, uo umwana wakwe nga alomba isabi, engamupeele nsoka ukucila isabi? Nelyo nga alomba ilini, nani engamupeela kaling’ongo?” Lyena Yesu alondolwele umwalolele icilangililo, atile: “E ico, nga imwe nangu muli babifi, mwaishiba ukupeela abana benu ifya bupe ifisuma, kanshi Shinwe wa mu muulu wena akacishamo ukupeela umupashi wa mushilo ku balemulomba!”—Luka 11:11-13.

12. Bushe icilangililo ica kwa wishi uukutika ku mwana cilanga shani ifyo Yehova aiteyanya ukwasuka amapepo yesu?

¹² Ukubomfya ici ca kumwenako ca kwa wishi uupeela umwana wakwe ifyo alekabila, Yesu aletulanga ifyo Yehova omfwa abantu nga balepepa kuli ena. (Luka 10:22) Intanshi moneni ubupusano buli pali ifi filangililo. Ukupusanako no mwaume wa mu cilangililo ca kubalilapo uwaleshimunuka ukwafwa  uwalelomba ubwafwilisho, Yehova aba kwati mufyashi uusakamana sana abana bakwe, uwaiteyanya ukubapeela conse ico balomba. (Amalumbo 50:15) Na kabili Yesu alanga ifyo Yehova aiteyanya ukwasuka amapepo lintu acilanya wishi umuntunse na Shifwe wa ku muulu. Atila nga ca kuti wishi umuntunse ‘umubifi’ pantu alipyana ulubembu, alapeela ubupe ubusuma ku mwana, kanshi Shifwe wa mu muulu, kapekape, ena akacishamo ukupeela umupashi wa mushilo ku bantu bakwe abamupepa!—Yakobo 1:17.

13. Tulingile ukusubila Yehova ukucita cinshi nga twapepa kuli ena?

¹³ Cinshi tulesambililako? Ilyo tulelomba umupashi wa mushilo kuli Shifwe wa mu muulu tufwile ukucetekela ukuti ali-iteyanya ukutupeela ifyo tulelomba. (1 Yohane 5:14) Ilyo tulepepa no mupampamina kuli Yehova, takasuke nga filya umwaume wa mu cilangililo ca kubalilapo ayaswike ukuti: “Wimpamfya. Ku ciibi nakukomwa.” (Luka 11:7) Lelo, Yesu atile: “Mulelomba, kabili mukapeelwa; Mulefwaya, kabili mukasanga; mulekonkonsha, kabili cikeswilwa kuli imwe.” (Luka 11:9, 10) Ca cine, Yehova “akatwasuka mu bushiku twakuuta.”—Amalumbo 20:9; 145:18.

14. (a) Matontonkanyo nshi ayashawama ayo bamo bakwata nga baleeshiwa? (b) Nga tuleeshiwa, mulandu nshi tulingile ukucetekela Yehova ilyo tulepepa?

¹⁴ Icilangililo Yesu ashimike ica kwa wishi wa cikuuku cilanga no kuti ubusuma bwa kwa Yehova bwalicila nga nshi pa busuma bwa bafyashi abantunse. E ico, tatulingile ukulamona kwati amesho tulepitamo yalelanga ukuti Yehova naleka ukutusakamana. Uufwaya tuletontonkanya ifyo mulwani wesu, Satana. (Yobo 4:1, 7, 8; Yohane 8:44) Amalembo yalanga ukuti tatulingile ukuba na matontonkanyo ya musango yo. Yatila Yehova tatwesha “ku bubi.” (Yakobo 1:13) Ukulingana ne fyo Yesu alandile pali Luka 11:11-13, Shifwe wa mu muulu tatupeela ubwesho ubwaba nge nsoka nelyo nga kaling’ongo, lelo apeela “ifisuma ku balemulomba.” (Mateo 7:11; Luka 11:13) Ca cine, ukwishiba ukuti Yehova musuma sana kabili ali-iteyanya ukutwafwa, kukalenga tukaleba ne citetekelo nga tulepepa. Nga tulepepa muli uyu musango, na ifwe tukalaumfwa nge fyaleumfwa kemba wa malumbo, uwatile: “Cine cine Lesa naumfwa, napeepeka kwi shiwi lye pepo lyandi.”—Amalumbo 10:17; 66:19.

Ifyo Umupashi wa Mushilo Waba Kaafwa Wesu

15. (a) Bulayo nshi Yesu alaile abasambi bakwe ukulosha ku mupashi wa mushilo? (b) Ni nshila nshi imo iyo umupashi wa mushilo utwafwilamo?

¹⁵ Ilyo kwashele fye inshita iinono ukuti Yesu afwe, alibwekeshepo ukusosa amashiwi yalya asosele mu filangililo. Lintu alelanda pa mupashi wa mushilo aebele abatumwa ukuti: “Nkalomba Tata na o akamupeela kaafwa na umbi uwa kuba na imwe pe na pe.” (Yohane 14:16) Kanshi Yesu alaile ukuti uyu kaafwa, nelyo umupashi wa mushilo, ukaba na basambi  bakwe ku ntanshi, ukusanshako na muli shino shine nshiku. Bushe ni mu nshila nshi iyacindama iyo tupokelelamo uku kwafwa? Ica kubalilapo fye, umupashi wa mushilo ulatwafwa ukushipikisha amesho ayalekanalekana. Mu nshila nshi? Umutumwa Paulo uwapitile mu mesho ayengi, alilondolwele muli kalata alembele ku Bena Kristu ba ku Korinti ifyo umupashi wa kwa Lesa wamwafwile. Lekeni tupituluke panono mu fyo alembele.

16. Bushe ubwafya tukwete kuti bwapalana shani na bulya Paulo akwete?

¹⁶ Ica kubalilapo fye, ukwabula ukupita mu mbali Paulo aebele abasumina banankwe ukuti ali no “muunga mu mubili,” e kutila ubwesho. Lyena atile: “Napaapaatile Shikulu [Yehova] imiku itatu ukuti cifume kuli ine.” (2 Abena Korinti 12:7, 8) Nangu ca kuti Paulo alipaapaatile Lesa ukuti afumyepo ubucushi, ubwafya bwalitwalilile. Nalimo e cicitika na kuli imwe. Nga Paulo, limbi na imwe mulapepa no mupampamina ne citetekelo ukuti Yehova afumyepo ubwesho. Lelo, te mulandu ne fyo mupaapaata libili libili, ubwafya bucili buletwalilila. Bushe ici cilepilibula ukuti Yehova tayasuka amapepo yenu no kuti umupashi wakwe taumwafwa? Nakalya! (Amalumbo 10:1, 17) Moneni amashiwi umutumwa Paulo akonkeshepo ukusosa.

17. Bushe Yehova ayaswike shani amapepo ya kwa Paulo?

¹⁷ Ilyo Lesa ayaswike amapepo ya kwa Paulo, amwebele ukuti: “Icikuuku candi ica bupe fye cakumana kuli iwe; pantu mu kunaka e mo amaka yandi yalelengwo kufikapo.” Paulo atile: “E ico, ndeitakisho kucisha no kwanga mu fya kunaka fyandi, ukuti amaka ya kwa Kristu yekale pali ine ukupala ihema.” (2 Abena Korinti 12:9; Amalumbo 147:5) Kanshi ukupitila muli Yesu Kristu, Lesa alecingilila Paulo. Ubucingo bwali kwati nakalimo lihema e lyo bafimbile pali Paulo. Na lelo, Yehova alasuka amapepo mu nshila imo ine. Alacingilila ababomfi bakwe kwati nakalimo nafimba ihema pali bena.

18. Mulandu nshi tushipikishisha amesho?

¹⁸ Ihema lilacingilila umuntu ku mfula nelyo ku mwela, lelo talilesha imfula ukuloka kabili talilesha umwela ukupuupa. E cimo cine na “maka ya kwa Kristu,” tayalesha amesho nangu amafya ukwisa pali ifwe. Lelo yalacingilila abapepa Yehova ku mibele yabipa iya muli cino calo na ku kusansa kwa kwa Satana, kateka wa cino calo. (Ukusokolola 7:9, 15, 16) E ico, lintu muleeshiwa ku bwafya ‘ubushilefuma kuli imwe,’ muleibukisha ukuti Yehova naishiba amacushi yenu no kuti naumfwa “ishiwi lya nkuuta yenu.” (Esaya 30:19; 2 Abena Korinti 1:3, 4) Paulo alembele ukuti: “Wa cishinka Lesa, kabili takamuleke ukweshiwa ukucila pa fyo mwingashipikisha, lelo pamo ne ca kwesha akacita na pa kufuminamo ukuti mube na maka ya kucishipikisha.”—1 Abena Korinti 10:13; Abena Filipi 4:6, 7.

19. Cinshi ico twalapampaminapo ukucita, kabili mulandu nshi?

¹⁹ Na kuba, “inshiku sha kulekelesha” isha cino calo umwafula abantu ababifi shaishibikilwa ku ‘nshita ishayafya.’ (2 Timote 3:1) Nangu cabe fi, ababomfi ba kwa Lesa bena teti bafilwe ukushipikisha. Mulandu nshi? Pantu umupashi wa mushilo uwa kwa Lesa ulabatungilila no kubacingilila. Yehova ali-iteyanya kabili alacishapo ukupeela umupashi wakwe kubamulomba no mupampamina ne citetekelo. E ico, shi natupampamine pa kulalomba umupashi wa mushilo cila bushiku.—Amalumbo 34:6; 1 Yohane 5:14, 15.

Bushe Kuti Mwayasuka Shani?

• Cinshi tulingile ukucita pa kuti twingapokelela umupashi wa mushilo uwa kwa Lesa?

• Mulandu nshi twingabela ne citetekelo ukuti Yehova akasuka mapepo yesu nga tulelomba umupashi wa mushilo?

• Bushe umupashi wa mushilo utwafwa shani ukushipikisha amesho?

[Amepusho]

[Icikope pe bula 21]

Cinshi twingasambilila ku cilangililo ca kwa Yesu ica kwa shibweni wa mupampamina?

[Icikope pe bula 22]

Bushe mulaba no mupampamina pa kulomba umupashi wa mushilo uwa kwa Lesa?

[Icikope pe bula 23]

Finshi tusambilila pali Yehova mu cilangililo ca kwa wishi uusakamana abana?