Abalepwisha Isukulu lya Gileadi Babafunda Ifyebo fya Kubafika pa Mutima

PA 9 SEPTEMBER, 2006, e lyo Isukulu lya Baibolo Ilya Gileadi Ilya Watchtower ilyalenga 121 lyapwile pa Watchtower Educational Center ku Patterson, mu New York. Iyi programu yali ya kukoselesha nga nshi.

Munyina Geoffrey Jackson, uwa mwi Bumba Litungulula ilya Nte sha kwa Yehova, atendeke programu ilyo asengele abalepwisha isukulu 56 na basangilweko 6,366 abafumine mu fyalo fyalekanalekana. Alandile pe lembo lya Amalumbo 86:11 ilitila: “Nangeni inshila yenu, mwe Yehova, nalaenda mu cishinka cenu; lengeni umutima wandi ukusaminwo kuba na katiina kwi shina lyenu.” Munyinefwe Jackson alandile pa fishinka fitatu ifyacindama ifyalandwapo muli ili lembo. Atile: “Amashiwi ya kubalilapo, ya kufunda; ayakonkapo, ya kucita ifyo twafundwa; na ya kulekelesha, icikalamba icilelenga tulecita ico cintu. Ifi fintu fitatu fyalicindama, sana sana kuli imwe bamishonari ilyo muleya ku fifulo fyenu ifya kubombelako.” Lyena alandile pa malyashi yalekanalekana na malyashi ya kwipusha ayali no kukomaila sana pali ifi fishinka fitatu.

Ifyebo Babafundile Ifya Kubakoselesha

BaWilliam Malenfant, ababomba pa maofesi yakalamba aya Nte sha kwa Yehova, balandile ilyashi lyaleti, “Imikalile Yawamisha.” Balandile pa fyacitile Maria, nkashi nankwe uwa kwa Marita. Inshita imo ilyo Yesu abatandalile, Maria asalilepo ukwikala ku makasa ya kwa Yesu no kukutika ku cebo cakwe, ukukutika kuli Yesu e ko acindamike. Yesu aebele Marita ukuti: “Maria ena nasala icintu icisuma, kabili tacakapokwe kuli wene.” (Luka 10:38-42) Kalanda atile: “Taleni tontonkanyeni pali ici cintu. Mpaka fye umuyayaya, Maria akalaibukisha ukuti alikele ku makasa ya kwa Yesu alekutika ku cine ca kwa Lesa icishaiwamina ico Yesu alemushimikila—no mulandu, ni co alisalile bwino.” Pa numa ya kutasha abalepwisha isukulu lya Gileadi pa kusala basalile bwino ifya ku mupashi, abebele ukuti: “Ifyo mwasalile e filengele ukuti mukabe ne mikalile yawamisha.”

Abakonkelepo ni ba Anthony Morris, ababa mwi Bumba Litungulula. Balandile ilyashi lyaleti, “Fwaleni Shikulu Yesu Kristu,” ilyafumine pa Abena Roma 13:14. Kuti twafwala shani Shikulu Yesu Kristu? Ukufwala Shikulu Yesu Kristu kupashanya imibele ya kwa Shikulu. Kanshi ici cilole mu kuti tufwile ukupashanya ifyo Yesu alecita ne mibele yakwe. Kalanda atile: “Yesu alelenga abantu ukulaumfwa bwino nga bali nankwe, pantu alebabikako sana amano kabili na bo balemona ifyo alebabikako amano.” Lyena kalanda alondolwele amano abasambi banonkele mwi sukulu lya Gileadi, filya fine Abena Efese 3:18 batila, ‘ukuti . . . mulingulule ifyabo bufumo no butali no kulepa no kushika’ ukwa cine. Lelo abacinkwileko amashiwi yaba pa cikomo 19 ayatila: “No kwishiba ukutemwa kwa kwa Kristu ukwacila ukwishiba.” Munyinefwe Morris akoseleshe abasambi ukuti: “Ilyo muletwalilila ukusambilila pa lwenu, muletontonkanya ifyo  mwingapashanya inkumbu sha kwa Kristu no ‘kufwala Shikulu Yesu Kristu’” icine cine.

Ukufunda kwa Kulekelesha Ukufuma Kuli Bakafundisha ba Gileadi

Ilyashi lyakonkelepo lyalandilwe na kafundisha wa pa Gileadi, munyinefwe Wallace Liverance, kabili lyafumine pa Amapinda 4:7. Atile, nangu ca kutila amano ya kwa Lesa yalicindama sana, tufwile no ‘kunonka umucetekanya.’ Ukunonka umucetekanya kwalola mu kuti, tufwile ukubika pamo ifishinka fyalekanalekana no kumona ifyo fikatene pa kuti twishibe umo ico cintu cilolele. Kalanda alangilile ukuti ukunonka umucetekanya kulaleta insansa. Ku ca kumwenako, mu nshiku sha kwa Nehemia, abena Lebi “balengele abantu ukwiluka amalango” kabili “baleshilimuna” nelyo ukulondolola. Pa numa, abantu balyangile “ukwanga ukukalamba, pantu bailwike ifyo bashimikilwe.” (Nehemia 8:7, 8, 12)  Munyinefwe Liverance asondwelele ukuti: “Ukumfwikisha Icebo ca kwa Lesa icapuutwamo kulenga umuntu ukusekelela.”

Kafundisha umbi uwa Gileadi, munyina Mark Noumair alandile ilyashi lyaleti, “Bushe Umulwani Wenu Uwa Cine Cine Nani?” Nga kuli inkondo, abashilika abengi balabepaya ku bashilika banabo abali ku lubali lwabo. Aipwishe icipusho ca kuti: “Nga ku bulwi bwesu ubwa ku mupashi bwena caba shani? Nga tatucenjele, kuti twafilwa ukwishiba umulwani wesu uwa cine cine kabili kuti twacena na bashilika abali ku lubali lwesu.” Umufimbila kuti walenga twafilwa ukwishiba umulwani. Umufimbila e walengele Imfumu Shauli ukufwaya ukwipaya Davidi kapepa munankwe, ilintu abalwani babo aba cine cine bali ba Pelishiti. (1 Samwele 18:7-9; 23:27, 28) Lyena kalanda akonkenyepo ukuti: “Ni shani nga ca kutila mulebomba pamo na mishonari uwaishiba ukubomba bwino ifintu ukumucila? Bushe mukasansa umushilika munenu ukupitila mu kulanda amashiwi yabipa, nelyo bushe mukapango mutende pa kwishiba ukuti bambi bakamucila mu nshila shalekanalekana? Ukupoosa sana amano ku filubo fya bambi kukalenga fye ukufilwa ukwishiba umulwani wesu uwa cine cine. Lwisheni Satana, umulwani wa cine cine.”

Ifisuma Ifyacitike no Kwipusha Bamo Ukushimika Ifyacitike

Ilyashi lyakonkelepo ilyaleti “Bombo Mulimo wa Bukabila,” lyalandilwe na bakafundisha ba Gileadi, baLawrence Bowen kabili mwali no kwipusha e lyo no kushimika ifyacitike. Batile: “Umulimo ukalamba uo mishonari uwakanshiwa ku Gileadi alingile ukubomba wa kubilisha imbila nsuma, kabili ifi fine e fyo mwe baali muli ili kalasi mwalecita, mwaleshimikila konse uko mwalesanga abantu.” Kwali ne filangililo fya kulangilila fimo ifisuma ifyacitike ilyo baleshimikila.

Pakonkele ilyashi lya mbali shibili, abalandile ulubali lwa kubalilapo ni baMichael Burnett e lyo abalandile ulubali lwakonkelepo ni baScott Shoffner, bonse babili babomba pa Bethel. Baipwishe bamunyina ababa muli ba Komiti ba Musambo abafumine ku Australia, Barbados, Korea, na ku Uganda. Ifyo aba bamunyina balandile fyalangile ukuti kulaba ukubombesha sana pa kusakamana bamishonari mu fyo bakabila, pamo no kubapekanishisha ukwa kwikala no kubasakamana nga balwala. Aba bamunyina balandile sana pa cishinka ca kuti bamishonari ababomba bwino balaitemenwa ukwalula imikalile yabo ukulingana na ku cifulo babatuma ukuya mu kubombela.

Ilyashi lya Kusondwelela Ilya Kukoselesha Kabili Ilya Kulenga Ukucitapo Cimo

Ilyashi likalamba ilya uyu programu lyaleti “Tiineni Lesa no Kumucindika,” lyalandilwe na ba John E. Barr, ababomba mwi Bumba Litungulula imyaka iingi. Balandile pe lembo lya Ukusokolola 14:6, 7 apatila: “Kabili namwene malaika umbi alepupuka mu kati ka muulu, kabili akwete imbila nsuma ya muyayaya iya kubila ku baikala pe sonde, na ku luko lonse no mutundu no lulimi na bantu, alesosa ishiwi likalamba, ati: ‘Tiineni Lesa no kumucindika, pantu yaisa inshita ya bupingushi bwakwe.’”

Munyinefwe Barr akoseleshe abasambi ukwibukisha ifintu fitatu pali ulya malaika. Ica ntanshi, aali no kubilisha imbila nsuma ya muyayaya iya kutila nomba Kristu aleteka na maka yonse aya Bufumu. Kalanda atile: “Twalishininkisha sana ukuti Yesu atendeke ukuteka mu 1914. Kanshi iyi mbila nsuma ifwile ukubilwa icalo conse.” Ica bubili, malaika atile: “Tiineni Lesa.” Kalanda alondolwele ukuti abalepwisha isukulu lya Gileadi bafwile ukwafwa abasambi babo aba Baibolo ukuba na katiina kuli Lesa pa kuti tabalecita ifya kumukalifya. Ica butatu, malaika asosele ukuti: ‘Cindikeni Lesa.’ Kalanda akoseleshe abasambi ukuti: “Mueibukisha lyonse ukuti ilyo tulebomba, tufwaya ukucindika Lesa, te ifwe iyo.” Lyena, pa kulondolola “inshita ya bupingushi,” munyinefwe Barr atile: “Kushele fye inshita iinono sana iya kuti Lesa alete ubupingushi. Abantu abengi mu fifulo fyesu ifya kubombelamo bacili balekabila ukumfwa imbila nsuma ilyo inshita tailapwa.”

Ilyo baletontonkanya pali aya mashiwi, abalepwisha isukulu lya Gileadi abali 56 balibapeele amadipuloma kabili babatumine ku fyalo fyalekanalekana. Abapwishishe isukulu na bonse abasangilweko balitemenwe icine cine pa fyebo fya kufunda ifya kubakoselesha ifyabafikile pa mitima ifyalandilwe pali ubu bushiku bushaiwamina.

[Akabokoshi pe bula 17]

IFIPENDO FYA BALI MU KALASI

Bafumine mu fyalo: 6

Bakayabombela mu fyalo: 25

Abasambi bonse pamo bali: 56

Imyaka ya kufyalwa nga kwakanya pali umo: 35.1

Imyaka baba mu cine nga kwakanya pali umo: 18.3

Imyaka babomba mu mulimo wa nshita yonse nga kwakanya pali umo: 13.9

[Icikope pe bula 18]

Abapwishishe Isukulu lya Gileadi Ilyalenga 121

Umutande uli pe samba, ukupenda kutampiile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.