Amepusho Ukufuma ku Babelenga

Bushe ukukakatika balanda pa Ukusokolola 7:3, kukakatika nshi?

Pa Ukusokolola 7:1-3 patila: “Namwene bamalaika bane nabeminina pa fifutu fine ifye sonde, nabekatilila imyela ine iye sonde, pa kuti umwela wipuupila pe sonde nelyo pali bemba nelyo pa muti onse. Kabili namwene malaika umbi alenina ukufuma ku butulilo bwa kasuba, ali ne cikakatikilo ca kwa Lesa wa mweo; kabili abilikishe ishiwi likalamba kuli bamalaika bane abapeelwe ukonaula isonde na bemba, ati: ‘Mwionaula isonde nelyo bemba nelyo imiti, mpaka tukakatike abasha ba kwa Lesa wesu pa mpumi shabo.’”

Ilyo abaikata “imyela ine” bakalekako, ninshi “ubucushi bukalamba” bwafika kabili ukupepa kwa bufi konse kukonaulwa, na babifi bonse aba muli cino calo cabipa bakonaulwa. (Ukusokolola 7:14) “Abasha ba kwa Lesa wesu” ni bamunyina basubwa no mupashi aba kwa Kristu pano calo. (1 Petro 2:9, 16) Kanshi ubu busesemo butulanga ukuti ilyo ubucushi bukalamba bukatendeka, ninshi ukukakatika bamunyina ba kwa Kristu kwalipwa kale. Na lyo line, amalembo yambi aya mu Baibolo yatulanga ukuti kwaliba ukukakatika na kumbi ukwa kubalilapo uko abasubwa bakakatikwa. E mulandu wine, limo tulandila pa kukakatika kwa kubalilapo no kukakatika kwa kulekelesha. Bushe bupusano nshi bwaba pali uku kukakatika kubili?

Natulande pa fyo ishiwi lya kuti “ukukakatika” lipilibula. Kale, balebomfya icikakatikilo icali nge nshimbi ya kufwatikilako icishibilo ico balebika ku fyo balembele nangu ku cipe cimo. Kanshi nga bafwatika icishibilo nelyo icifwati no kucibika ku fyo balembele, e co baleti ukukakatika. Kale sana, umuntu nga alemba ifyebo fimo nelyo aletuma icipe cimo, balitemenwe ukubikako icishibilo ca kukakatika nelyo icifwati, nga bacite fyo, ninshi uulepokelela ifyo fyebo nangu ico icipe ninshi aishiba ukuti uutumine ni kantwa.—1 Ishamfumu 21:8; Yobo 14:17.

Umutumwa Paulo apashenye umupashi wa mushilo ku cikakatikilo nelyo icifwati ilyo atile:  “Uuleikashisha ifwe na imwe ukuti tuli ba kwa Kristu kabili uwatusuba ni Lesa. Kabili alibika ne cifwati cakwe pali ifwe no kutupeela iciikatilo ica fili no kwisa, e kutila, umupashi, mu mitima yesu.” (2 Abena Korinti 1:21, 22) Kanshi, Yehova alasuba Abena Kristu no mupashi wakwe uwa mushilo ukulanga ukuti baba icikwatwa cakwe.

Nomba, abasubwa bakakatikwa nelyo ukufwatikwa imiku ibili. Paliba ubupusano pa kukakatika kwa kubalilapo no kwa kulekelesha. Ubupusano bwaba pa (1) ubufwayo e lyo na (2), inshita kucitika. Ubufwayo bwa kukakatika kwa kubalilapo, kusala umuntu ukuba pe bumba lya Bena Kristu basubwa. Ubufwayo bwa kukakatika kwa kulekelesha bwena, bwaba kushininkisha ukuti uwasalilwe no kukakatikwa pa kubala nomba nalanga ukuti wa cishinka ukufika na ku mpela. Palya pene pa kukakatika kwa kulekelesha, e po icifwati cikalembwa umuyayaya “pa mpumi” ya musubwa, ukumupeela icishibilo ca kuti nomba ‘musha wa kwa Lesa wesu,’ uwaeshiwa kabili uwa cishinka umupwilapo. Kanshi ukukakatika balandapo mu Ukusokolola icipandwa 7 ni uku kwine twalondolola ukwa kulekelesha.—Ukusokolola 7:3.

Ilyo umutumwa Paulo alelanda pa cingatwafwa ukwishiba ilyo ukukakatika kwa kubalilapo kucitika, alembeele Abena Kristu basubwa ukuti: “Na imwe mwasubiile muli wene ilyo mwaumfwile icebo ca cine, imbila nsuma ye pusukilo lyenu. Muli wene kabili, ilyo mwasumine, mwakakatikwe ku mupashi wa mushilo uwalaiwe.” (Abena Efese 1:13, 14) Baibolo itulanga ukuti ilingi line, ca cine ukuti Abena Kristu ba kubalilapo bakakatikwe ilyo fye baumfwile imbila nsuma no kusumina Kristu. (Imilimo 8:15-17; 10:44) Uko kukakatikwa kwali cishibilo ca kuti Lesa nabapokelela. Nomba tacali cishibilo ca kuti calaala capwa Lesa nabapokelela mpaka bakaye na ku muulu. Cinshi twasosele fyo?

Paulo atile Abena Kristu basubwa ‘bakakatikilwa ku bushiku bwa kulubulwa.’ (Abena Efese 4:30) Aya mashiwi yaletulanga ukuti pafwile ukupita inshita, nangu fye imyake ingi, ukufuma pa kukakatikwa kwa kubalilapo ukufika pa kulubuka kwabo. Abasubwa balingile ukuba ne cishinka kuli Lesa ukufuma pa bushiku bakakatikwa no mupashi wa mushilo ukufika na pa bushiku ‘bakalubuka’ ukufuma mu mubili wa bumuntu, e kuti ukufikile mfwa yabo. (Abena Roma 8:23; Abena Filipi 1:23; 2 Petro 1:10) Kanshi, ni ku mpela fye ya mweo wakwe e lyo Paulo akwete amaka ya kulanda ukuti: “Nimbutuka ulubilo ukufika na ku mpela, nimbake citetekelo. Ukufuma nomba ukuya ku ntanshi kwambikilwa icilongwe ca bulungami.” (2 Timote 4:6-8) Na kabili, Yesu aebele icilonganino ca Bena Kristu basubwa ukuti: “Ube uwa cishinka ukufika na ku mfwa, na ine nkakupeela icilongwe ca bumi.”—Ukusokolola 2:10; 17:14.

Ishiwi lya kuti “icilongwe” na lyo lilatulenga ukwishiba ukuti pafwile ukupita inshita ukufuma pa kukakatika kwa kubalilapo ukufika pa kukakatika kwa kulekelesha. Mulandu nshi? Kale, umuntu nga acimfya abanankwe ukubutuka ulubilo, balemufwika icilongwe. Tabalefwika umuntu icilongwe lilya line alembesha fye ukuti alefwaya ukubutukako ulubilo. Balemufwika lilya abutuka ukufika apo batile e pa kulekela. E fyo caba na ku Bena Kristu basubwa, kano fye nga bashipikisha mu lubilo lwabo ulwa mampalanya, ukufuma pa kukakatika kwa kubalilapo ukufika na pa kukakatika kwa kulekelesha, e lyo bakapoka icilongwe ca mweo uushifwa mu muulu.—Mateo 10:22; Yakobo 1:12.

Bushe Abena Kristu basubwa no mupashi abasalwa kale nomba abacili pano calo, ni lilali bakakatikwa ukukakatika kwa kulekelesha? Ilyo ubucushi bukalamba bushilatendeka, bonse abashala pano calo bakakatikwa “pa mpumi shabo.” Ilyo bamalaika baikata imyela ine iya bucushi bukalamba bakalekako, bonse ababa muli Israele wa mampalanya uwa basubwa ninshi balikakatikwa ukukakatikwa kwa kulekelesha, nangu ca kutila abanono pali bena bakaba pano calo mpaka na bo bakafike ku mpela ya bumi bwabo ubwa buntunse.