Baletasha pa Kuba no Bumi Kabili Balitemenwe Abantu

BA DANIEL SYDLIK, ababombele imyaka iingi mwi Bumba Litungulula ilya Nte sha kwa Yehova bafwile pali Cibili pa 18 April, mu 2006, kabili bali ne subilo lya kuya ku muulu. Baali ne myaka 87 kabili babombele nakalimo imyaka 60 pa Bethel, e kutila amaofesi ya Nte sha kwa Yehova ayaba ku Brooklyn, mu New York.

Ba Sydlik batendeke ukubomba pa Bethel mu 1946 kabili abanabo sana, batemenwe ukubeta ati munyinefwe Dan. Ilyo bashilaya pa Bethel, bali ni bapainiya baibela mu citungu ca California kabili inshita imo balibakakilepo na mu cifungo ilyo kwali Inkondo ya Calo iya Bubili pa mulandu wa kuti balikeene ukuitumpa mu fikansa fya calo pantu baali Bena Kristu. Ifyo bapitilemo ilya nshita balifilondolola bwino sana mu lyashi lyabo ilyalembelwe mu Ulupungu lwa kwa Kalinda ulwa June 1, 1985, ulwa ciNgeleshi ulwakwete umutwe waleti, “How Priceless Your Friendship, O God!” (“Ifyo Cawama Ukuba Cibusa Wenu Mwe Lesa!”)

Munyinefwe Sydlik ali uwaicefya kabili tali uwaifinya. Ilyo aletungulula amapepo ya lucelo aya pa Bethel, amashiwi alelanda aya kubalilapo yalelanga fye ukuti cine cine aletasha pa kuba no bumi. Ba Sydlik batemenwe ukulanda ati: “Cisuma sana ukuba no bumi no kubombela Lesa wa cine kabili uwa mweo.” Ilyo balelanda amalyashi pa cintubwingi, ba Sydlik balekoselesha abantu bambi ukulamona ukutila ubumi bwalicindama, amalyashi yamo balelanda yaleti: “Balipaalwa abantu abo Yehova e Lesa wabo,” “Muleba ne Nsansa nge fyo na Yehova Aba,” “Mwilashimya Umupashi wa kwa Lesa,” ne lyaleti “Ifisuma Fikesa.”

Mu 1970, munyinefwe Sydlik aupile ba Marina Hodson, abafumine ku England, abo alondolwele ukuti “baali bupe ubwafumine kuli Lesa.” Babombeele Yehova pamo ukucila pa myaka 35.

Imyaka yonse iyo munyinefwe Sydlik aali pa Bethel, abombele mu madipartimenti yapusanapusana, pamo nga dipartimenti ya kupulinta ne ya kulemba impapulo. Balibombeleko na ku mulabasa wa Nte sha kwa Yehova uo baleita ati WBBR. Lyena, mu November 1974, basontelwe ukuba mwi Bumba Litungulula kabili mu kuya kwa nshita balibombele muli Komiti iisakamana ababomba umulimo wa nshita yonse, e lyo na muli Komiti ya kulemba impapulo.

Imyaka ukucila 30, munyinefwe Sydlik abombele muli Komiti iisakamana ababomba umulimo wa nshita yonse, kabili aishibikwe ukuti alitemenwe sana abantu. Ba Sydlik balekoselesha sana abantu kwi shiwi lyabo ilyatikama, kabili lyonse fye balelanda pe shuko twakwata ilya kubombela Yehova. Ilingi line batemenwe ukulanda ukuti insansa shine shine tashaba mu fintu ifyo twakwata pano calo, lelo tuba ne nsansa lintu twakwata icibusa cisuma na Yehova na lintu tulemona ukuti ubumi bwalicindama nga nshi.

Nangula ulupwa lwa pa Bethel lulafuluka nga nshi munyinefwe Sydlik, ica kumwenako cakwe ica kutasha pa kuba no bumi kabili no kutemwa abantu cikatwalilila ukulakoselesha ulupwa lwa Bethel. Tulecetekela ukuti ba Sydlik na bo baba pali balya abalumbulwa pa Ukusokolola 14:13, ukuti: “Ba nsansa abafwa abafwila muli Shikulu ukufuma pali nomba. Cine cine, e fyo wasosa umupashi, lekeni batuushe ku kucucutika kwabo, pantu imilimo yabo ilebakonka.”