Kuti Mwashipikisha Amacushi

MULI ino nshita iyayafya, abantu abengi baleshipikisha amacushi ayabipisha kwati cimwela ca mfula. Nomba, icilenga Abena Kristu ukushipikisha, kutemwa Lesa no kuba ne cishinka ku mafunde yakwe. Kubafwa shani? Icasuko kuti twacisanga mu cilangililo ico Yesu Kristu alandile. Apalenye abasambi bakwe aba cumfwila ku “muntu uwashilimuka, uwakuulile ing’anda yakwe pa mwalala.” Kabili Yesu atile: “Awe imfula yalilokele na mulamba aliishile ne cipuupu calipuupile no kupuma pali ilya ng’anda, lelo tayabongolweke, pantu yakuulilwe pa mwalala.”—Mateo 7:24, 25.

Mwamona ukutila nangu ca kutila uyu muntu wa mu cilangililo ali uwashilimuka, alecula—muli ci cilangililo amacushi ayo Yesu alelandapo yapashanishiwa ku mfula iyaleloka, mulamba, ne cipuupu ca mwela. Kanshi Yesu pano tatile abasambi bakwe bena bakapusuka ku macushi yonse no kulaikala fye bwino kabili mu mutende. (Amalumbo 34:19; Yakobo 4:13-15) Lelo atile ababomfi ba kwa Lesa aba cishinka balingile ukuipekanya ku fintu fyonse ifingabacitikila e lyo bengashipikisha amesho na macushi yene.

Yesu atendeke icilangililo na mashiwi ya kuti: “Onse uumfwa no kucita ifyebo fyandi ifi, akapashanishiwa ku muntu uwashilimuka, uwakuulile ing’anda yakwe pa mwalala.” Kwena, Yesu talelanda pa kukuula ing’anda iyi ine twaishiba, lelo alelanda pa mibele ne micitile iyo Umwina Kristu alingile ukukwata. Bonse abomfwa amashiwi ya kwa Kristu baleluka kabili baleshiba ifya kucita. Balakonka ifyo basambilila, na fyonse ifyo bacita ne mibele yabo yonse ishintilila pa fyo Kristu abafunda ifyaba kwati mwalala. Iciweme fye ca kutila uyu mwalala uwa mampalanya uo Yesu alelandapo te libwe lilya line tumona ilyayansa, lelo umuntu wa mu cilangililo aalingile ‘ukwimbisha’ pa kuti asange umwalala uwaba mu mushili. (Luka 6:48) E fyo caba na ku basambi ba kwa Yesu, balabombesha ukutwalilila ukuba ne mibele ibapalamika kuli Lesa.—Mateo 5:5-7; 6:33.

Finshi ificitika ilyo amacushi ayabipa kwati cimwela ca mfula, yaesha bucishinka bwa Mwina Kristu ne fyo asuminamo? Imibele yabo ya Bwina Kristu no kuitemenwa ukucita ifyo Kristu abafunda, e fibalenga ukushipikisha ilyo balecula, na lintu fye balelolela ubucushi ubwa Armagedone ubuli mupepi. (Mateo 5:10-12; Ukusokolola 16:15, 16) Cishinka, abengi abacita filya fine fye Kristu afunda, balashipikisha amesho ayaba kwati cipuupu ca mwela. Na imwe bene kuti mwashipikisha.—1 Petro 2:21-23.