Abakalamba Abacila Imyaka 100 Abaishiba Ico Babelako

MU SWEDEN mwaliba abantu 60 abo batila bali ne myaka 105 e lyo no kucilapo. BaElin bena bali ne myaka 105. Bekala mu ng’anda basungilamo abakalamba kabili tabenda pa mulandu wa kuti na bakula sana. Nangu cibe fyo, bacili balebomba nga bakasabankanya bacincila aba Nte sha kwa Yehova, kabili balibomba uyu mulimo pa myaka 60 nomba.

Pa kushimikila kuli bambi, baElin bakonka filya umutumwa Paulo alecita ilyo bamwikete no kumulindika mu ng’anda ku buteko bwa bena Roma. Paulo aleshimikila kuli bonse abalemutandalila. (Imilimo 28:16, 30, 31) E fyo na baElin bacita, balashimikila imbila nsuma iyaba mu Baibolo ku bawamya ing’anda bekalamo, abawamya umushishi wabo, banasi, badokota bameno, badokota bambi, e lyo na bambi abesa muli iyi ng’anda. Limo limo abasumina banabo mu cilonganino balatwala abo basambilila nabo Baibolo kuli baElin pa kuti benganonkelamo mu fyo baElin baishiba na mu fyo bapitamo.

Abalongana nabo balatemwa sana ukumona ifyo baElin basansamuka ne fyo bafwaisha ukwishiba ifipya. Nte munabo atile: “Cilapapusha ukumona ifyo babikako amano ku kwishiba ifilecitika mu cilonganino. Balebukisha amashina yonse aya baice kumo na mashina ya bakuukila mu cilonganino nomba line.” Na kabili abengi baishiba baElin ukuti ni bakapekape, ba nsansa, kabili baliba ne milangwe.

Cinshi calenga baElin ukutwalilila ukuba aba nsansa e lyo no kulaibukisha ico babelako? Ni co balabelenga ilembo lya bushiku mu katabo ka Ukubebeta Amalembo Cila Bushiku, akasabankanishiwa ne Nte sha kwa Yehova. Kabili balabelenga Baibolo cila bushiku ukubomfya amaglasi ya kubelengelako. Balapekanya ukulongana konse ukwa Nte sha kwa Yehova ukwa cila mulungu, kabili nangu ca kutila tabasangwa ku kulongana pa mulandu wa kukula, balakutika ku malyashi bakopa pali tepu. Kanshi ukubelenga lyonse Baibolo e lyo ne mpapulo ishilanda pali Baibolo no kutwalilila ukusangwa ku kulongana kwa Bwina Kristu kuti kwatwafwa ukwikala ubumi busuma kabili te kuti tulabe ico twabelako te mulandu no mushinku wesu.—Amalumbo 1:2; AbaHebere 10:24, 25.