Amepusho Ukufuma ku Babelenga

Bushe ni mu nshila nshi lukala milandu asangile ‘umwaume umo uwa mwi kana limo, lelo tasangile umwanakashi muli aba bonse’?—Lukala Milandu 7:28.

Pa kuti tumfwikishe bwino aya mashiwi yapuutwamo tufwile intanshi ukwishiba ifyo Lesa amona abanakashi. Baibolo ita Ruti umupongoshi wa kwa Naomi uwali mukamfwila ukutila “mwanakashi umusuma nga nshi.” (Ruti 3:11, NW) Amapinda 31:10 yalanda pa mukashi umusuma ukutila “umutengo wakwe wa patali ukucila bakorali.” Kanshi cinshi Imfumu Solomone iya mu Israele wa ku kale yapilibwile ilyo yatile: “Nalisangamo umwaume wine-wine umo mwikana limo, nomba mu banakashi bonse nshatala nsangamo umwanakashi wine-wine”?—Baibolo wa Diocese of Mbala.

Amashiwi yali pa muulu wa ici cikomo yalelanga fye ukuti abanakashi bafwile bali ne mibele yabipa sana mu nshiku sha kwa Solomone. (Lukala Milandu 7:26) Nalimo icalengele ukuti babe fyo, ni co abanakashi bambi bambi abalepepa Baali balebatunka ukucita ifyabipa. Nangu fye ni Mfumu Solomone na yo baliyalwile umutima ku bakashi bambi bambi abo yaupile abali abengi nga nshi. Baibolo itila Solomone “ali na bakashi imyanda cinelubali, abana ba mfumu, na bakanakashi imyanda itatu, kabili abakashi bakwe bayalwile umutima wakwe” kabili atendeke ukupepa balesa ba bufi. (1 Ishamfumu 11:1-4) Nangu mibele ya baume na yo yine tayaweme, tacaseekele ukusango mwaume umo uwalungama mu baume ikana, abalungama bali fye abanono sana. Solomone asondwelele ukutila, ‘Ici ceka ninsanga, ica kuti Lesa alengele abantunse abatambalala; lelo abene nabafwaye fya kwelenganya ifingi.’ (Lukala Milandu 7:29) Aya mashiwi alekelesha ukusosa yalelanda pa bantunse, tayalelinganya umwaume ku mwanakashi. Kanshi tufwile ukumona amashiwi Solomone alandile pali Lukala Milandu 7:28 ukuti yalelosha ku mibele ya bantu bonse mu nshita yakwe.

Nangu cibe fyo ici cikomo, kuti capilibula icintu na cimbi. Kuti caba kusesema, pantu takwatala akuba umwanakashi uwakwatapo icumfwila capwililika kuli Yehova. Lelo kwaliba umwaume umo uwakwete icumfwila ca musango uyo, no yo ni Yesu Kristu.—Abena Roma 5:15-17.

[Icikope pe bula 31]

“Umwaume umo uwa mwi kana limo”