Ifyapulamo mu Mulimo wa Kupilibula no Kupanga Amabaibolo mu Ndimi sha mu Afrika

KALE sana aba ku Bulaya na ku North Amerika abatemenwe ukubelenga Baibolo bailwike ukuti abena Afrika balekabila ukulabelenga Icebo ca kwa Lesa mu ndimi shabo. Pa kuti bacite ici cintu cacindama, abaume abengi balishile ku kusambilila indimi sha muno Afrika. Apo kale tabalelemba indimi shimo isha mu Afrika, bamo pali aba baume baishile, batendeke ukupanga ifya kulemba ishi ndimi kabili balipangile na madikishonari. Pa numa ya kucite co batendeke ukupilibula Baibolo mu ndimi shalekanalekana isha mu Afrika. Uyu wali mulimo wakosa. Icitabo ca The Cambridge History of the Bible catila: “Abalepilibula balepoosa imyaka iingi pa kuti basange amashiwi yalinga ayo bengabomfya pa kwita fye na masambilisho ya Bena Kristu ayayanguka ayali ayacindama sana.”

Mu 1857, abaTswana e babalilepo ukukwata Baibolo yonse pa ndimi isho bashalelemba kale mu Afrika. * Ilyo bapulintile iyi Baibolo tayali icitabo cimo, baipangile mu volyumu ayengi. Mu kuya kwa nshita, balipilibwile amaBaibolo mu ndimi sha mu Afrika na shimbi. AmaBaibolo ayengi pali ayo bapilibwile mu kubangilila yalikwete ishina lya kwa Lesa, Yehova, monse mu Malembo ya ciHebere nelyo “Icipingo ca Kale,” na mu Malembo ya Bwina Kristu aya ciGriki, nelyo “Icipingo Cipya.” Lelo, abantu abashali na katiina kwi shina lya mushilo ilya kwa Katendeka wa Baibolo, Yehova, balilembulwile no kupilibula amaBaibolo ayapya. Mu nshita ya kuti babikemo ishina lya kwa Lesa, bakonkele ulutambi lwa bufi ulwa baYuda ulwa kubomfya amalumbo pamo nga Lesa nelyo Shikulu apafwile ukuba ishina Yehova. Kanshi calekabilwa ukuti abena Afrika abatemwa Lesa bakwate Baibolo umwaba ishina Lyakwe.

Ukutula muli ba1980, Ibumba Litungulula ilya Nte sha kwa Yehova lyalibombesha sana ukupilibula Baibolo ya New World Translation of the Holy Scriptures mu ndimi ishikalamba isha mu Afrika. Icafumamo ca kuti abantu abengi abatemwa Baibolo mu Afrika balabelenga Baibolo ya New World Translation mu lulimi lwabo. Ukufika pali lelo, Baibolo ya New World Translation, yonse nangu iciputulwa cimo, yalipilibulwa mu ndimi 17 isha mu Afrika.

Ababelenga aya maBaibolo bapilibwila mu ndimi sha mu Afrika balitemwa ukukwata Baibolo  iibomfya ishina lya kwa Lesa ilya bukata, Yehova. Ica kumwenako fye, ilyo Yesu aiminine ku ntanshi mwi Sunagoge lya mu Nasarete, abilishe umulimo bamutumine ukubomba lintu abelengele ifyebo mu cimfungwa ca kwa Esaya, umo ne shina lya kwa Wishi lyalembelwe. (Esaya 61:1, 2) Ukulingana ne fyo Ilandwe lya kwa Luka lyapilibulwa muli Baibolo ya New World Translation, Yesu abelengele aya mashiwi yatila: “Umupashi wa kwa Yehova uli pali ine, pantu ansubile ku kubile mbila nsuma ku bapiina, antumine ku kubila ukulubuka ku bafungwa no kushibula amenso ya mpofu, no kulubula abanyanyantilwa, ku kushimikila umwaka wa kupokelelwa uwa kwa Yehova.”—Luka 4:18, 19.

Na cimbi icacindama mu kupanga amaBaibolo mu ndimi sha mu Afrika cacitike mu August 2005. Muli ulya mweshi, aba pa maofesi ya Nte sha kwa Yehova aya mu South Africa balipulintile no kupanga amaBaibolo ya New World Translation ukucila pali 76,000 mu ndimi sha mu Afrika. Pali iyi yine mpendwa pali na maBaibolo ya mu ciShona 30,000. Baibolo ya mu ciShona baikakwile mu Zimbabwe pa kulongana kwa citungu ukwaleti “Icumfwila ca Bukapepa.”

Muli ulya mweshi ushakalabwe, abatandalile umusambo wa ku South Africa balitemenwe ukumona uko balepulinta no kupanga amaBaibolo yapya mu ndimi sha mu Afrika. BaNhlahla, ababombela pa Bethel uko bapanga ifitabo batile: “Nalitemenwe nga nshi ukubombako umulimo wa kupanga amaBaibolo ya New World Translation mu ciShona na mu ndimi shimbi isha mu Afrika.” Ifi baNhalnhla basosele, e fyo aba pa musambo wa mu South Africa bonse baleyumfwa.

Nomba amaBaibolo ya kulafika ku bena Afrika mu kwangufyanya kabili takwakulaba kupoosapo sana indalama nga fintu cali lintu balepangila amaBaibolo ku Bulaya e lyo bayatuma ku Afrika. Icacindamisha ca kuti abena Afrika nomba nabakwata Baibolo iyapilibulwa bwino umwaba ne shina lya mushilo ilya kwa Katendeka Mukalamba uwa Baibolo, Yehova Lesa.

[Futunoti]

[Icikope pe bula 12]

Ishina lya kwa Lesa muli Baibolo ya ciTswana iyo basabankenye mu 1840

[Abatusuminishe]

Harold Strange Library of African Studies

[Icikope pe bula 13]

Abeni abafumine ku Swaziland baletamba amaBaibolo yapya ayo balepanga pa musambo wa mu South Africa